Read Iu Mien 2 Zunh Doic Douh 12 Bible Online

2 Zunh Doic Douh 12 - Iu Mien bible

2 Zunh Doic Douh 12

¹Le^hox^mbo^am nyei guoqv liepc wuonv yaac henv nyei ziangh hoc, ninh guangc ZIOUV nyei leiz-latc. Baeqc fingx yaac gan jienv guangc.

²Le^hox^mbo^am zoux hungh da'hmz hnyangx wuov hnyangx, laaix ninh mbuo maiv ziepc zuoqv nyei gan ZIOUV, I^yipv nyei Sisakv Hungh daaih mborqv Ye^lu^saa^lem.

³Maaih yietc cin nyic baeqv jaax mborqv jaax nyei maaz-cie, juqv waanc dauh geh maaz nyei baeng, caux yiem I^yipv gan ninh daaih nyei Li^mbie Mienh, Su^ki^im Mienh, caux E^ti^o^bie Mienh[52] camv! haic, zungv saauv maiv hingh.

⁴Sisakv Hungh caangv duqv yiem Yu^ndaa Deic weih wuonv nyei zingh aengx daaih taux Ye^lu^saa^lem.

⁵Wuov zanc douc waac mienh, Se^mai^aa, mingh lorz Le^hox^mbo^am caux Yu^ndaa nyei zuangx bieiv zeiv. Laaix Sisakv nyei jauv-louc ninh mbuo gapv zunv yiem Ye^lu^saa^lem. Se^mai^aa gorngv mbuox ninh mbuo, “ZIOUV hnangv naaiv nor gorngv mbuox meih mbuo, ‘Meih mbuo guangc yie, yie ziouc guangc meih mbuo zuqc yiem Sisakv nyei buoz-ndiev.’+”

⁶I^saa^laa^en nyei zuangx bieiv zeiv caux hungh diex nyiemc ganh zoux faix aengx gorngv, “ZIOUV zoux duqv horpc.”

⁷ZIOUV buatc ninh mbuo nyiemc ganh zoux faix, Se^mai^aa ziouc duqv zipv ZIOUV nyei waac. ZIOUV gorngv, “Yie buatc ninh mbuo nyiemc ganh zoux faix, yie ziouc maiv mietc ninh mbuo. Zungv oix njoux deix ninh mbuo, maiv qiex jiez taux daauh ziouc maiv bun Sisakv mietc Ye^lu^saa^lem.

⁸Mv baac ninh mbuo corc oix zuqc yiem ninh nyei buoz-ndiev ziouc haih hiuv duqv fu-sux yie caux fu-sux ganh norm guoqv nyei mienh hnangv haaix nor ganh nyungc.”

⁹I^yipv nyei hungh, Sisakv, ziouc daaih mborqv Ye^lu^saa^lem. Ninh zorqv yiem zaangc ZIOUV nyei biauv gu'nyuoz caux hungh dinc gu'nyuoz yietc zungv jaaix nyei ga'naaiv. Ninh zorqv nyungc-nyungc, liemh Saa^lo^morn zoux daaih nyei jiem-torngv-baaih.

¹⁰Le^hox^mbo^am Hungh ziouc longc dongh siqv zoux torngv-baaih div jiem-torngv-baaih jiu bun goux hungh dinc zuov gaengh nyei baeng-bieiv.

¹¹Hungh diex haaix zanc bieqc zaangc ZIOUV nyei biauv, goux hungh dinc nyei baeng dorh naaiv deix torngv-baaih mingh. Nqa'haav ninh mbuo aengx dorh nzuonx an jienv baeng zuov hungh dinc nyei dorngx.

¹²Le^hox^mbo^am nyiemc ganh zoux faix nyei ziangh hoc, ZIOUV maiv qiex jiez ninh aqv. Maiv daan mbuoqc naaiv, Yu^ndaa yaac duqv longx.

¹³Le^hox^mbo^am Hungh yiem Ye^lu^saa^lem liepc ganh zoux hungh wuonv nyei. Le^hox^mbo^am jiez gorn gunv wuov zanc, hnyangx-jeiv duqv feix ziepc yietv hnyangx. Ninh yaac yiem Ye^lu^saa^lem gunv ziepc cietv hnyangx. Ye^lu^saa^lem se ZIOUV yiem I^saa^laa^en nyei zuangx fingx mbu'ndongx ginv cuotv daaih weic liepc ninh nyei Mengh. Le^hox^mbo^am nyei maa se Ammon Mienh, mbuox heuc Naa^aa^maa.

¹⁴Le^hox^mbo^am zoux waaic sic, weic zuqc ninh maiv liepc dingc hnyouv lorz ZIOUV.

¹⁵Le^hox^mbo^am zoux nyei sic yiem gorn taux setv mueiz, fiev jienv douc waac mienh, Se^mai^aa, nyei sou-daan caux mangc zinh hoz wuov dauh Itc^ndo nyei sou-daan. Le^hox^mbo^am caux Ye^lo^mbo^am zanc-zanc maaih mborqv jaax nyei sic.

¹⁶Le^hox^mbo^am guei seix mi'aqv,[53] yaac zangx jienv yiem Ndaawitv nyei Zingh. Ninh nyei dorn, Aa^mbi^yaa, nzipc jienv zoux hungh.