Read Iu Mien 2 Zunh Doic Douh 16 Bible Online

2 Zunh Doic Douh 16 - Iu Mien bible

2 Zunh Doic Douh 16

¹Aasaax zoux hungh faah ziepc luoqc hnyangx wuov hnyangx, I^saa^laa^en nyei hungh, Mbaa^aa^qaa, daaih mborqv Yu^ndaa. Ninh weih jienv Laamaa Zingh wuonv nyei, maiv bun haaix dauh haih bieqc cuotv lorz Yu^ndaa Hungh, Aasaax.

²Aasaax ziouc yiem zaangc ZIOUV nyei biauv caux hungh dinc, siou jaaix nyei ga'naaiv nyei dorngx, zorqv jiem nyaanh fungx mingh bun Silie nyei hungh, Mben Haa^ndatc. Ninh gorngv,

³“Tov meih caux yie liepc ngaengc waac hnangv meih nyei die caux yie nyei die liepc ngaengc waac wuov nor. Yie zorqv jiem nyaanh fungx bun meih. Tov tuix meih caux I^saa^laa^en nyei Mbaa^aa^qaa Hungh liepc nyei ngaengc waac, weic bun ninh tuix leih nqoi yie.”

⁴Mben Haa^ndatc muangx Aasaax Hungh nyei waac, paaiv ninh nyei jun-baeng-bieiv mingh mborqv I^saa^laa^en nyei zingh. Ninh mborqv I^yon, Ndaan, Aa^mben Maa^im[59] caux Napv^taa^li nyei yietc zungv siou ga'naaiv nyei zingh.

⁵Mbaa^aa^qaa haiz naaiv deix sic cuotv, ninh dingh, guangc njiec naaiv deix gong, maiv ceix Laamaa aqv.

⁶Hnangv naaic Aasaax Hungh dorh Yu^ndaa nyei zuangx mienh mingh zorqv longc ceix Laamaa Zingh nyei la'bieiv caux ndiangx bienh mingh longc ceix Ge^mbaa caux Mitv^baa.

⁷Doix wuov deix ziangh hoc douc waac mienh, Haa^naa^ni, daaih lorz Yu^ndaa nyei hungh, Aasaax, gorngv mbuox ninh, “Weic zuqc meih kaux Silie nyei hungh, maiv kaux ZIOUV, meih nyei Tin-Hungh, Silie Hungh nyei jun-baeng biaux ndutv meih.

⁸E^ti^o^bie Mienh[60] caux Li^mbie Mienh nyei jun-baeng guanh caux mborqv jaax nyei maaz-cie caux geh maaz baeng camv! haic maiv zeiz? Mv baac weic zuqc meih kaux ZIOUV, ninh jiu bun ninh mbuo yiem meih nyei buoz-ndiev.

⁹ZIOUV nyei m'zing mangc mingh mangc daaih gormx lungh ndiev weic ceix qaqv bun maaih hnyouv gan nzengc ninh wuov deix. Meih zoux naaiv deix sic se hngongx haic. Yiem naaiv mingh meih ziouc maaih mborqv jaax nyei sic.”

¹⁰Aasaax ziouc qiex jiez! douc waac mienh ziouc zorqv ninh wuonx jienv loh. Dongh wuov zanc Aasaax yaac jiez gorn zoux doqc bun deix baeqc fingx.

¹¹Aasaax zoux nyei sic yiem gorn taux setv mueiz fiev jienv yiem Yu^ndaa caux I^saa^laa^en nyei hungh douh daan.

¹²Ninh gunv faah ziepc juov hnyangx wuov hnyangx, Aasaax nyei zaux maaih baengc. Maiv gunv baengc hniev ninh maiv lorz ZIOUV tengx, ninh lorz ndie-sai tengx hnangv.

¹³Ninh zoux hungh feix ziepc yietv hnyangx wuov hnyangx, ninh guei seix mi'aqv.[61]

¹⁴Ninh zangx jienv yiem Ndaawitv nyei Zingh, dongh ninh weic ganh zuqc daaih nyei zouv. Mienh zorqv ninh lorngx an sei nyei dorngx, dongh maaih ndaang nyei ga'naaiv caux ziux zaangc mienh nyei za'eix peux daaih ziex nyungc nyei laapc liuc ndui jienv. Ninh mbuo yaac buov guaax domh douz weic taaih ninh.