Read Iu Mien 2 Zunh Doic Douh 22 Bible Online

2 Zunh Doic Douh 22 - Iu Mien bible

2 Zunh Doic Douh 22

¹Ye^lu^saa^lem nyei baeqc fingx liepc Ye^ho^lam nyei dorn-faix, Aa^hatc^yaa,[72] nzipc jienv ninh zoux hungh, weic zuqc gan Aalapc Mienh daaih taux ciangv wuov guanh mienh, daix nzengc Aa^hatc^yaa nyei zuangx gorx. Yu^ndaa nyei hungh, Ye^ho^lam, nyei dorn, Aa^hatc^yaa, ziouc faaux weic gunv aqv.

²Aa^hatc^yaa faaux weic zoux hungh nyei ziangh hoc, hnyangx-jeiv duqv nyic ziepc nyeic hnyangx. [73] Ninh yiem Ye^lu^saa^lem gunv yietc hnyangx. Ninh nyei maa se Omli nyei sieqv-fun, Aa^taa^li^yaa.

³Aa^hatc^yaa yaac ei jienv Aa^hapc wuov biauv mienh nyei za'eix zoux, weic zuqc ninh nyei maa njaaux ninh zoux waaic.

⁴Ziux ZIOUV mangc ninh zoux waaic sic, hnangv Aa^hapc wuov biauv mienh zoux, weic zuqc ninh nyei die daic liuz, maaih Aa^hapc nyei mienh zoux ninh nyei caangh laangh mienh ziouc dorh ninh zuqc baaic aqv.

⁵Ninh ei jienv wuov deix mienh caangh laangh nyei waac caux I^saa^laa^en nyei hungh, Aa^hapc nyei dorn, Yolam, mingh Laamotv Gi^le^aatc caux Silie nyei hungh, Haa^saa^en, mborqv jaax. Silie Mienh yaac zoux bun Yolam zuqc mun.

⁶Yolam ziouc nzuonx taux Yitv^le^en zorc ninh yiem Laamotv caux Silie Hungh, Haa^saa^en, mborqv jaax zuqc mun nyei dorngx. Yu^ndaa nyei hungh, Ye^ho^lam nyei dorn, Aa^hatc^yaa, ziouc njiec taux Yitv^le^en mangc Aa^hapc nyei dorn, Yolam, weic zuqc Yolam zuqc mun.

⁷Aa^hatc^yaa njiec mingh buangh Yolam ziouc zuqc mietc se ziux Tin-Hungh dingc daaih nyei za'eix. Weic zuqc Aa^hatc^yaa mingh wuov zanc, ninh caux Yolam cuotv mingh buangh Nimsi nyei dorn, Ye^hu, dongh ZIOUV longc youh orn daaih weic mietc Aa^hapc nyei douh zong.

⁸Ye^hu dingc jienv Aa^hapc nyei biauv zong mienh nyei zuiz wuov zanc, ninh lorz buatc Yu^ndaa nyei bieiv zeiv caux Aa^hatc^yaa nyei fun, weic zuqc ninh mbuo gan jienv ninh daaih. Ye^hu ziouc daix nzengc ninh mbuo.

⁹Aa^hatc^yaa bingx jienv yiem Saa^maa^lie, Ye^hu qaqv lorz. Ye^hu nyei mienh zorqv Aa^hatc^yaa dorh mingh bun Ye^hu, Ye^hu ziouc daix ninh aqv. Ninh mbuo zorqv ninh zangx jienv weic zuqc ninh mbuo gorngv, “Ninh se Ye^ho^saa^fatv nyei fun.[74] Ye^ho^saa^fatv longc nzengc hnyouv lorz ZIOUV. ” Hnangv naaic Aa^hatc^yaa nyei douh zong maiv maaih haaix dauh haih gunv deic-bung.

¹⁰Aa^hatc^yaa nyei maa buatc ninh nyei dorn zuqc daix daic, ninh ziouc jiez gorn daix Yu^ndaa douh zong maaih hungh douh nyei mienh.

¹¹Mv baac Ye^ho^lam Hungh nyei sieqv, Ye^ho^qe^mbaa, zorqv Aa^hatc^yaa nyei dorn, Yo^aatc, yiem oix zuqc daix daic nyei hungh dorn mbu'ndongx nimc cuotv daaih. Ye^ho^qe^mbaa dorh Yo^aatc caux dorh Yo^aatc wuov dauh bou bingx jienv yietc qongx gen. Hnangv naaic Ye^ho^lam Hungh nyei sieqv, se Ye^ho^yaa^ndaa sai mienh nyei auv, weic ninh zoux Aa^hatc^yaa nyei muoc, ninh bingx Yo^aatc, maiv bun zuqc Aa^taa^li^yaa daix.

¹²Yo^aatc caux ninh mbuo yiem juqv hnyangx, bingx jienv zaangc Tin-Hungh nyei biauv gu'nyuoz. Aa^taa^li^yaa yaac gunv deic-bung.