Read Iu Mien E^saa^laa 1 Bible Online

E^saa^laa 1 - Iu Mien bible

E^saa^laa 1

¹Sailatv zoux Besie Guoqv nyei hungh daauh hnyangx wuov hnyangx, weic bun ZIOUV longc Ye^le^mi douc nyei waac cuotv daaih doix-diuc, ZIOUV dongz zuqc Sailatv Hungh nyei hnyouv, bun ninh fiev zeiv sou yaac zunh gormx ninh nyei guoqv gorngv,

²“Besie Guoqv nyei hungh diex, Sailatv, hnangv naaiv nor gorngv. “+‘ZIOUV, lungh zaangc nyei Tin-Hungh, zorqv lungh ndiev maanc guoqv jiu bun yie. Ninh yaac paaiv yie yiem Yu^ndaa Deic-Bung, Ye^lu^saa^lem Zingh, weic ninh ceix norm zaangc Tin-Hungh nyei biauv.

³Yiem meih mbuo zuangx mienh mbu'ndongx, da'faanh zoux Tin-Hungh nyei baeqc fingx wuov deix, tov ninh mbuo nyei Tin-Hungh caux ninh mbuo gorqv-mienh yiem. Gunv nzuonx Yu^ndaa Deic-Bung, Ye^lu^saa^lem Zingh, ceix zaangc ZIOUV nyei biauv, se I^saa^laa^en Mienh nyei Tin-Hungh, dongh yiem Ye^lu^saa^lem wuov dauh Tin-Hungh nyei biauv.

⁴Maaih haaix dauh zuqc guaatv daaih nyei mienh, maiv gunv yiem haaix norm dorngx, bun wuov norm dorngx nyei mienh tengx jiem nyaanh caux qiemx longc nyei ga'naaiv caux saeng-kuv. Cuotv liuz naaiv, sueih mienh cuotv fim fongc horc ga'naaiv weic Ye^lu^saa^lem Zingh, zaangc Tin-Hungh nyei biauv.’+”

⁵Yu^ndaa caux Mben^yaa^min Fingx nyei bungh buonc bieiv zeiv caux sai mienh caux Lewi Mienh, se dongh Tin-Hungh dongz zuqc hnyouv nyei yietc zungv mienh, ziouc liuc leiz nzuonx Ye^lu^saa^lem ceix zaangc ZIOUV nyei biauv.

⁶Yiem nitv fatv ninh mbuo wuov deix mienh bun ga'naaiv weic tengx ninh mbuo. Bun nyaanh jaa-dorngx, bun jiem, bun qiemx longc nyei ga'naaiv caux saeng-kuv, aengx caux maaih jaax-zinh nyei ga'naaiv. Cuotv liuz naaiv deix, ganh ca'lengc maaih mienh cuotv fim fongc horc ga'naaiv.

⁷Sailatv Hungh Diex aengx zorqv cuotv zaangc ZIOUV nyei biauv nyei jaa-dorngx, dongh zinh ndaangc Ne^mbu^katv^netv^saa Hungh yiem Ye^lu^saa^lem caangv daaih an jienv ninh ganh nyei zienh nyei miuc-biauv.

⁸Besie Guoqv nyei hungh, Sailatv, paaiv goux hungh diex nyei jaa-dingh nyei jien, Mitv^le^ndaatc, zorqv naaiv deix jaa-dorngx cuotv daaih. Mitv^le^ndaatc saauv liuz aengx bun Yu^ndaa nyei domh jien, Setv^mbatc^saa.

⁹Jaa-dorngx nyei soux mouc maaih hnangv naaiv. Jiem-bunh — 30 norm nyaanh bunh — 1,000 norm nyaanh bienh[1] — 29 norm

¹⁰jiem-nzormc — 30 norm nyaanh nzormc — 410 norm[2] ganh nyungc jaa-dorngx — 1,000 norm

¹¹Jiem nyaanh nyei jaa-dorngx yietc zungv maaih biaa cin feix baeqv norm.[3] Zuqc guaatv mingh Mbaa^mbi^lon nyei mienh nzuonx Ye^lu^saa^lem wuov zanc, Setv^mbatc^saa dorh naaiv deix yietc zungv jaa-dorngx caux jienv nzuonx.