Read Iu Mien E^saa^laa 4 Bible Online

E^saa^laa 4 - Iu Mien bible

E^saa^laa 4

¹Yu^ndaa Mienh caux Mben^yaa^min Mienh nyei win-wangv haiz gorngv, zuqc guaatv mingh aengx duqv nzuonx daaih nyei mienh,[9] weic ZIOUV, I^saa^laa^en Mienh nyei Tin-Hungh, ceix zaangc Tin-Hungh nyei biauv.

²Wuov deix win-wangv ziouc mingh lorz Se^lupv^mbaa^mben caux I^saa^laa^en nyei bungh buonc bieiv zeiv. Ninh mbuo gorngv, “Bun yie mbuo tengx jienv meih mbuo ceix oc, weic zuqc yie mbuo zaangc meih mbuo nyei Tin-Hungh hnangv meih mbuo nor. Yiem Atc^si^lie nyei hungh, E^saanx^hatv^ndon, dorh yie mbuo daaih yiem naaiv wuov zanc yie mbuo zanc-zanc fongc horc ziec bun Tin-Hungh.”

³Mv baac Se^lupv^mbaa^mben, Ye^su^aa, caux yiem I^saa^laa^en zengc njiec nyei bungh buonc bieiv zeiv gorngv mbuox daaih lorz ninh mbuo wuov deix mienh, “Meih mbuo maiv maaih buonc caux yie mbuo ceix zaangc Tin-Hungh nyei biauv. Kungx yie mbuo ganh hnangv oix ceix daaih weic ZIOUV, I^saa^laa^en Mienh nyei Tin-Hungh, ziux Besie Guoqv nyei hungh, Sailatv, paaiv yie mbuo zoux.”

⁴Yiem wuov deix ndau nyei mienh ziouc zoux bun Yu^ndaa Mienh tuix bouc, gamh nziex maiv ceix wuov norm biauv.

⁵Wuov deix mienh yaac beic ndiev nzuiz nyaanh bun jien-fouv[10] dangv jienv Yu^ndaa Mienh, maiv bun ninh mbuo zoux. Da'faanh Sailatv zoux hungh nyei lungh ndiev, zungv mingh taux Besie nyei hungh, Ndaa^li^atc, gunv nyei ziangh hoc, ninh mbuo yaac fih hnangv nyei nyauv jienv Yu^ndaa Mienh nyei gong.[11]

⁶Yiem Aa^haa^su^e^latv Hungh[12] jiez gorn gunv wuov zanc, wuov deix win-wangv aengx lorz jauv gox Yu^ndaa caux Ye^lu^saa^lem nyei mienh.

⁷Yiem Besie Guoqv nyei hungh, Aan^taa^se^sitv, zoux hungh nyei lungh ndiev, Mbitc^laam, Mitv^le^ndaatc, Taa^mbe^en caux ninh mbuo wuov guanh mienh, fiev zeiv sou bun Aan^taa^se^sitv Hungh. Wuov zeiv sou longc Aalam nzaangc yaac benx Aalam waac.[13]

⁸Le^hum saengv-ziouv caux Simsai sou-biuv, fiev sou bun Aan^taa^se^sitv Hungh weic gox Ye^lu^saa^lem Zingh nyei mienh hnangv naaiv.[14]

⁹Saengv-ziouv, Le^hum, caux Simsai sou-biuv, aengx caux jienv ninh mbuo nyei guanh, se siemv zuiz nyei jien, caux zoux jien nyei mienh, caux Mbaa^mbi^lon Guoqv nyei baeqc fingx, caux Elekv Mienh, caux Elaam baeqc fingx wuov deix Susaax Mienh,

¹⁰caux ziex norm guoqv nyei mienh, dongh zoux hlo nyei domh jien, Otc^napv^baa,[15] zunc mingh yiem Saa^maa^lie Zingh caux wuov ngaanc ziqc Yu^fe^ditc Ndaaih, mba'hnoi ndortv maengx norm-norm dorngx, fiev naaiv zeiv sou.

¹¹(Naaiv se ninh mbuo juix mingh nyei sou.) Fungx taux Aan^taa^se^sitv Hungh Diex, Meih nyei bou, se yiem mba'hnoi ndortv maengx wuov bung Yu^fe^ditc Ndaaih nyei zuangx mienh, jangx taux meih.

¹²Hungh diex horpc zuqc hiuv duqv, yiem meih wuov daaih yiem yie mbuo naaiv nyei Yiutai Mienh mingh taux Ye^lu^saa^lem Zingh, aengx ceix wuov norm orqv haic, aah loc faanv lunc nyei zingh. Ninh mbuo ceix zingh laatc aav lamh ziangx yaac zorc zingh nyei gorn-ndoqv.

¹³Hungh diex horpc zuqc hiuv duqv, se gorngv naaiv norm zingh duqv ceix ziangx, zingh laatc yaac zorc ziangx nor, ninh mbuo zungv maiv fungx korx-zinh caux nzou-zinh mingh bun meih aqv. Hnangv naaic, hungh diex nyei zinh nyaanh ziouc zoqc njiec.

¹⁴Yie mbuo yietc zungv yiem meih nyei buoz-ndiev nyei mienh, maiv oix buatc hungh diex nyei mengh dauh ndortv cingx fungx naaiv deix waac mingh mbuox hungh diex.

¹⁵Tov paaiv mienh zaah mangc hungh diex nyei ong-taaix nyei daan. Yiem daan ziouc duqv buatc wuov norm zingh nyei mienh zanc-zanc faanv lunc, hoic doic-doic hungh caux norm-norm saengv nyei saengv-ziouv. Yiem loz-hnoi daaih taux ih zanc naaiv norm zingh nyei mienh hnyouv ngaengc, cuoqv sic. Weic naaiv, naaiv norm zingh cingx zuqc baaic waaic.

¹⁶Yie mbuo oix hungh diex hiuv duqv, se gorngv naaiv norm zingh ceix ziangx, zingh laatc yaac zorc ziangx nor, yiem Yu^fe^ditc Ndaaih mba'hnoi ndortv maengx nyei deic-bung, hungh diex maiv duqv gunv aqv.

¹⁷Hungh diex wuih sou hnangv naaiv nor gorngv. Fungx bun Le^hum saengv-ziouv caux Simsai sou-biuv, aengx caux ninh mbuo nyei guanh, dongh yiem Saa^maa^lie caux Yu^fe^ditc Ndaaih mba'hnoi ndortv maengx ziex norm dorngx nyei mienh. Tov bun meih mbuo baengh orn nyei yiem oc.

¹⁸Meih mbuo juix daaih bun yie wuov zeiv sou maaih mienh doqc aengx faan daaih bun yie muangx liuz aqv.

¹⁹Yie hatc mienh zaah mangc, ziouc buatc naaiv norm zingh nyei mienh yiem loz-hnoi m'daaih maaih caux hungh diex doix-dekc, yaac maaih ngaengc jienv faanv lunc nyei sic.

²⁰Zinh ndaangc maaih hatc maaz nyei hungh gunv Ye^lu^saa^lem Zingh caux Yu^fe^ditc Ndaaih mba'hnoi ndortv maengx nyei yietc zungv deic-bung. Yiem wuov deix deic-bung nyei mienh yaac oix zuqc cuotv nzou-zinh caux korx-zinh bun wuov deix hungh diex.

²¹Hnangv naaic, meih mbuo oix zuqc hatc ninh mbuo dingh, maiv dungx ceix wuov norm zingh aqv. Zuov taux yie nqoi nzuih.

²²Meih mbuo oix zuqc maiv dungx ngaih jienv liuc leiz naaiv deix sic weic maiv hoic hungh diex zuqc kuei.

²³Le^hum saengv-ziouv caux Simsai sou-biuv, caux ninh mbuo nyei guanh yietv haiz doqc liuz Aan^taa^se^sitv Hungh nyei sou, ninh mbuo gaanv jienv mingh Ye^lu^saa^lem lorz Yiutai Mienh, ziouc longc hatc maaz, longc qaqv zoux bun Yiutai Mienh dingh gong.

²⁴Yiem Ye^lu^saa^lem Zingh ceix zaangc Tin-Hungh nyei biauv nyei gong ziouc dingh taux Besie Guoqv nyei hungh, Ndaa^li^atc, gunv guoqv da'nyeic hnyangx.