Read Iu Mien E^saa^laa 5 Bible Online

E^saa^laa 5 - Iu Mien bible

E^saa^laa 5

¹Maaih i dauh douc waac mienh, Hakv^gai, caux Itc^ndo nyei dorn, Se^kaa^li^yaa. Ninh mbuo dengv I^saa^laa^en Mienh nyei Tin-Hungh nyei mengh douc waac mbuox yiem Yu^ndaa Deic-Bung caux Ye^lu^saa^lem Zingh nyei Yiutai Mienh.

²Se^an^ti^en nyei dorn, Se^lupv^mbaa^mben, caux Yo^saa^ndakc nyei dorn, Ye^su^aa, haiz liuz ninh mbuo nyei waac, ziouc dongz buoz siang-ceix jiez Tin-Hungh nyei biauv yiem Ye^lu^saa^lem Zingh. Tin-Hungh nyei douc waac mienh yaac yiem wuov tengx ninh mbuo.

³Wuov zanc yiem Yu^fe^ditc Ndaaih mba'hnoi ndortv maengx nyei saengv-ziouv, Tatv^te^nai, caux Qetaa Mbo^se^nai, aengx caux jienv ninh mbuo nyei guanh, mingh Ye^lu^saa^lem Zingh lorz ninh mbuo naaic gaax, “Haaix dauh bun meih mbuo maaih leiz ceix naaiv norm zaangc Tin-Hungh nyei biauv aengx siang-liepc jiez?”

⁴Ninh mbuo aengx naaic, “Zoux naaiv norm biauv wuov dauh mienh nyei mbuox heuc haaix nyungc?”

⁵Mv baac Tin-Hungh nyei m'zing mangc jienv Yiutai Mienh nyei mienh gox. Tatv^te^nai saengv-ziouv caux ninh daaih nyei mienh maiv heuc ninh mbuo dingh gong. Zuov fungx sou mbuox tong Ndaa^li^atc Hungh aengx zuov hungh diex wuih sou nzuonx.

⁶Yu^fe^ditc Ndaaih mba'hnoi ndortv maengx nyei Tatv^te^nai saengv-ziouv caux Qetaa Mbo^se^nai, aengx caux ninh nyei guanh, dongh mba'hnoi ndortv maengx wuov bung ndaaih nyei jien-fouv, fungx naaiv zeiv fienx mingh mbuox Ndaa^li^atc Hungh.

⁷Ninh mbuo fiev nyei waac hnangv naaiv nor gorngv, Bun taux Ndaa^li^atc Hungh Diex, Tov bun hungh diex duqv baengh orn.

⁸Hungh diex horpc zuqc hiuv duqv, yie mbuo mingh taux Yu^ndaa Deic, mingh taux zaangc hlo haic nyei Tin-Hungh nyei biauv. Ih zanc mienh longc domh la'bieiv-benv ceix jienv faaux, aengx longc ndiangx-benv nqenx jienv njongc.[16] Naaiv deix gong ninh mbuo zoux duqv jienh yaac zoux duqv siepv.

⁹Yie mbuo ziouc naaic wuov deix mienh gox, “Haaix dauh bun meih mbuo maaih leiz ceix naaiv norm zaangc Tin-Hungh nyei biauv aengx liepc jiez daaih?”

¹⁰Yie mbuo yaac naaic ninh mbuo nyei mbuox cingx daaih haih fiev ninh mbuo nyei bieiv zeiv nyei mbuox bun hungh diex hiuv.

¹¹Ninh mbuo hnangv naaiv nor dau yie mbuo. “Yie mbuo zoux lungh ndau nyei Tin-Hungh nyei bou. Yie mbuo aengx ceix zaangc Tin-Hungh nyei biauv, dongh zinh ndaangc camv-hnyangx aqv, maaih dauh I^saa^laa^en Mienh nyei domh hungh diex ceix ziangx wuov norm biauv.

¹²Laaix yie mbuo nyei ong-taaix cuoqv lungh zaangc nyei Tin-Hungh qiex jiez, ninh ziouc bun ninh mbuo zuqc yiem Ken^ndie Mienh, Mbaa^mbi^lon Guoqv, Ne^mbu^katv^netv^saa Hungh nyei buoz-ndiev. Ne^mbu^katv^netv^saa Hungh zoux waaic naaiv norm biauv aengx zorqv baeqc fingx guaatv taux Mbaa^mbi^lon.

¹³“Nqa'haav yiem Sailatv zoux Mbaa^mbi^lon Guoqv nyei hungh daauh hnyangx, ninh njiec lingc aengx ceix naaiv norm zaangc Tin-Hungh nyei biauv.

¹⁴Ninh zungv tuix nzuonx zinh ndaangc Ne^mbu^katv^netv^saa yiem Ye^lu^saa^lem Zingh, zaangc Tin-Hungh nyei biauv, caangv cuotv daaih an jienv Mbaa^mbi^lon nyei miuc-biauv wuov deix jiem nyaanh nyei jaa-sic. “Sailatv Hungh ziouc zorqv naaiv deix ga'naaiv jiu bun dongh ninh orn zoux Yu^ndaa nyei saengv-ziouv wuov dauh Setv^mbatc^saa.

¹⁵Hungh diex yaac mbuox ninh, ‘Dorh naaiv deix jaa-sic nzuonx Ye^lu^saa^lem Zingh, zaangc Tin-Hungh nyei biauv, aengx yiem loz-dorngx ganh siang-ceix wuov norm biauv jiez daaih.’

¹⁶Setv^mbatc^saa ziouc daaih naaiv Ye^lu^saa^lem liepc zaangc Tin-Hungh nyei biauv nyei gorn-ndoqv. Yiem wuov zanc zoux jienv daaih taux ih zanc yaac zoux maiv ziangx.”

¹⁷Hnangv naaic, se gorngv hungh diex buatc horpc nyei nor, tov paaiv mienh zaah yiem Mbaa^mbi^lon Zingh siou jienv nyei hungh daan mangc gaax Sailatv Hungh za'gengh cuotv sou heuc yiem Ye^lu^saa^lem siang-ceix naaiv norm zaangc Tin-Hungh nyei biauv jiez daaih zeiz fai maiv zeiz? Naaiv deix jauv ziux hungh diex buatc horpc zuqc zoux nor, tov bun waac daaih bun yie mbuo hiuv.