Read Iu Mien Ne^haa^mi 2 Bible Online

Ne^haa^mi 2 - Iu Mien bible

Ne^haa^mi 2

¹Aan^taa^se^sitv zoux hungh diex nyic ziepc hnyangx wuov hnyangx, Nisaanx hlaax, maaih a'ngunc diuv mbenc ziangx yiem hungh diex nyei nza'hmien wuov zanc, yie bouh diuv bun hungh diex hopv. Yiem hungh diex nyei nza'hmien yie maiv maaih jiex hmien nzauh.

²Hungh diex ziouc naaic yie, “Meih nyei hmien weic haaix diuc ndongc naaic nzauh? Meih maiv zeiz butv baengc maaih lamh mun saah? Daaix meih nyei hnyouv nzauh hnangv.” Yie gamh nziex haic,

³mv baac yie dau hungh diex, “Tov bun hungh diex ziangh duqv maanc fuix. Yie hnangv haaix nor maiv nzauh? Zangx yie nyei ong-taaix nyei zingh benx zingh huaang. Zingh laatc nyei gaengh yaac zuqc douz buov waaic nzengc.”

⁴Hungh diex ziouc naaic yie, “Meih oix tov haaix nyungc fai?” Yie caux lungh zaangc nyei Tin-Hungh daux gaux,

⁵yaac dau hungh diex, “Se gorngv meih buatc horpc hnyouv nyei, yaac a'hneiv yie, meih nyei bou nor, tov bun yie mingh Yu^ndaa Deic-Bung, taux zangx yie nyei ong-taaix nyei zingh weic aengx siang-ceix jiez daaih.”

⁶Hungh diex caux yie gorngv waac wuov zanc maaih hungh maac zueiz jienv ninh nyei ga'hlen. Hungh diex naaic yie, “Meih oix mingh ndongc haaix lauh? Haaix zanc cingx nzuonx daaih?” Hungh diex nqoi eix bun yie mingh, yie ziouc dingc ziangx ziangh hoc bun hungh diex hiuv.

⁷Yie ziouc mbuox hungh diex, “Se gorngv horpc meih nyei hnyouv nor, tov bun zeiv sou yie dorh mingh bun Yu^fe^ditc Ndaaih mba'hnoi ndortv maengx nyei saengv-ziouv. Ninh mbuo ziouc nqoi nzuih bun yie jiex mingh taux Yu^ndaa Deic-Bung.

⁸Yie aengx tov zeiv sou bun gunv hungh diex nyei ndiangx-lomc wuov dauh Aasaapc, mbuox ninh bun ndiangx yie longc zoux zuov zaangc Tin-Hungh nyei biauv nyei laauh nyei gaengh qorng, zoux zingh laatc yaac zoux yie ganh yiem nyei biauv.” Weic zuqc Tin-Hungh caux yie yiem, yie tov nyei nyungc-nyungc hungh diex ziouc bun yie.

⁹Yie ziouc mingh taux Yu^fe^ditc Ndaaih mba'hnoi ndortv maengx nyei saengv-ziouv, zorqv hungh diex nyei sou jiu bun ninh mbuo. Hungh diex aengx paaiv deix baeng-bieiv caux geh maaz baeng caux jienv yie mingh.

¹⁰Mv baac Mbetc Holon Zingh nyei mienh, Sanx^mbaan^latv, caux Ammon Mienh nyei jien, To^mbi^aa, haiz liuz naaiv deix jauv-louc, ninh mbuo maiv horpc hnyouv yietc deix, weic zuqc buatc maaih mienh daaih oix tengx I^saa^laa^en Mienh duqv longx.

¹¹Yie ziouc taux Ye^lu^saa^lem, hitv wuov buo hnoi.

¹²Yie yaac maiv mbuox haaix dauh mienh Tin-Hungh bun yie maaih hnyouv weic Ye^lu^saa^lem Zingh zoux haaix nyungc. Lungh muonz zanc maaih i ziex dauh mienh caux yie jiez sin cuotv mingh. Cuotv liuz yie geh nyei saeng-kuv, maiv maaih ganh dauh saeng-kuv caux yie mingh.

¹³Lungh muonz zanc yie yangh Horngz-Gaengh wuov dauh gaengh cuotv mingh taux Hieh Juv Wuom-Zingv,[4] aengx jiex mingh taux La'fapv-Ndui Gaengh[5] zaah mangc Ye^lu^saa^lem nyei zingh laatc zuqc mbaang waaic nyei dorngx caux zuqc douz buov waaic nyei zingh gaengh.

¹⁴Yie aengx jiex mingh taux Wuom-Zingv Gaengh caux Hungh Diex nyei Wuom-Domh mv baac maiv maaih dorngx bun yie geh nyei saeng-kuv jiex duqv mingh.

¹⁵Lungh muonz zanc yie gan Kitc^lon Horngz mingh zaah mangc zingh laatc ziouc daaux sin yangh loz-jauv nzuonx aengx gan jienv Horngz-Gaengh bieqc zingh.

¹⁶Goux zingh nyei jien yaac maiv hiuv duqv yie mingh haaix fai zoux haaix nyungc. Yie yaac maiv gaengh mbuox Yiutai Mienh, sai mienh, zoux hlo zoux jien nyei mienh, fai haaix dauh oix zuqc tengx zoux naaiv nyungc gong nyei mienh.

¹⁷Yie ziouc gorngv mbuox ninh mbuo zuangx mienh, “Meih mbuo zuangx mienh buatc jienv mbuo ndortv naanc ndongc haaix kouv. Ye^lu^saa^lem Zingh mbaang waaic mi'aqv. Zingh gaengh yaac zuqc douz buov waaic nzengc. Daaih maah! Mbuo lomh nzoih ceix Ye^lu^saa^lem nyei zingh laatc jiez daaih, bun mbuo maiv zuqc aengx baaic hmien.”

¹⁸Yie aengx gorngv mbuox ninh mbuo, Tin-Hungh hnangv haaix nor caux yie yiem, tengx jienv yie, bun ninh mbuo hiuv duqv hungh diex mbuox yie nyei waac. Zuangx mienh gorngv, “Mbuo lomh nzoih njiec buoz aengx ceix jiez daaih maah!” Ninh mbuo ziouc njiec buoz zoux naaiv nyungc kuv gong.

¹⁹Mbetc Holon Zingh nyei mienh, Sanx^mbaan^latv, caux Ammon Mienh nyei jien, To^mbi^aa, aengx caux Aalapc Mienh, Gesem, muangx haiz yie mbuo zoux nyei gong, ninh mbuo ziouc jatv yie mbuo, mangc piex yie mbuo. Ninh mbuo gorngv, “Meih mbuo naaic zoux haaix nyungc laeh? Meih mbuo faanv hnyouv ngaengc hungh diex fai?”

²⁰Yie dau ninh mbuo, “Lungh zaangc nyei Tin-Hungh oix tengx yie mbuo zoux ziangx. Yie mbuo, ninh nyei bou, zungv oix njiec buoz ceix aqv. Mv baac yiem Ye^lu^saa^lem maiv maaih meih mbuo nyei buonc. Meih mbuo yaac maiv maaih leiz yaac maiv maaih meih mbuo loz-hnoi nyei gorn-buonv.”