Read Iu Mien E^se^te 9 Bible Online

E^se^te 9 - Iu Mien bible

E^se^te 9

¹Ziepc nyeic hlaax, Aa^ndaa hlaax, ziepc faam wuov hnoi, dongh oix zuqc ziux hungh diex nyei lingc zoux wuov norm hnoi, Yiutai Mienh nyei win-wangv laaic ninh mbuo duqv hingh jiex Yiutai Mienh. Daaux nzuonx Yiutai Mienh hingh jiex nzorng ninh mbuo wuov deix mienh.

²Yiem Aa^haa^su^e^latv Hungh gunv nyei norm-norm saengv norm-norm zingh, Yiutai Mienh gapv zunv mborqv oix daaih hoic ninh mbuo wuov deix win-wangv. Fingx-fingx mienh haiz gamh nziex haic ninh mbuo, maiv maaih haaix dauh haih noic duqv ninh mbuo.

³Yaac maaih norm-norm saengv zoux hlo nyei zuangx mienh, saengv-ziouv caux domh jien fiuv-jien caux hungh diex nyei mbenc sic mienh tengx Yiutai Mienh, weic zuqc ninh mbuo gamh nziex Mo^nde^kai.

⁴Mo^nde^kai yiem hungh dinc zoux hlo. Ninh nyei mengh dauh sing buangv norm-norm saengv. Ninh nyei hatc maaz yaac gunv zoux gunv hlo.

⁵Yiutai Mienh longc nzuqc ndaauv daix nzengc mietc nzengc ninh mbuo nyei win-wangv, yaac sueih eix zoux bun nzorng ninh mbuo wuov deix.

⁶Yiem Susaax Zingh, Yiutai Mienh daix daic hmz baeqv dauh mienh.

⁷Ninh mbuo yaac daix Baan^qan^ndaa^taa, Ndaanfon, Atc^baa^taa,

⁸Bo^laa^taa, Aa^ndan^yaa, Aa^li^ndaa^taa,

⁹Baan^matv^taa, Aa^li^saix, Aa^li^ndai caux Wai^saa^taa.

¹⁰Naaiv deix ziepc dauh se Ham^me^ndaa^taa nyei fun, dongh Yiutai Mienh nyei win-wangv, Haamaan, nyei dorn. Mv baac Yiutai Mienh maiv luv ga'naaiv.

¹¹Dongh wuov hnoi yiem Susaax Zingh zuqc daix daic nyei mienh nyei soux mouc maaih mienh mingh mbuox hungh diex.

¹²Hungh diex gorngv mbuox E^se^te Hungh Maac, “Yiem Susaax Domh Zingh, Yiutai Mienh daix hmz baeqv dauh mienh. Liemh Haamaan nyei ziepc dauh dorn yaac zuqc daix daic. Yiem yie gunv nyei norm-norm saengv maiv hiuv duqv ninh mbuo hnangv haaix nor. Ih zanc meih oix tov haaix nyungc? Yie oix bun meih. Meih jouh haaix nyungc? Meih ziouc duqv aqv.”

¹³E^se^te Hungh Maac dau, “Se gorngv buatc horpc hungh diex nyei hnyouv nor, tov bun yiem Susaax Zingh nyei Yiutai Mienh njang hnoi aengx ziux ih hnoi nyei lingc zoux. Yaac tov bun mienh zorqv Haamaan nyei ziepc dauh dorn nyei sei ndiux jienv ndiux jaang nyei dorngx.”

¹⁴Hungh diex ziouc njiec lingc heuc yiem Susaax Zingh hnangv naaiv nor zoux. Mienh ziouc zorqv Haamaan nyei ziepc dauh dorn ndiux jienv.

¹⁵Aa^ndaa hlaax ziepc feix wuov hnoi, yiem Susaax Zingh nyei Yiutai Mienh gapv zunv yiem zingh gu'nyuoz daix faam-baeqv dauh. Mv baac ninh mbuo maiv luv ga'naaiv.

¹⁶Aengx yiem hungh gunv nyei norm-norm saengv zengc njiec nyei Yiutai Mienh gapv zunv beu ganh nyei maengc, ziouc hingh jiex ninh mbuo nyei win-wangv, duqv baengh orn. Ninh mbuo daix siec waanc biaa cin dauh nzorng ninh mbuo wuov deix mienh, mv baac maiv luv ga'naaiv.

¹⁷Naaiv deix sic cuotv doix Aa^ndaa hlaax, ziepc faam wuov hnoi. Ziepc feix wuov hnoi Yiutai Mienh hitv kuonx, zoux jorm mbenc nyanc mbenc hopv, njien-youh nauc nyitc.

¹⁸Mv baac yiem Susaax Zingh nyei Yiutai Mienh doix ziepc faam caux ziepc feix wuov deix i hnoi gapv zunv daix win-wangv. Ziepc hmz wuov hnoi ninh mbuo hitv gong, zoux jorm mbenc nyanc mbenc hopv, njien-youh nauc nyitc.

¹⁹Weic naaiv yiem fiuv-laangz nyei Yiutai Mienh longc Aa^ndaa hlaax, ziepc feix wuov hnoi, zoux jorm mbenc nyanc mbenc hopv, njien-youh nauc nyitc. Laanh yaac fungx zingh nyeic bun laanh.

²⁰Mo^nde^kai faaux jienv naaiv deix sic yaac fungx fienx mingh bun yiem gormx Aa^haa^su^e^latv Hungh gunv nyei norm-norm saengv nyei Yiutai Mienh, maiv gunv go fai fatv,

²¹heuc ninh mbuo hnyangx-hnyangx oix zuqc longc Aa^ndaa hlaax, ziepc feix ziepc hmz wuov deix i hnoi, benx jiex zipv nyei hnoi.

²²Naaiv deix i hnoi se houc Yiutai Mienh hingh jiex win-wangv duqv baengh orn nyei hnoi. Naaiv norm hlaax ninh mbuo nyei you-nzauh goiv benx njien-youh. Nzauh nyiemv goiv benx orn-lorqc. Oix zuqc longc naaiv norm hnoi mbenc nyanc mbenc hopv, njien-youh nauc nyitc, laanh fungx zingh nyeic bun laanh, yaac fungx zingh nyeic bun mienh jomc mienh.

²³Yiutai Mienh ziouc laengz ei jienv Mo^nde^kai fiev nyei waac zoux, hnangv ninh mbuo jiez gorn zoux nor,

²⁴weic zuqc Aagakc Mienh, Ham^me^ndaa^taa nyei dorn, Yiutai Mienh nyei win-wangv, Haamaan, daav orqv nyei za'eix daix Yiutai Mienh. Ninh guaengx bu^aa,[20] se hnangv jouh guaax nor, weic lorz hnoi daix nzengc, mietc nzengc ninh mbuo.

²⁵Naaiv deix sic douc taux hungh diex, hungh diex ziouc njiec lingc fiev jienv bun Haamaan daav orqv nyei za'eix ndortv zuqc ninh ganh, bun ninh caux ninh nyei dorn mbuo zuqc ndiux jienv ndiux jaang nyei dorngx.

²⁶(Weic naaiv Yiutai Mienh gan bu^aa wuov joux waac heuc wuov deix hnoi zoux Bulim Zipv.) Weic Mo^nde^kai fiev naaiv zeiv fienx nyei waac yaac weic m'zing buatc nyei, caux ninh mbuo ganh buangh jiex nyei sic,

²⁷Yiutai Mienh cingx weic ninh mbuo ganh caux hoz doic zeiv-fun caux bieqc benx ninh mbuo nyei mienh wuov deix, liepc diuh leiz longc naaiv deix i norm hnoi, hnyangx-hnyangx ziux dingc daaih nyei ziangh hoc ei jienv leiz-nyeic zoux, maiv bun guangc.

²⁸Norm-norm saengv, norm-norm zingh nyei buonc-buonc Yiutai Mienh, doic jiex doic oix zuqc jangx jienv yaac ei jienv naaiv deix i norm hnoi jiex zipv. Naaiv norm Bulim Zipv yiem Yiutai Mienh mbu'ndongx maiv horpc zuqc guangc. Ninh mbuo nyei zeiv-fun yaac maiv dungx la'kuqv.

²⁹Aa^mbi^haa^in nyei sieqv, E^se^te Hungh Maac, caux Yiutai Mienh, Mo^nde^kai, longc nzengc hatc maaz fiev naaiv da'nyeic zeiv fienx gorngv duqv jienv nyei taux jiex Bulim Zipv.

³⁰Naaiv zeiv fienx fungx mingh bun Aa^haa^su^e^latv Hungh gunv nyei guoqv gu'nyuoz nyei yietc baeqv nyic ziepc cietv norm saengv nyei yietc zungv Yiutai Mienh, buang waac bun ninh mbuo baengh orn, orn-lorqc nyei yiem.

³¹Fienx yaac heuc ninh mbuo ziux dingc daaih nyei ziangh hoc jiex Bulim Zipv nyei hnoi, hnangv Yiutai Mienh, Mo^nde^kai, caux E^se^te Hungh Maac paaiv ninh mbuo zoux, yaac ziux ninh mbuo weic ganh caux ninh mbuo nyei zeiv-fun liepc daaih nyei leiz-nyeic zei maiv nyanc haaix nyungc caux nzauh nyiemv.

³²E^se^te Hungh Maac nyei lingc dingc ziangx jiex Bulim Zipv nyei yietc nyeic yaac fiev jienv sou-daan.