Read Iu Mien Cuotv I^yipv 2 Bible Online

Cuotv I^yipv 2 - Iu Mien bible

Cuotv I^yipv 2

¹Zoux gau, maaih dauh Lewi Fingx nyei dorn longc dauh Lewi Fingx nyei sieqv zoux auv.

²Ninh nyei auv ziouc maaih sin, yungz duqv dauh dorn. Buatc ninh nyei dorn ziangh duqv nzueic haic, ninh zorqv ninh nyei dorn bingx jienv dorh buo hlaax nyieqc.

³Bingx gau, ninh bingx maiv mbueiz aqv, ziouc longc norm luoqc diqc normh zieqv daaih nyei ndaan, zorqv i nyungc ndau-ndiev nyei zung naic jienv, hlorpv gu'nguaaz dapv jienv ndaan gu'nyuoz, dorh mingh an wuov ndaaih hlen luoqc diqc lomc.

⁴Gu'nguaaz nyei dorc yiem go deix nyei, souv jienv wuov mangc gaax naaiv dauh gu'nguaaz hnangv haaix nor.

⁵Faalo Hungh nyei sieqv mingh wuov Nai^aa Ndaaih nzaaux sin. Mbienz ninh wuov deix m'sieqv bou yiem wuov ndaaih hlen saau a'nziaauc. Hungh sieqv buatc wuov norm ndaan yiem wuov luoqc diqc lomc ziouc heuc ninh nyei nouh beiz mingh zorqv daaih.

⁶Hungh sieqv koi mangc buatc dauh gu'nguaaz-dorn. Gu'nguaaz yaac nyiemv aqv. Hungh sieqv korv-lienh haic, ninh gorngv, “Aa, naaiv Hipv^lu Mienh nyei gu'nguaaz niaa.”

⁷Gu'nguaaz nyei dorc ziouc daaih naaic gaax hungh sieqv, “Meih oix yie mingh lorz dauh maaih nyorx bun gu'nguaaz hopv nyei Hipv^lu m'sieqv dorn daaih tengx meih dorh gu'nguaaz nyei fai?”

⁸Hungh sieqv dau, “Oix nyei. Gunv mingh lorz maah!” Wuov dauh sieqv ziouc mingh lorz gu'nguaaz nyei maa daaih.

⁹Faalo Hungh nyei sieqv gorngv mbuox gu'nguaaz nyei maa, “Tengx yie dorh naaiv dauh gu'nguaaz oc. Yie bun gong-zinh meih nyei.”

¹⁰Gu'nguaaz nyei maa ziouc hlorpv gu'nguaaz mingh dorh. Gu'nguaaz hlo deix, ninh nyei maa fungx mingh bun hungh sieqv ziouc benx hungh sieqv nyei dorn mi'aqv. Hungh sieqv tengx naaiv dauh dorn cuotv mbuox heuc Mose.[2] Hungh sieqv gorngv, “Weic zuqc yie yiem wuom zorqv ninh cuotv daaih.”

¹¹Mose hlo daaih aqv. Maaih hnoi nor, ninh cuotv mingh mangc caux ninh juangc fingx nyei mienh, buatc ninh mbuo zuqc mienh hoic zoux gong kouv haic. Ninh buatc dauh I^yipv Mienh mborqv dauh Hipv^lu Mienh, dongh caux ninh juangc fingx nyei mienh.

¹²Mose ziouc mangc naaiv mangc wuov, buatc maiv maaih mienh. Ninh ziouc zorqv wuov dauh I^yipv Mienh daix daic biopv jienv saa-ziou ndui bingx jienv.

¹³Da'nyeic hnoi Mose aengx cuotv mingh mangc buatc i dauh Hipv^lu Mienh mborqv jaax. Ninh naaic gaax zoux dorngc wuov dauh, “Meih zoux haaix nyungc mborqv caux meih juangc fingx nyei Hipv^lu Mienh?”

¹⁴Wuov dauh dau, “Haaix dauh orn meih daaih zoux yie mbuo nyei siemv zuiz jien gunv yie mbuo? Meih oix daix yie hnangv meih daix wuov dauh I^yipv Mienh norh?” Mose ziouc gamh nziex haic, yiem hnyouv hnamv, “Yie zoux nyei sic ndongc haaix zungv mienh hiuv mi'aqv.”

¹⁵Faalo Hungh haiz naaiv deix sic ninh oix daix Mose, mv baac Mose biaux Faalo, mingh yiem Mi^ndien Deic-Bung. Taux wuov ninh zueiz jienv wuom-kuotv ga'hlen.

¹⁶Mi^ndien Deic-Bung maaih dauh sai mienh maaih siec dauh sieqv. Wuov deix siec muoz-sieqv daaih cie wuom dox buangv zoh bun ninh mbuo nyei die nyei ba'gi yungh guanh caux yungh guanh hopv.

¹⁷Aengx maaih guanh mangc yungh nyei mienh daaih zunc naaiv deix siec muoz-sieqv biaux. Mose ziouc jiez sin tengx naaiv deix sieqv yaac tengx ninh mbuo cie wuom bun ninh mbuo nyei yungh hopv.

¹⁸Wuov deix sieqv nzuonx taux ninh mbuo nyei die, Le^u^en[3] wuov, ninh mbuo nyei die naaic gaax, “Ih hnoi meih mbuo fungc nzuonx ndongc naaic nziouv?”

¹⁹Ninh mbuo dau, “Maaih dauh I^yipv Mienh tengx yie mbuo biaux ndutv wuov deix mangc yungh nyei mienh. Ninh yaac tengx yie mbuo cie wuom bun yungh hopv.”

²⁰Le^u^en naaic ninh nyei sieqv mbuo, “Ninh yiem haaix? Zoux haaix nyungc guangc jienv ninh yiem wuov? Oix zuqc mingh heuc ninh daaih nyanc hnaangx.”

²¹Mose buangv hnyouv caux wuov dauh mienh yiem Mi^ndien Deic-Bung. Le^u^en ziouc bun dauh ninh nyei sieqv, mbuox heuc Sipc^bo^laa, Mose longc zoux auv.

²²Sipc^bo^laa yungz duqv dauh dorn. Mose gorngv, “Yie se ganh fingx mienh daaih yiem naaiv norm deic-bung.” Ninh ziouc tengx ninh nyei dorn cuotv mbuox heuc Gesom.[4]

²³Jiex liuz camv-hnyangx, I^yipv Deic-Bung nyei hungh diex guei seix mi'aqv. Wuov deix I^saa^laa^en Mienh nzauh haic, njunh jienv yiem, laaix ninh mbuo zuqc zoux nouh kouv haic. Ninh mbuo nyiemv jienv heuc Tin-Hungh tengx ninh mbuo. Tin-Hungh yaac haiz mi'aqv.

²⁴Tin-Hungh haiz ninh mbuo njunh yaac jangx zuqc ninh caux Apc^laa^ham, I^sakc caux Yaakopv laengz jiex nyei ngaengc waac.

²⁵Tin-Hungh mangc I^saa^laa^en Mienh, hiuv duqv ninh mbuo nyei kouv-zingh yaac korv-lienh nyei.