Read Iu Mien Cuotv I^yipv 26 Bible Online

Cuotv I^yipv 26 - Iu Mien bible

Cuotv I^yipv 26

¹“Oix zuqc longc ziepc kuaaiv ndie zoux norm zaangc Tin-Hungh nyei ndopv-liuh. Naaiv deix ndie longc la'maah suix-muonc zorpc jienv ba'gi suix setv mbuov, luoqc, siqv-hongc ndatv daaih. Lorz buoz-dauh longx nyei mienh congx jienv ke^lu^mbim nyei fangx.

²Kuaaiv-kuaaiv oix zuqc fih njietv fih ndaau, ndaauv nyic ziepc betv ndorqc, jangv biei ndorqc.

³Zorqv biaa kuaaiv gapv jienv lunh benx yietc kuaaiv. Aengx maaih wuov deix biaa kuaaiv fih hnangv nyei lunh benx yietc kuaaiv.

⁴Oix zuqc longc ndie-mbuov zoux nekv dingx jienv naaiv deix i kuaaiv domh ndie nyei ndie-hlen.

⁵Yietc kuaaiv dingx hmz ziepc norm nekv. Naaiv kuaaiv nyei nekv caux wuov kuaaiv nyei nekv oix zuqc doix ziangx.

⁶Aengx longc jiem zoux hmz ziepc norm ga'naaiv-kaux zorqv naaiv kuaaiv nyei nekv bangc wuov kuaaiv nyei nekv kaux jienv benx yietc norm ndopv-liuh mi'aqv.

⁷“Aengx longc yungh biei ndatv ziepc yietv kuaaiv ndie daaih gomv ndopv-liuh ga'nyiec wuov yiemc.

⁸Zoux kuaaiv-kuaaiv fih njietv fih ndaau, ndaauv faah ziepc ndorqc, jangv biei ndorqc.

⁹Zorqv biaa kuaaiv gapv jienv lunh benx yietc kuaaiv. Aengx zorqv juqv kuaaiv fih hnangv nyei lunh benx yietc kuaaiv. Naaiv kuaaiv nyei ga'hlen oix zuqc nzipv nzuonx zoux i yiemc yiem ndopv-liuh nyei nza'hmien maengx.

¹⁰Yiem naaiv deix i kuaaiv domh ndie nyei ndie-hlen, yietc kuaaiv oix zuqc dingx hmz ziepc norm nekv.

¹¹Aengx longc dongh siqv zoux hmz ziepc norm ga'naaiv-kaux, kaux jienv wuov deix nekv bun ninh benx yietc norm ndopv-liuh.

¹²Zengc njiec wuov deix i ndorqc ndie oix zuqc bungx suoh njiec ndopv-liuh nqa'haav maengx.

¹³Gomv ndopv-liuh nyei ndie i bung ga'hlen, yietc bung ndaauv yietc ndorqc weic nzie jienv zaangc Tin-Hungh nyei ndopv-liuh ga'hlen buang jienv.

¹⁴Aengx longc yungh ndopv nyomc daaih siqv nyei gomv yiemc, caux fuoqv daaih longx nyei saeng-kuv ndopv[47] gomv yiemc.

¹⁵“Oix zuqc longc da'suqv ndiangx zoux ndopv-liuh nyei qorng liepc zaqc.

¹⁶Norm-norm qorng oix zuqc zoux hlang ziepc ndorqc, jangv ndorqc bienx.

¹⁷Norm-norm qorng i bung qorng-zaux pai ga'nyiec maengx bun ninh citv deix. Yietc norm qorng nyei zaux ziouc caux da'nyeic norm qorng nyei zaux gapv jienv. Ndopv-liuh nyei yietc zungv qorng oix zuqc hnangv naaiv nor zoux.

¹⁸Ndopv-liuh nyei naamh bung oix zuqc zoux nyic ziepc norm qorng.

¹⁹Aengx longc nyaanh zoux feix ziepc norm taapv topv qorng nyei zaux. Yietc norm qorng longc i norm taapv.

²⁰Weic ndopv-liuh nyei baqv bung yaac oix zuqc zoux nyic ziepc norm qorng.

²¹Aengx zoux feix ziepc norm nyaanh taapv weic topv qorng nyei zaux. Yietc norm qorng longc i norm taapv.

²²Ndopv-liuh nqaang, fai bung wuov bung, oix zuqc zoux juqv norm qorng.

²³Aengx ganh zoux i norm qorng weic ndopv-liuh nqa'haav maengx nyei gorqv.

²⁴Gorqv nyei i norm qorng oix zuqc yiem ga'ndiev horpc taux gu'nguaaic yaac juangc norm kou kou jienv. I bung gorqv oix zuqc zoux fih hnangv nyei.

²⁵Hnangv naaiv yietc zungv maaih hietc norm qorng yaac maaih ziepc luoqc norm nyaanh taapv. Yietc norm qorng topv i norm taapv.

²⁶“Oix zuqc longc da'suqv ndiangx zoux gungh gangc ndiangx. Yietc bung ndopv-liuh nyei qorng oix zuqc maaih biaa diuh.

²⁷Wuov bung yaac oix zuqc maaih biaa diuh. Nqa'haav maengx, fai bung wuov bung, aengx maaih biaa diuh.

²⁸Mbu'ndongx wuov wuonc oix zuqc zoux benx yietc diuh ndiangx yiem naaiv bung cunx dorng wuov bung.

²⁹Naaiv deix qorng yietc zungv oix zuqc buang jienv jiem aengx longc jiem zoux kuing dingx jienv cunx gungh gangc wuov deix njongc-laan. Gungh gangc njongc-laan yietc zungv yaac oix zuqc buang jienv jiem.

³⁰“Oix zuqc ziux yiem mbong mbuox meih nyei nyungc zeiv corng naaiv norm ndopv-liuh.

³¹“Oix zuqc longc ba'gi suix setv mbuov, luoqc, siqv-hongc zorpc jienv la'maah suix-muonc ndatv kuaaiv mbaeqc gaengh ndie, aengx lorz buoz-dauh longx nyei mienh congx jienv ke^lu^mbim nyei fangx.

³²Naaiv kuaaiv ndie oix zuqc longc jiem-ngau kuangx jienv biei norm dongc. Dongc oix zuqc longc da'suqv ndiangx zoux yaac buang jienv jiem aengx topv jienv biei norm nyaanh taapv.

³³Oix zuqc zorqv mbaeqc gaengh ndie kuangx jienv ngau, aengx zorqv Laengz Ngaengc Waac Faang don jienv mbaeqc gaengh ndie gu'nyuoz maengx. Naaiv kuaaiv ndie nqenx jienv Gauh Cing-Nzengc Jiex Wuov Qongx caux Cing-Nzengc Wuov Qongx.

³⁴Oix zuqc zorqv ceix en nyei weic[48] gomv jienv Laengz Ngaengc Waac Faang gu'nguaaic, an jienv Gauh Cing-Nzengc Jiex Wuov Qongx gu'nyuoz.

³⁵Zorqv dieh don jienv wuov kuaaiv ndie ga'nyiec maengx, ndopv-liuh nyei baqv bung. Aengx zorqv dang don naamh bung maengx doix ziangx wuov norm dieh.

³⁶“Mbaeqc ndopv-liuh nyei gaengh ndaangc wuov kuaaiv ndie oix zuqc longc la'maah suix-muonc zorpc jienv ba'gi suix setv mbuov, luoqc, caux siqv-hongc ndatv daaih yaac maaih buoz-dauh congx nyei mienh congx jienv nzueic nyei.

³⁷Oix zuqc longc da'suqv ndiangx zoux biaa norm dongc, yaac buang jienv jiem, aengx dingx jienv jiem-ngau kuangx jienv mbaeqc gaengh ndie. Aengx longc dongh siqv zoux biaa norm taapv weic topv dongc.