Read Iu Mien Cuotv I^yipv 3 Bible Online

Cuotv I^yipv 3 - Iu Mien bible

Cuotv I^yipv 3

¹Mose tengx ninh nyei ong-daa, Mi^ndien Mienh nyei sai mienh, Yeto,[5] goux ba'gi yungh caux yungh. Mose horngh yungh jiex deic-bung-huaang mingh fai bung maengx taux Tin-Hungh nyei mbong, Holepv.[6]

²Yiem wuov, ZIOUV nyei fin-mienh hinc cuotv hnangv guaax douz yiem ndiangx-dorn-fomv gu'nyuoz. Mose buatc douz yiem wuov ndiangx-dorn-fomv mv baac maiv buov qui.

³Mose yiem hnyouv hnamv, “Aa, yie mingh fatv deix mangc gaax naaiv deix mbuoqc horngh nyei sic. Douz weic haaix diuc maiv zieqc ndiangx-dorn-fomv?”

⁴ZIOUV buatc Mose mingh mangc, Tin-Hungh ziouc yiem wuov ndiangx-dorn-fomv heuc, “Mose aah! Mose!” Mose dau, “Oeix! Yie yiem naaiv oc.”

⁵Tin-Hungh mbuox ninh, “Meih maiv dungx daaih gauh fatv aqv. Oix zuqc tutv nqoi heh. Meih ih zanc souv jienv naaiv deix dorngx se cing-nzengc nyei ndau.

⁶Yie zoux meih nyei ong-taaix nyei Tin-Hungh, se Apc^laa^ham, I^sakc, caux Yaakopv nyei Tin-Hungh.” Mose ziouc buang jienv hmien, gamh nziex maiv mangc Tin-Hungh.

⁷ZIOUV gorngv, “Yie buatc yie nyei baeqc fingx yiem I^yipv Deic-Bung siouc nyei kouv naanc. Yie yaac haiz ninh mbuo heuc laaix ninh mbuo zuqc gong-bou-bieiv hoic ninh mbuo. Yie hiuv duqv ninh mbuo nyei kouv-zingh kouv-latc siem nyei.

⁸Yie ziouc njiec daaih njoux ninh mbuo biaux ndutv I^yipv Mienh nyei buoz-ndiev, oix dorh ninh mbuo cuotv I^yipv Deic-Bung biaux mingh yiem norm longx haic, jangv haic nyei deic-bung, benx norm ndau-touv longx nyei deic-bung.[7] Se maaih Kaa^naa^an Mienh, Hitv^tai Mienh, Aa^mo^lai Mienh, Be^litv^si Mienh, Hiwai Mienh caux Ye^mbutc Mienh yiem jienv nyei deic-bung.

⁹Ih zanc yie haiz I^saa^laa^en Mienh nyei qiex taux yie nyei m'normh mi'aqv. Yaac buatc ninh mbuo zuqc I^yipv Mienh hoic duqv kouv haic.

¹⁰Ih zanc yie paaiv meih mingh Faalo Hungh wuov, oix meih dorh yie nyei baeqc fingx, I^saa^laa^en Mienh, cuotv I^yipv Deic-Bung.”

¹¹Mv baac Mose gorngv mbuox Tin-Hungh, “Yie benx haaix nyungc mienh cingx haih mingh taux Faalo Hungh wuov, dorh I^saa^laa^en Mienh cuotv I^yipv Deic-Bung?”

¹²Tin-Hungh gorngv, “Yie oix caux meih yiem. Naaiv zoux jangx-hoc bun cing yie paaiv meih mingh. Meih dorh I^saa^laa^en Mienh cuotv I^yipv Deic-Bung, meih mbuo oix daaih naaiv norm mbong zaangc yie.”

¹³Mose gorngv mbuox Tin-Hungh, “Se gorngv yie mingh taux I^saa^laa^en Mienh wuov, yie gorngv mbuox ninh mbuo, ‘Meih nyei ong-taaix nyei Tin-Hungh heuc yie daaih lorz meih mbuo,’ se gorngv ninh mbuo naaic gaax yie, ‘Ninh nyei mbuox heuc haaix nyungc?’ Yie oix zuqc hnangv haaix nor dau ninh mbuo?”

¹⁴Tin-Hungh gorngv mbuox Mose, “Yie nyei mbuox heuc, Yietc Liuz Ziangh Jienv Wuov Dauh. Meih oix zuqc mbuox ninh mbuo, ‘Mbuox heuc Yietc Liuz Ziangh Jienv Wuov Dauh paaiv yie daaih lorz meih mbuo.’+”

¹⁵Tin-Hungh aengx gorngv mbuox Mose, “Oix zuqc mbuox I^saa^laa^en Mienh, ‘ZIOUV, meih mbuo nyei ong-taaix nyei Tin-Hungh, se Apc^laa^ham nyei Tin-Hungh, I^sakc nyei Tin-Hungh, caux Yaakopv nyei Tin-Hungh, paaiv yie daaih lorz meih mbuo.’ ZIOUV se yie nyei mbuox weic yietc liuz. Oix zuqc jangx jienv hnangv naaiv nor heuc yietc doic zunh jiex yietc doic.

¹⁶“Meih oix zuqc mingh mbuox I^saa^laa^en Mienh nyei zuangx mienh gox daaih gapv zunv gorngv mbuox ninh mbuo, ‘ZIOUV, meih mbuo nyei ong-taaix nyei Tin-Hungh, se Apc^laa^ham, I^sakc, caux Yaakopv nyei Tin-Hungh, hinc cuotv daaih bun yie buatc. Ninh gorngv, “Yie samx mangc meih mbuo, yaac buatc meih mbuo yiem I^yipv Deic-Bung zuqc ninh mbuo hnangv haaix nor hoic meih mbuo.

¹⁷Yie laengz dorh meih mbuo cuotv I^yipv Deic-Bung, biaux ndutv meih mbuo nyei kouv-zingh kouv-latc. Yie oix dorh meih mbuo mingh yiem Kaa^naa^an Mienh, Hitv^tai Mienh, Aa^mo^lai Mienh, Be^litv^si Mienh, Hiwai Mienh caux Ye^mbutc Mienh nyei deic-bung. Benx ndau-touv longx nyei deic-bung.”+’[8]

¹⁸“I^saa^laa^en Mienh nyei zuangx mienh gox zungv oix muangx meih nyei waac. Meih caux naaiv deix mienh gox oix zuqc mingh I^yipv Hungh wuov gorngv mbuox ninh, ‘ZIOUV, Hipv^lu Mienh nyei Tin-Hungh, daaih lorz yie mbuo. Ih zanc tov bun yie mbuo mingh wuov deic-bung-huaang buo hnoi nyei jauv-dingh weic ziec bun ZIOUV yie mbuo nyei Tin-Hungh.’

¹⁹Mv baac yie hiuv duqv I^yipv Hungh maiv kangv bun meih mbuo mingh, cuotv liuz maaih domh qaqv nyei buoz aapv ninh.

²⁰Yie oix sung yie nyei buoz cuotv yiem I^yipv Mienh mbu'ndongx zoux camv-nyungc mbuoqc horngh haic nyei sic. Nqa'haav hungh diex oix bun meih mbuo mingh.

²¹“Yie yaac oix bun I^yipv Mienh taaih meih mbuo. Meih mbuo cuotv nyei ziangh hoc ziouc maiv zuqc kungx-buoz baeqc zaux nyei mingh.

²²Dauh dauh m'sieqv dorn oix zuqc tov juangc laangz juangc biauv nyei I^yipv Mienh nyei jiem siou-setv, nyaanh siou-setv, caux lui-houx bun meih mbuo nyei dorn, meih mbuo nyei sieqv zorng jienv. Hnangv naaic meih mbuo ziouc zorqv I^yipv Mienh nyei ga'naaiv guaatv jienv mingh nzengc aqv.”