Read Iu Mien Cuotv I^yipv 37 Bible Online

Cuotv I^yipv 37 - Iu Mien bible

Cuotv I^yipv 37

¹Mbe^saa^len longc da'suqv ndiangx zoux Laengz Ngaengc Waac Faang, ndaauv i ndorqc bienx, hlang ndorqc bienx, jangv ndorqc bienx,

²aengx longc jiem buang jienv ga'nyiec caux gu'nyuoz. Ninh aengx longc jiem zoux bin huing gormx.

³Ninh dox biei norm jiem-kuing dingx jienv biei jieqv faang-zaux nyei gu'nguaaic, yietc bung maaih i norm.

⁴Ninh longc da'suqv ndiangx zoux i diuh gaeng faang nyei ndiangx yaac buang jienv jiem,

⁵zorqv daaih cunx jienv faang ga'hlen nyei kuing weic gaeng faang.

⁶Ninh longc jiem zoux ceix en nyei weic wuov norm faang-nqaaix, ndaauv i ndorqc bienx, jangv ndorqc bienx.

⁷Ninh aengx longc jiem daav i dauh ke^lu^mbim an i bung faang-daauh.

⁸Yietc bung maaih dauh. Ninh yaac bun i bung faang-daauh nyei ke^lu^mbim ziangh jienv caux faang-nqaaix benx yietc kuaaiv mi'aqv.

⁹Naaiv deix i dauh ke^lu^mbim hmien doix hmien, yang ndaatv nzie jienv faang gu'nguaaic. I dauh zungv mangc jienv faang-nqaaix.

¹⁰Ninh aengx longc da'suqv ndiangx zoux norm dieh, ndaauv i ndorqc, jangv yietc ndorqc, hlang ndorqc bienx,

¹¹aengx longc jiem buang jienv dieh, yaac longc jiem zoux bin hormh gormx dieh hlen.

¹²Ninh longc jiem hormh dieh hlen faaux yietc waengh zaangv hlang, aengx longc jiem zoux bin huing gormx.

¹³Ninh aengx dox biei norm jiem-kuing dingx jienv biei norm dieh gorqv ga'hlen, dongh zaengx zaux wuov norm dorngx.

¹⁴Naaiv deix kuing dingx nitv jienv hormh dieh wuov deix dorngx weic cunx gaeng dieh nyei ndiangx.

¹⁵Gaeng dieh nyei ndiangx ninh longc da'suqv ndiangx buang jienv jiem.

¹⁶Ninh longc jiem zoux dieh nyei jaa-dorngx. Maaih bienh, domh ba'gen, nzormc, caux ciev diuv nyei nguaah baengh.

¹⁷Ninh yaac longc jiem zoux norm dang. Dang-jaax caux dang-sin ninh daav daaih. Dang nyei zaanv caux biangh nyueiz biangh ei yaac juangc naaiv ndunh jiem daav cuotv daaih.

¹⁸Dang-sin bun zoux juqv caax nquaah, yietc bung maaih buo caax.

¹⁹Naaiv deix nquaah, yietc caax maaih buo norm zaanv hnangv an^man biangh nor. Norm-norm maaih biangh nyueiz caux biangh ei. Da'nyeic caax maaih fih hnangv nyei. Yiem dang-sin cuotv nyei juqv caax fih hnangv nzengc.

²⁰Dang-sin maaih biei norm zaanv hnangv an^man biangh nor, norm-norm maaih biangh nyueiz caux biangh ei.

²¹Juqv caax nquaah, caax-caax nquaah gorn ga'ndiev maengx maaih norm biangh nyueiz.

²²Biangh nyueiz caux caax-caax nquaah, caux dang-jaax, dang-sin, juangc yietc ndunh jiem daav cuotv daaih benx yietc norm.

²³Ninh mbuo aengx longc jiem zoux siec norm dang-zaanv caux japv dang-cov nyei njiuv caux an njiuv nyei bienh.

²⁴Dang caux dang nyei jaa-sic longc nyic ziepc yietv joih[74] jiem daav daaih.

²⁵Ninh aengx longc da'suqv ndiangx zoux norm buov hung dieh, yietc ndorqc feix-bung, ndaauv yietc ndorqc, jangv yietc ndorqc, hlang i ndorqc. Biei bung gorqv nyei jorng caux dieh juangc ndongh ndiangx zoux daaih.

²⁶Gu'nguaaic maengx dieh, biei bung dieh hlen caux jorng, ninh longc jiem buang ndipc nzengc yaac longc jiem zoux bin huing gormx dieh hlen.

²⁷Ninh longc jiem aengx zoux i norm jiem-kuing dingx jienv i bung ga'hlen, bin ga'ndiev maengx, weic cunx gaeng dieh nyei ndiangx.

²⁸Ninh aengx longc da'suqv ndiangx zoux gaeng dieh ndiangx yaac buang jienv jiem.

²⁹Ninh bun dauh zoux wuom-ndaang nyei zaangc mienh peux orn mienh nyei cing-nzengc youh caux cing-nzengc hung.