Read Iu Mien Cuotv I^yipv 40 Bible Online

Cuotv I^yipv 40 - Iu Mien bible

Cuotv I^yipv 40

¹ZIOUV gorngv mbuox Mose,

²“Zih hlaax saeng-yietv wuov hnoi, oix zuqc corng Wuic Buangh nyei Ndopv-Liuh.

³Zorqv Laengz Ngaengc Waac Faang an jienv ndopv-liuh gu'nyuoz aengx zorqv ndie-mbaeqc torngv jienv.

⁴Dorh dieh bieqc daaih don jienv yaac zorqv dieh nyei jaa-sic an jienv dieh gu'nguaaic. Dorh dang-jaax bieqc daaih aengx zorqv dang-zaanv an jienv ninh mbuo nyei dorngx.

⁵Zorqv buov hung nyei jiem-dieh don jienv Laengz Ngaengc Waac Faang nza'hmien maengx, aengx zorqv mbaeqc ndopv-liuh nyei gaengh wuov kuaaiv ndie mbaeqc jienv.

⁶“Zorqv buov ziec nyei ga'naaiv nyei ziec-dorngh don jienv doix Wuic Buangh Ndopv-Liuh nyei gaengh ndaangc.

⁷Zorqv bunh don jienv ziec-dorngh caux ndopv-liuh mbu'ndongx, aengx dapv jienv wuom.

⁸Corng laatc weih jienv biei bung ndopv-liuh, aengx zorqv ndie mbaeqc jienv laatc gaengh.

⁹“Zorqv orn mienh nyei youh dox ndopv-liuh caux ndopv-liuh nyei yietc zungv jaa-sic fungx bun ZIOUV. Nyungc-nyungc ziouc cing-nzengc mi'aqv.

¹⁰Aengx longc youh dox ziec-dorngh, se buov ziec nyei ga'naaiv nyei ziec-dorngh, caux ziec-dorngh nyei yietc zungv jaa-sic, ziouc saax ziec-dorngh cing-nzengc. Ziec-dorngh ziouc gauh cing-nzengc jiex.

¹¹Bunh caux bunh nyei taapv yaac oix zuqc zorqv youh dox jienv saax cing-nzengc fungx bun yie, ZIOUV.

¹²“Dorh Aalon caux ninh nyei dorn taux ndopv-liuh nyei gaengh ndaangc, bun ninh mbuo yiem wuov longc wuom nzaaux sin.

¹³Tengx Aalon zuqv jienv zoux sai nyei cing-nzengc lui-houx, aengx zorqv youh dox jienv saax ninh cing-nzengc fungx bun yie, weic zoux sai mienh fu-sux yie.

¹⁴Dorh Aalon nyei dorn mbuo daaih bun ninh mbuo zuqv jienv gu'nyuoz wuov yiemc lui-ndaauv.

¹⁵Zorqv youh dox ninh mbuo hnangv dox ninh mbuo nyei die nor, weic bun ninh mbuo zoux sai mienh fu-sux yie. Hnangv naaiv zoux sai doic jiex doic yietc liuz nzipc jienv mingh.”

¹⁶ZIOUV hnangv haaix nor paaiv Mose zoux haaix nyungc, Mose ziouc hnangv wuov nor zoux nyungc-nyungc.

¹⁷Yiem I^yipv Deic-Bung cuotv daaih da'nyeic hnyangx, zih hlaax saeng-yietv wuov hnoi, ninh mbuo corng Wuic Buangh nyei Ndopv-Liuh aqv.

¹⁸Corng ndopv-liuh wuov zanc, Mose zorqv taapv an jienv, liepc qorng topv jienv taapv, cunx jienv gungh gangc ndiangx aengx zorqv dongc don jienv.

¹⁹Ninh zorqv ndopv-liuh gu'nyuoz wuov yiemc corng jienv, aengx gomv gu'nguaaic hnangv ZIOUV paaiv Mose wuov nor.

²⁰Ninh zorqv fiev ziepc diuh Leiz-Latc wuov deix i kuaaiv la'bieiv dapv jienv Laengz Ngaengc Waac Faang gu'nyuoz, zorqv gaeng nyei ndiangx cunx jienv i bung faang ga'hlen nyei kuing, aengx zorqv ceix en nyei weic nyei faang-nqaaix gomv jienv,

²¹dorh faang an jienv ndopv-liuh gu'nyuoz, aengx zorqv wuov kuaaiv ndie-mbaeqc mbaeqc jienv torngv Laengz Ngaengc Waac Faang, ziux ZIOUV paaiv Mose nyei waac zoux.

²²Mose dorh dieh mingh don jienv Wuic Buangh nyei Ndopv-Liuh gu'nyuoz, baqv bung maengx, mbaeqc gaengh ndie ga'nyiec maengx,

²³aengx zorqv njuov ziux yietc nyeic an wuov dieh gengx ZIOUV, ei ZIOUV gorngv nyei waac zoux.

²⁴Ninh zorqv dang-jaax an jienv Wuic Buangh Ndopv-Liuh gu'nyuoz nyei naamh bung maengx doix ziangx wuov norm dieh,

²⁵aengx diemv dang yiem ZIOUV nyei nza'hmien, ziux ZIOUV paaiv Mose nyei waac zoux.

²⁶Mose zorqv buov hung nyei jiem-dieh an jienv Wuic Buangh nyei Ndopv-Liuh gu'nyuoz, mbaeqc Laengz Ngaengc Waac Faang nyei ndie nza'hmien maengx,

²⁷aengx buov jienv hung wuov norm dieh gu'nguaaic, ziux ZIOUV paaiv Mose nyei waac.

²⁸Ninh ziouc zorqv mbaeqc ndopv-liuh nyei gaengh wuov kuaaiv ndie mbaeqc jienv.

²⁹Ninh zorqv buov ziec nyei ga'naaiv nyei ziec-dorngh an jienv Wuic Buangh Ndopv-Liuh nyei gaengh ndaangc, aengx dorh buov ziec nyei ga'naaiv caux fongc horc ziec nyei laangh ziqc an jienv ziec-dorngh buov ziec hnangv ZIOUV paaiv Mose nyei waac zoux wuov nor.

³⁰Ninh zorqv bunh an jienv Wuic Buangh nyei Ndopv-Liuh caux ziec-dorngh mbu'ndongx, aengx dapv jienv wuom longc nzaaux buoz-zaux.

³¹Mose caux Aalon nyei dorn mbuo ziouc longc naaiv norm bunh nyei wuom nzaaux buoz-zaux.

³²Ninh mbuo haaix zanc bieqc Wuic Buangh nyei Ndopv-Liuh fai mingh wuov ziec-dorngh, ninh mbuo nzaaux nzengc buoz-zaux hnangv ZIOUV paaiv Mose nyei waac nor.

³³Mose aengx weih gormx ndopv-liuh caux ziec-dorngh, aengx zorqv mbaeqc laatc gaengh nyei ndie mbaeqc jienv. Hnangv naaic, Mose zoux ziangx naaiv deix nyungc-nyungc gong.

³⁴Wuov zanc maaih mbuonx om jienv Wuic Buangh nyei Ndopv-Liuh, ZIOUV nyei njang-laangc ziouc buangv nzengc ndopv-liuh.

³⁵Mose maiv haih bieqc Wuic Buangh nyei Ndopv-Liuh weic zuqc mbuonx om jienv, yaac maaih ZIOUV nyei njang-laangc yiem buangv.

³⁶Om ndopv-liuh wuov dorv mbuonx haaix zanc siou faaux, I^saa^laa^en Mienh ziouc cuotv jauv mingh aqv.

³⁷Gorngv hnangv mbuonx maiv siou faaux nor, ninh mbuo maiv cuotv jauv mingh. Zuov taux mbuonx faaux cingx daaih cuotv jauv.

³⁸I^saa^laa^en Mienh yiem ninh mbuo nyei jauv-daauh louc mueiz, lungh hnoi zanc ninh mbuo buatc ZIOUV nyei mbuonx yiem ndopv-liuh gu'nguaaic. Lungh muonz zanc buatc douz yiem mbuonx gu'nyuoz.