Read Iu Mien Cuotv I^yipv 6 Bible Online

Cuotv I^yipv 6 - Iu Mien bible

Cuotv I^yipv 6

¹ZIOUV gorngv mbuox Mose, “Ih zanc meih oix duqv buatc yie hnangv haaix nor zoux bun Faalo Hungh. Yie oix longc yie nyei domh qaqv[11] aapv ninh bungx yie nyei baeqc fingx cuotv. Laaix yie nyei buoz nyei domh qaqv, ninh zungv oix zunc I^saa^laa^en Mienh cuotv ninh nyei deic-bung.”

²Tin-Hungh aengx mbuox Mose. “Yie se ZIOUV

³yie hinc cuotv daaih bun Apc^laa^ham, I^sakc, caux Yaakopv buatc, bun ninh mbuo hiuv duqv yie se Nernh Jiex nyei Tin-Hungh.[12] Mv baac dongh yie heuc ZIOUV wuov norm mbuox, yie maiv laauc yaangh bun ninh mbuo hiuv.

⁴Yie yaac caux ninh mbuo liepc jiez ngaengc waac, laengz zorqv Kaa^naa^an Deic-Bung jiu bun ninh mbuo, dongh zinh ndaangc ninh mbuo zoux kaeqv mienh yiem wuov norm deic-bung.

⁵Maiv daan mbuoqc naaiv. I^saa^laa^en Mienh zuqc I^yipv Mienh hoic zoux nouh kouv, njunh nyei qiex yie yaac haiz mi'aqv. Yie aengx jangx zuqc yie laengz jiex nyei ngaengc waac.

⁶“Weic naaiv meih oix zuqc mbuox I^saa^laa^en Mienh, ‘Yie se ZIOUV yaac oix dorh meih mbuo cuotv I^yipv Mienh nyei buoz-ndiev, biaux ndutv zuqc zoux nouh nyei kouv naanc. Yie oix sung cuotv yie henv haic nyei buoz jiez daaih hniev-hniev nyei dingc I^yipv Mienh nyei zuiz yaac zuoqc meih mbuo.

⁷Yie oix bun meih mbuo zoux yie ganh nyei baeqc fingx yaac oix zoux meih mbuo nyei Tin-Hungh. Meih mbuo ziouc hiuv duqv yie zoux ZIOUV, meih mbuo nyei Tin-Hungh, dongh dorh meih mbuo cuotv I^yipv Mienh hoic meih mbuo nyei kouv naanc.

⁸Yie oix dorh meih mbuo mingh taux yie caux Apc^laa^ham, I^sakc, caux Yaakopv houv jienv laengz bun ninh mbuo wuov norm deic-bung. Yie oix zorqv wuov norm deic-bung jiu bun meih mbuo, benx meih mbuo nzipc nyei buonc. Yie se ZIOUV ’+”

⁹Mose ziang naaiv deix waac mbuox I^saa^laa^en Mienh mv baac ninh mbuo maiv muangx, weic zuqc ninh mbuo ba'laqc nzauh haic, zuqc diev zoux nouh kouv cung mingh.

¹⁰ZIOUV aengx mbuox Mose,

¹¹“Mingh mbuox I^yipv Deic-Bung nyei Faalo Hungh bungx I^saa^laa^en Mienh cuotv ninh nyei deic-bung aqv.”

¹²Mv baac Mose dau ZIOUV, “I^saa^laa^en Mienh zungv maiv oix muangx yie nyei waac. Faalo Hungh fungc oix muangx? Weic zuqc yie gorngv waac maiv mbiaangc.”

¹³ZIOUV mbuox Mose caux Aalon, “Oix zuqc gorngv mbuox I^saa^laa^en Mienh caux I^yipv Deic-Bung nyei Faalo Hungh, ZIOUV paaiv meih mbuo i dauh dorh I^saa^laa^en Mienh cuotv I^yipv Deic-Bung.”

¹⁴Naaiv se I^saa^laa^en Mienh nyei bungh buonc bieiv zeiv nyei mbuox. Yaakopv[13] nyei dorn-hlo, Lu^mben, maaih biei dauh dorn, mbuox heuc Haanokv, Banlu, Hetv^lon, caux Kaanmi. Naaiv deix se Lu^mben nyei bungh buonc.

¹⁵Si^me^on maaih juqv dauh dorn, mbuox heuc Ye^mu^en, Yaamin, O^haatc, Yaakin, So^haax, Saa^un. Saa^un se ninh nyei Kaa^naa^an Mienh auv yungz nyei dorn. Naaiv deix zoux Si^me^on nyei bungh buonc.

¹⁶Naaiv se Lewi nyei dorn yietc doic jiex yietc doic nyei mbuox. Lewi maaih buo dauh dorn, mbuox heuc Geson, Ko^haatv caux Me^laa^li. Lewi nyei hnyangx-jeiv ziangh duqv yietc baeqv faah ziepc cietv hnyangx.

¹⁷Geson nyei dorn ziux ninh mbuo nyei bungh buonc heuc Lipv^ni caux Si^me^i.

¹⁸Ko^haatv maaih biei dauh dorn, mbuox heuc Amlaam, Itc^haa, He^mbo^lon, Utc^si^en. Ko^haatv nyei hnyangx-jeiv ziangh duqv yietc baeqv faah ziepc faam hnyangx.

¹⁹Me^laa^li maaih i dauh dorn, mbuox heuc Maali caux Musi. Naaiv se Lewi nyei bungh buonc ei jienv ninh mbuo nyei douh zong.

²⁰Amlaam longc ninh nyei die nyei muoc, Yo^ke^mbetc. Yo^ke^mbetc yungz duqv Aalon caux Mose bun Amlaam. Amlaam nyei hnyangx-jeiv ziangh duqv yietc baeqv faah ziepc cietv hnyangx.

²¹Itc^haa maaih buo dauh dorn, mbuox heuc Kolaa, Nefekv caux Sikc^li.

²²Utc^si^en yaac maaih buo dauh dorn, mbuox heuc Mi^saa^en, En^saa^faan caux Sitc^li.

²³Aalon longc Am^mi^naa^ndapc nyei sieqv, Naason nyei muoc, E^li^qe^mbaa. E^li^qe^mbaa yungz duqv Naa^ndapc, Aa^mbi^hu, E^le^aa^saa caux I^taa^maa.

²⁴Kolaa maaih buo dauh dorn, mbuox heuc Atc^si, En^kaa^naa, caux Aa^mbi^yaa^saapc. Naaiv deix zoux Kolaa nyei bungh buonc.

²⁵Aalon nyei dorn, E^le^aa^saa, longc dauh Bu^ti^en nyei sieqv. Wuov dauh sieqv yungz duqv dauh dorn, mbuox heuc Fi^ne^hatc, bun ninh. Naaiv se Lewi Mienh nyei bungh buonc bieiv zeiv.

²⁶Aalon caux Mose, dongh naaiv deix i dauh aqv, ZIOUV gorngv mbuox ninh mbuo, “Oix zuqc dorh fingx-fingx I^saa^laa^en Mienh yietc guanh yietc guanh nyei cuotv I^yipv Deic-Bung.”

²⁷Mingh mbuox I^yipv Deic-Bung nyei Faalo Hungh bungx I^saa^laa^en Mienh cuotv se dongh naaiv deix i dauh, Mose caux Aalon.

²⁸Mose yiem I^yipv Deic-Bung wuov zanc ZIOUV mbuox ninh,

²⁹“Yie se ZIOUV. Yie gorngv nyei yietc zungv waac meih oix zuqc douc mingh mbuox I^yipv Hungh, Faalo.”

³⁰Mv baac Mose dau, “Yie gorngv waac maiv mbiaangc. Hungh diex fungc oix muangx yie?”