Read Iu Mien Yopv 12 Bible Online

Yopv 12 - Iu Mien bible

Yopv 12

¹Yopv ziouc dau,

²“Zeiz aqv, meih mbuo za'gengh guai haic nyei mienh.[44] Cong-mengh yaac oix caux meih mbuo yietc njiec daic.

³Mv baac yie yaac maaih cong-mengh caux meih mbuo fih hnangv nyei. Yie maiv gauh aiv meih mbuo. Meih mbuo gorngv naaiv deix sic fungc maaih haaix dauh maiv hiuv laeh?

⁴“Yie benx yie nyei doic jatv nyei ga'naaiv. Zinh ndaangc yie jouh Tin-Hungh, ninh yaac dau yie. Yie se baengh fim, maiv lamh nqemh dorngx nyei mienh, yaac zuqc mienh jatv aqv.

⁵Orn-lorqc nyei mienh yiem hnyouv mangc piex zuqc zeqc naanc nyei mienh, zeqc naanc zungv zuov jienv zaux mbaqc piatv nyei mienh.

⁶Janx-zaqc nyei ndopv-liuh baengh orn nyei, cuoqv Tin-Hungh nyei mienh yiem duqv wuonv, maiv gunv ninh mbuo longc ganh nyei qaqv dorngx zienh.[45]

⁷“Gunv naaic saeng-kuv, saeng-kuv ziouc njaaux meih. Naaic yiem lungh nyei norqc, ninh mbuo ziouc mbuox meih.

⁸Caux ndau gorngv waac, ndau ziouc njaaux meih, yiem koiv nyei mbiauz yaac oix zunh mengh mbuox meih.

⁹Yiem naaiv deix yietc zungv maaih haaix nyungc maiv hiuv duqv ZIOUV nyei buoz hnangv naaiv zoux?

¹⁰Da'faanh ziangh jienv maaih maengc nyei ga'naaiv caux zuangx baamh mienh tauv nyei qiex yiem ninh nyei buoz.

¹¹M'normh maiv zeiz haih seix waac hnangv mbietc[46] seix nyanc hopv nyei mueix fai?

¹²Mienh gox mienh maaih cong-mengh. Siouc nyuonh ndaauv nyei mienh gauh haih bieqc hnyouv.

¹³“Tin-Hungh maaih cong-mengh caux qaqv. Ninh maaih za'eix yaac haih bieqc hnyouv.

¹⁴Tin-Hungh caeqv nyei, maiv maaih haaix dauh haih ceix jiez. Ninh wuonx mienh, maiv maaih haaix dauh haih bungx.

¹⁵Se gorngv ninh dangv jienv wuom, wuom ziouc nqaai. Se gorngv ninh bungx wuom cuotv, wuom ziouc yiemx ndau-beih.

¹⁶Tin-Hungh maaih qaqv, maaih cong-mengh, zuqc nduov nyei caux nduov mienh nyei mienh yiem ninh nyei buoz-ndiev.

¹⁷Ninh se zorqv nzengc caangh laangh mienh nyei cong-mengh,[47] yaac bun siemv zuiz jien benx ga'naaiv-hngongx.

¹⁸Ninh jaiv nqoi hungh diex ndoh mienh nyei limc,[48] aengx longc hlaang sai jienv hungh nyei jaaiv.

¹⁹Ninh zorqv sai mienh laengh gaengv nyei dorh mingh,[49] yaac mbienv maaih lingc maaih qaqv nyei mienh.

²⁰Ninh bun ziepc zuoqv nyei mienh[50] sekv nzieqc, maiv haih gorngv waac, yaac zorqv nqoi mienh gox nyei cong-mengh.

²¹Ninh mangc piex zoux hlo nyei mienh, yaac zorqv nqoi henv wuov deix nyei qaqv.[51]

²²Ninh bun yiem ndo, hmuangx nyei sic hinc cuotv, yaac dorh mapv hmuangx nyei dorngx[52] bieqc njang.

²³Ninh bun guoqv henv, yaac mietc ninh mbuo. Ninh bun baeqc fingx hiaangx camv, aengx guaatv ninh mbuo mingh.

²⁴Ninh zorqv lungh ndiev baeqc fingx nyei bieiv zeiv nyei cong-mengh mingh mi'aqv, yaac bun ninh mbuo youh jienv gan maiv maaih jauv nyei deic-bung-huaang mingh.

²⁵Ninh mbuo yiem hmuangx gu'nyuoz huaax jienv mingh, maiv maaih njang. Ninh yaac bun ninh mbuo lungh lungh laih laih hnangv diuv nquin nyei mienh nor.