Read Iu Mien Yopv 13 Bible Online

Yopv 13 - Iu Mien bible

Yopv 13

¹“Naaiv deix yietc zungv sic yie nyei m'zing duqv buatc jiex, yie nyei m'normh duqv haiz jiex yaac mengh baeqc.

²Meih mbuo hiuv nyei, yie yaac hiuv. Yie maiv gauh aiv meih mbuo.

³Mv baac yie oix caux Nernh Jiex Wuov Dauh gorngv waac, yie oix caux Tin-Hungh luonx leiz.

⁴Meih mbuo longc gorngv-baeqc nyei waac nzaatv jienv[53] meih mbuo maiv hiuv nyei. Meih mbuo se hnangv maiv lamh longc nyei ndie-sai.

⁵Feix duqv meih mbuo sekv nzieqc nyei. Naaiv ziouc benx meih mbuo nyei cong-mengh aqv.

⁶“Ih zanc tov muangx yie luonx nyei jauv yaac muangx yie sux nyei waac.

⁷Meih mbuo oix weic Tin-Hungh gorngv jaav nyei waac fai? Meih mbuo oix weic ninh gorngv-baeqc?

⁸Meih mbuo oix tengx Tin-Hungh wuov bung nzaeng fai? Meih mbuo oix weic ninh luonx leiz?

⁹Se gorngv ninh zaah mangc meih mbuo, meih mbuo haih duqv longx fai? Meih mbuo haih nduov Tin-Hungh hnangv mienh nduov mienh fai?

¹⁰Se gorngv meih mbuo bingx jienv tengx yietc bung, ninh ndongc haaix zungv oix gorngv-hemx meih mbuo.

¹¹Ninh nyei haangh daauh bun meih gamh nziex, zungv haeqv meih mbuo mau nzengc saah?

¹²Meih mbuo nyei waac-puix hnangv saaiv maiv lamh longc, meih mbuo luonx nyei leiz ndongc wuom-bamc[54] mau nor.

¹³“Tov meih mbuo sekv dangh maah! Yie oix gorngv. Nqa'haav maiv gunv benx haaix nyungc, sueih yie benx aqv.

¹⁴Maiv gunv hnangv haaix nor yie oix zoux aqv, yie maiv funx maengc nyei gorngv.[55]

¹⁵Maiv gunv ninh daix yie, yie corc maaih lamh hnamv,[56] mv baac yie yaac oix yiem ninh nyei nza'hmien biux mengh yie nyei jauv.

¹⁶Naaiv oix benx yie nyei njoux en, weic zuqc maiv taaih Tin-Hungh nyei mienh maiv duqv mingh yiem ninh nyei nza'hmien.

¹⁷“Tov longx-longx nyei muangx yie gorngv nyei waac, yaac bun yie sux nyei waac bieqc meih nyei m'normh.

¹⁸Yie liuc leiz ziangx yie nyei sic aqv. Yie hiuv duqv zungv biux mengh yie maiv dorngc.

¹⁹Maaih haaix dauh oix gox yie? Maaih nor, yie ziouc sekv yaac daic.

²⁰“Kungx tov bun i nyungc yie hnangv, yie ziouc maiv bingx meih nyei hmien.

²¹Tov hluotv meih nyei buoz leih go yie, yaac tov maiv dungx zoux gamh nziex nyei sic haeqv yie.

²²Tin-Hungh aac, gunv heuc, yie ziouc dau. Fai bun yie gorngv, meih yaac dau yie.

²³Yie nyei zuiz caux zoux dorngc nyei sic maaih mbu'ziex? Tov bun yie hiuv duqv yie zoux dorngc nyei jauv caux yie baamz nyei zuiz.

²⁴“Meih weic haaix diuc bingx meih nyei hmien, yaac funx yie zoux meih nyei win-wangv?

²⁵Meih oix haeqv yietc kuaaiv zuqc nziaaux buonc nyei ndiangx-normh yaac zunc mbiauh nqaauv nqaai fai?

²⁶Meih fiev jienv hniev haic nyei sic[57] gox yie, aengx bun yie ndaam-dorng yie lunx nyei ziangh hoc zoux nyei zuiz.

²⁷Meih zorqv ndiangx gapc jienv yie nyei zaux, aengx mangc jienv yie nyei diuh diuh jauv meih yaac dingc ziangx yie nyei zaux-benv caaiv duqv taux nyei dorngx.

²⁸“Mienh gunv zoux gunv zitc hnangv ga'naaiv-huv, hnangv zuqc gaeng ngaatc waaic nyei lui-houx.