Read Iu Mien Yopv 14 Bible Online

Yopv 14 - Iu Mien bible

Yopv 14

¹“Mienh yiem m'sieqv dorn cuotv seix nyei hnoi-nyieqc zoqc nyei, kungx maaih kuonx naanh buangv nzengc.

²Ninh cuotv daaih hnangv biangh nor, yaac ziec mi'aqv. Ninh hnangv dongh linh nor jiex, maiv yiem aqv.

³Hnangv yie naaiv nyungc mienh meih bungx m'zing mangc jienv ninh aengx dorh ninh[58] daaih yiem meih nyei nza'hmien zuqc siemv fai?

⁴Haaix dauh haih dorh cing-nzengc nyei ga'naaiv yiem maiv cing-nzengc nyei ga'naaiv cuotv? Maiv maaih yietc dauh.

⁵Ninh ziangh nyei hnoi-nyieqc jaa-ndaangc dingc ziangx aqv, ninh nyei hlaax-soux se yiem meih dingc. Meih dingc ziangx ninh ziangh nyei soux mouc, ninh yaac maiv haih jiex ndaangc.

⁶Tov huin ganh bung, maiv dungx mangc ninh weic bun ninh duqv henh, bun ninh a'hneiv hnangv maaic gong mienh jiex yietc norm hnoi.

⁷“Se gorngv ndiangx zuqc goix, corc maaih lamh hnamv haih cuotv cunx. Cunx yaac ndaauv jienv mingh, maiv dingh aqv.

⁸Maiv gunv ninh nyei nzungh yiem ndau-ndiev gox, ninh nyei gorn yiem ndau daic,

⁹yietv duqv wuom nyei qiex ninh ziouc cuotv cunx, yaac cuotv nquaah hnangv ndiangx-lunx nor.

¹⁰Mv baac mienh daic, bueix jienv zaqc nyei. Ninh dangx qiex ninh ziouc yiem haaix?

¹¹Hnangv koiv nyei wuom nqaai, ndaaih nyei wuom haapv yaac nqaai,

¹²mienh daic mingh[59] maiv aengx nangh daaih, taux lungh jiex nzengc ninh maiv nyie, nqamv ninh, ninh yaac maiv haih nyie.

¹³“Feix duqv meih zorqv yie bingx jienv yiemh gen. Feix duqv meih torngv jienv yie, zuov meih nyei ga'qiex fiu. Feix duqv meih dingc ziangx ziangh hoc weic jangx yie.

¹⁴Se gorngv mienh daic mingh, ninh aengx haih nangh daaih fai? Yie zuov jienv naaiv deix yietc zungv[60] nyei hnoi-nyieqc jiex, taux yie duqv bungx nqoi nyei ziangh hoc.

¹⁵Meih oix heuc, yie ziouc dau meih. Meih oix a'hneiv duqv buatc meih nyei buoz zoux daaih nyei ga'naaiv.

¹⁶Taux wuov zanc[61] meih oix saauv yie nyei zaux-mbiec, mv baac meih maiv zuov jienv zorqv yie zoux dorngc nyei zuiz.

¹⁷Yie zoux dorngc nyei sic meih dapv jienv mbuoqc aengx mborqv jienv yienx. Meih yaac buang jienv yie nyei zuiz.

¹⁸“Mv baac mbong mbaang huv mi'aqv. La'bieiv-zorng yaac suiv nqoi leih ninh nyei dorngx.

¹⁹Wuom congx la'bieiv, la'bieiv ziouc jie nzengc, domh mbiungc yaac guaatv ndau-beih nyei nie mingh. Meih fih hnangv nyei mietc baamh mienh maaih lamh hnamv nyei dorngx.

²⁰Meih yietc liuz hingh jiex mienh, ninh ziouc guei seix mi'aqv. Meih tiuv ninh nyei hmien yaac bun ninh mingh mi'aqv.

²¹Ninh nyei dorn mbuo duqv mienh taaih, ninh yaac maiv hiuv. Ninh mbuo ndortv njiec aiv, ninh yaac maiv buatc.

²²Ninh kungx haiz ninh ganh nyei sin zaangc mun, yaac weic ninh ganh nzauh nyiemv.”