Read Iu Mien Yopv 15 Bible Online

Yopv 15 - Iu Mien bible

Yopv 15

¹Temaan Mienh, E^li^fatv, dau Yopv,

²“Cong-mengh mienh longc maiv lamh longc nyei wuonh zaang dau, yaac bun dong bung nyei nziaaux buangv nzengc ziangh sin se horpc nyei fai?

³Ninh longc maiv maaih eix leiz nyei waac fai tengx maiv duqv haaix nyungc nyei waac jaiv sin fai?

⁴Mv baac taaih Tin-Hungh wuov nyungc hnyouv meih guangc mi'aqv, yaac dangv jienv maiv duqv yiem Tin-Hungh nyei nza'hmien fei-fangv nyei jauv.

⁵Weic zuqc meih nyei zuiz njaaux meih nyei nzuih gorngv waac, meih yaac ginv longc guv guaix mienh nyei mbietc.

⁶Meih ganh nyei nzuih dingc meih zoux dorngc, maiv zeiz yie. Meih ganh nyei joux-joux waac[62] zoux zorng-zengx gox meih.

⁷“Meih dongh cuotv seix ndaangc nyei daauh dauh baamh mienh fai? Meih cuotv seix ndaangc Tin-Hungh zeix mbong fai?

⁸Tin-Hungh caangh laangh nyei wuic gapv zunv nyei ziangh hoc meih haiz nyei fai? Meih liouh jienv cong-mengh weic meih ganh longc fai?

⁹Maaih haaix nyungc meih hiuv, yie mbuo maiv hiuv? Maaih haaix nyungc meih mengh baeqc, yie mbuo maiv mengh baeqc?

¹⁰Yiem yie mbuo mbu'ndongx maaih mba'biei baeqc nyei mienh caux hnyangx-jeiv gox nyei mienh, zungv gauh gox meih nyei die.

¹¹Tin-Hungh longc suonc nyei waac orn meih nyei hnyouv. Meih haiz se maiv gaengh gaux fai?

¹²Meih weic haaix diuc sueih ganh nyei hnyouv, meih nyei m'zing weic haaix diuc cuotv douz,

¹³bun meih nyei hnyouv ngaengc Tin-Hungh yaac bun naaiv nyungc waac yiem meih nyei nzuih cuotv?

¹⁴“Baamh mienh hnangv haaix nor ninh cingx daaih haih cing-nzengc? Fai yiem m'sieqv dorn cuotv seix nyei mienh hnangv haaix nor haih benx zoux horpc nyei mienh?

¹⁵Tin-Hungh zungv maiv bungx hnyouv ninh nyei cing-nzengc fin-mienh.[63] Ziux Tin-Hungh mangc, lungh yaac maiv cing-nzengc.

¹⁶Wuov nyungc waaic haic, youx haic nyei mienh, se hopv zuiz dorngx wuom nyei mienh, gauh fatv maiv haih cing-nzengc.

¹⁷“Muangx yie maah! Yie oix mbuox meih. Yie buatc jiex nyei, yie oix gorngv,

¹⁸dongh cong-mengh mienh gorngv jiex, yiem ninh mbuo nyei ong-taaix nzipc jienv daaih yaac maiv bingx.

¹⁹(Naaiv norm deic-bung kungx ninh mbuo ganh duqv nzipc, yaac maiv maaih ganh fingx mienh yangh ninh mbuo mbu'ndongx jiex.)

²⁰Orqv mienh yiem seix zaangc nyei yietc zungv hnoi-nyieqc zuqc siouc kouv. Se zeix mienh nyei mienh waaic mienh ziux ninh nyei yietc zungv hnyangx-soux.

²¹Za'gengh! gamh nziex haic nyei qiex yiem ninh nyei m'normh, baengh orn nyei ziangh hoc, janx-zaqc ziouc daaih caangv aqv.

²²Ninh maiv sienx ninh haih yiem hmuangx gu'nyuoz nzuonx. Ninh zungv oix zuqc nzuqc ndaauv daix.

²³Ninh youh jienv mingh lorz nyanc yaac gorngv, ‘Yiem haaix maaih nyanc hopv?’[64] Ninh hiuv duqv hmuangx nyei hnoi-nyieqc yiem ninh nyei buoz ga'hlen.

²⁴Ninh oix zuqc zeqc naanc kuonx kouv bun ninh gamh nziex, yaac hingh jiex ninh hnangv hungh diex liuc leiz mborqv jaax nor.

²⁵Weic zuqc ninh nyuotv buoz-juonh[65] bun Tin-Hungh, yaac ngaengc jienv Nernh Jiex Wuov Dauh,

²⁶ziouc nanv jienv hoz nyei torngv-baaih ngaengc jienv bieqc mingh mborqv ninh.

²⁷“Weic zuqc ninh nyei hmien junc haic, ninh nyei jaaiv benx orv-junc,

²⁸ninh duqv yiem zingh huaang, yiem mienh maiv horpc zuqc yiem nyei biauv, se dingc daaih oix zuqc benx mbaang waaic nyei ga'naaiv-ndui.

²⁹Ninh ziouc maiv duqv butv zoih. Ninh nyei zinh zoih yaac maiv duqv yiem lauh. Ninh nyei jaa-dingh maiv duqv yiem deic-bung hiaangx.[66]

³⁰Mienh biaux maiv ndutv hmuangx. Douz yaac oix buov nqaai ninh nyei cunx. Tin-Hungh nyei qiex yaac oix biomv ninh mingh mi'aqv.[67]

³¹Maiv dungx bun ninh kaux maiv lamh longc nyei haaix nyungc nduov ganh, weic zuqc maiv lamh longc nyei oix winh nzuonx bun ninh.

³²Ninh nyei hnoi-nyieqc maiv gaengh taux ninh ziouc zuqc winh sung,[68] ninh nyei nquaah yaac maiv maeng aqv.

³³Ninh yaac hnangv a'ngunc hmei maiv gaengh zuoqc nyei biouv bioh ndortv nzengc, yaac hnangv ga'lanv ndiangx nyei biangh nqoi daaih bioh mi'aqv.

³⁴Maiv taaih Tin-Hungh wuov deix maiv maaih hoz doic zeiv-fun,[69] a'hneiv kaux nyaanh hmuangx wuov deix nyei ndopv-liuh yaac oix zuqc douz buov qui.

³⁵Ninh mbuo hnamv cuotv orqv sic hnangv maaih gu'nguaaz faaux sin, yungz cuotv benx waaic sic hnangv. Ninh mbuo nyei hnyouv liuc leiz nduov mienh.”