Read Iu Mien Yopv 16 Bible Online

Yopv 16 - Iu Mien bible

Yopv 16

¹Yopv ziouc dau,

²“Naaiv nyungc waac yie haiz camv! haic aqv. Meih mbuo dauh dauh oix orn hnyouv mv baac meih mbuo bun mienh jaa nzauh.

³Meih maiv dingh maiv hitv nyei gorngv waac maiv haih jomc fai? Maaih haaix nyungc cuoqv zuqc meih dau waac?

⁴Se gorngv meih mbuo caux yie tiuv dorngx yiem, yie mv baac haih gorngv hnangv meih mbuo nor. Yie haih borqv jienv yietc kang jiex yietc kang nyei waac gorngv meih mbuo, aengx dorng jienv meih mbuo huangx m'nqorngv.

⁵Mv baac yie haih longc yie nyei nzuih ceix meih mbuo henv jiez daaih, yie nyei nzuih meix yaac oix orn meih mbuo nyei you-nzauh.

⁶“Maiv gunv yie gorngv waac, yie mun nyei jauv maiv sienc. Se gorngv yie nyienz jienv maiv gorngv, yie mun nyei dorngx maiv haih gauh longx.

⁷Tin-Hungh aac, ih zanc meih zungv bun yie kuonx kouv. Meih bun yie nyei biauv zong mienh[70] zuqc baaic nzengc.

⁸Meih bun yie soqv, jaic nzengc, yie ndongc naaiv jaic ziouc zoux zorng-zengx gox yie.

⁹Tin-Hungh qiex jiez jienv betv yie yaac nzorng yie, dorng jienv yie ngaatc nyaah. Yie nyei win-wangv njatc m'zing mangc yie.

¹⁰Ninh mbuo morngx nzuih bun yie. Ninh mbuo mbaix yie nyei hmien huotv yie. Ninh mbuo gapv zunv daaih oix zoux bun yie.

¹¹Tin-Hungh zorqv yie jiu bun orqv mienh, yaac zoi yie yiem mienh waaic mienh nyei buoz-ndiev.

¹²Yie kuh yiem nyei ziangh hoc ninh zorqv yie wuotv nauv. Ninh nanv jienv yie nyei jaang guaeqv yie muonc nzengc. Ninh zorqv yie zoux ninh nyei mbaeqc.

¹³Ninh nyei buonv juang-zinx mienh weih gormx yie. Ninh buonv tong[71] yie nyei nyutc zeiv yaac maiv korv-lienh, yaac dox yie nyei daamv cuotv njiec ndau.

¹⁴Ninh mborqv yie yietc nzunc jiex yietc nzunc, ninh tiux daaih mborqv hnangv mborqv jaax henv nyei baeng.

¹⁵“Yie lunh la'maah ndie-cou nitv jienv yie nyei ndopv, yie suei nzengc ziouc bueix jienv nie-mbung.[72]

¹⁶Weic zuqc yie nyiemv, hmien siqv nzengc, m'zing-ndopv yaac hmuangx,

¹⁷maiv gunv yie nyei buoz maiv zoux haaix nyungc doqc, yie daux gaux nyei waac yaac cing-nzengc.

¹⁸“Ndau aah! Maiv dungx buang yie nyei nziaamv. Maiv dungx bun yie heuc nyei qiex maaih dorngx hitv.

¹⁹Ih zanc maaih dauh yiem tin-dorngh tengx yie zoux zorng-zengx, beu yie wuov dauh yiem hlang nyei dorngx.

²⁰Yie nyei loz-gaeng doic huotv yie, yie nyei m'zing liouc wuom-mueic bun Tin-Hungh.

²¹Tov bun ninh tengx mienh jouh Tin-Hungh, hnangv mienh tengx ninh nyei loz-gaeng doic jouh nor.

²²“Weic zuqc aengx jiex liuz i ziex hnyangx, yie ziouc gan maiv nzuonx nyei jauv mingh.