Read Iu Mien Yopv 17 Bible Online

Yopv 17 - Iu Mien bible

Yopv 17

¹“Yie nyei mba'nziu yuqc, yie nyei hnoi-nyieqc yaac jiex mi'aqv. Zouv yaac zuov jienv yie.[73]

²Zien nyei, maaih jatv yie nyei mienh weih gormx yie, yie nyei m'zing yaac mangc jienv ninh mbuo cuoqv yie.

³“Tin-Hungh aac, tov meih zoux buv-jaa beu yie. Cuotv liuz meih, maaih haaix dauh oix weic yie zoux buv-jaa?

⁴Meih bun ninh mbuo nyei hnyouv maiv haih mengh baeqc. Weic naaiv meih ziouc maiv bun ninh mbuo hingh jiex.

⁵Mienh maaic ganh nyei gorx-youz weic duqv zinh nyaanh, ninh nyei fu'jueiv oix zuqc siouc kouv.[74]

⁶“Tin-Hungh bun yie yiem baeqc fingx mbu'ndongx zoux gouv gorngv. Ninh mbuo yaac tuiv wuom-nzuih naetv yie nyei hmien.

⁷Laaix nzauh kouv yie nyei m'zing maiv njang aqv. Yie nyei buoz-zaux hnangv dongh linh nor.

⁸Hnyouv zingx nyei mienh laaix naaiv deix sic za'gengh! gamh nziex haic. Maiv zoux dorngc nyei mienh jiez daaih gorngv yie maiv gan Tin-Hungh.

⁹Kuv mienh gan longx ninh yangh nyei jauv. Buoz cing-nzengc nyei mienh gunv zoux gunv henv jienv faaux.

¹⁰“Mv baac meih mbuo, se meih mbuo yietc zungv, gunv aengx daaih nzunc. Yiem meih mbuo mbu'ndongx yie zungv lorz maiv buatc yietc dauh cong-mengh mienh.

¹¹“Yie nyei hnoi-nyieqc jiex mi'aqv. Yie daav nyei za'eix, se yiem hnyouv hnamv nyei, dangx mi'aqv.

¹²Yie nyei loz-gaeng doic[75] bun lungh muonz zanc benx lungh hnoi zanc. Ninh mbuo gorngv, ‘Njang se nitv fatv hmuangx.’

¹³Se gorngv yie maaih lamh hnamv yiemh gen benx yie nyei biauv, se gorngv yie bueix njiec hmuangx nyei dorngx,[76]

¹⁴se gorngv yie mbuox zouv, ‘Meih zoux yie nyei die,’ yaac mbuox gaeng-mau, ‘Meih se yie nyei maa,’ fai ‘Yie nyei dorc,’

¹⁵wuov nyungc yie maaih lamh hnamv nyei yiem haaix? Yie maaih lamh hnamv nyei haaix dauh duqv buatc?

¹⁶Yie maaih lamh hnamv nyei oix njiec taux yiemh gen nyei gaengh fai? Yie mbuo lomh nzoih oix njiec nie-mbung fai?”