Read Iu Mien Yopv 18 Bible Online

Yopv 18 - Iu Mien bible

Yopv 18

¹Quwaa Mienh, Mbin^ndatc, dau,

²“Meih[77] oix gorngv naaiv gorngv wuov ndongc haaix lauh? Hnamv longx maah! Yie mbuo ziouc caux meih gorngv waac.

³Weic haaix diuc funx yie mbuo hnangv saeng-kuv? Ziux meih mangc, yie mbuo benx ga'naaiv-hngongx fai?

⁴Meih qiex jiez hoic ganh mun[78] nyei mienh aah! Ndau-beih laaix meih oix zuqc guangc benx ndau-huaang fai? La'bieiv oix zuqc suiv nqoi ninh nyei dorngx fai?

⁵“Orqv mienh nyei njang zungv zuqc hnangv dang nor daic mi'aqv. Ninh nyei douz-mbietc yaac maiv ziux njang.

⁶Yiem ninh nyei ndopv-liuh nyei njang benx hmuangx, yiem ninh gu'nguaaic nyei dang yaac daic mi'aqv.

⁷Ninh henv nyei zaux-mbiec ih zanc laamx duqv nangv. Ninh ganh daav nyei za'eix zungv hoic ninh ndiqv zuqc ndorpc.

⁸Ninh ganh nyei zaux dorh ninh mingh zuqc mungz nzenc, ninh yangh zaeng hlaang nyei kuotv jiex.

⁹Hlaang ziouc hlopv jienv ninh nyei zaux-nqo, aengx naeqc jienv zietc nyei.

¹⁰Maaih hlaang weic ninh bingx jienv ga'ndiev ndau, zaeng jienv yiem ninh yangh nyei jauv.

¹¹Haeqv ninh gamh nziex haic nyei sic weih jienv biei bung, yaac zunc jienv ninh nyei zaux-nqo mingh.

¹²Laaix ngorc, ninh nyei qaqv piex jienv njiec. Zeqc naanc yiem ninh nyei ga'hlen zuov jienv ninh.

¹³Ninh nyei ndopv butv ciouv nyei baengc huv nzengc. Doqc haic nyei wuon-baengc naqv ninh nyei buoz-zaux.

¹⁴Yiem ninh kaux nyei ndopv-liuh ninh zuqc baeng cuotv, aengx zuqc dorh mingh taux gamh nziex haic nyei hungh diex.

¹⁵Dongh maiv zeiz ninh nyei ga'naaiv yiem ninh nyei ndopv-liuh, yaac maaih hungh[79] hiaamx jienv ninh yiem nyei dorngx.

¹⁶Ninh nyei nzungh nqaai mingh, ninh nyei nquaah nyaux nzengc.

¹⁷Yiem lungh ndiev maiv maaih haaix dauh jangx ninh, yiem deic-bung[80] ninh nyei mbuox zutc mi'aqv.

¹⁸Ninh yiem njang zuqc zunc bieqc hmuangx gu'nyuoz, se zuqc zunc cuotv yaangh gen.

¹⁹Yiem ninh nyei douh zong maiv maaih ninh nyei hoz doic zeiv-fun. Ninh yiem jiex nyei dorngx maiv maaih yietc dauh cuotv singx maengc.

²⁰Fai bung mienh muangx haiz ninh nyei setv mueiz zuqc nyei sic ziouc hnyouv waaic nzengc. Dong bung mienh yaac gamh nziex haic aqv.

²¹Orqv mienh yiem nyei dorngx zungv hnangv naaiv. Maiv hiuv Tin-Hungh nyei mienh yaac hnangv naaiv aqv.”