Read Iu Mien Yopv 19 Bible Online

Yopv 19 - Iu Mien bible

Yopv 19

¹Yopv ziouc dau,

²“Meih mbuo oix zoux bun yie nyei hnyouv kouv, yaac longc waac morc yie ndongc haaix lauh?

³Meih mbuo gorngv doqc yie maiv zeiv ziepc nzunc aqv. Meih mbuo dorngc yie, meih mbuo maiv nyaiv fai?

⁴Se gorngv yie za'gengh zoux dorngc, yie zoux dorngc nyei kungx ndortv zuqc yie ganh hnangv.

⁵Se gorngv meih mbuo ceng meih mbuo ganh gauh hlo yie, yaac funx yie buangh nyei kouv naanc bun cing yie zoux dorngc,

⁶wuov nyungc meih mbuo oix zuqc hiuv duqv se Tin-Hungh hnangv naaiv zoux bun yie, yaac longc ninh nyei mungz nzenc jienv yie.

⁷“Yie heuc jienv gorngv, ‘Zuqc zoux doqc aav loh!’ yaac maiv maaih haaix dauh dau. Yie heuc jienv tov tengx, mv baac maiv duqv baengh fim nyei jauv.

⁸Tin-Hungh dangv jienv yie nyei jauv yie ziouc jiex maiv duqv. Ninh yaac bun yie nyei jauv hmuangx mingh.

⁹Ninh zorqv nqoi yie nyei njang-laangc, yaac zorqv nqoi yie ndongx nyei ningv.

¹⁰Ninh weih jienv yie biei bung mborqv yie, yie ziouc baaic nzengc mi'aqv. Yie maaih lamh hnamv nyei, ninh baeng cuotv hnangv baeng diuh ndiangx nor.

¹¹Ninh qiex jiez, nouz haic yie, yaac funx yie benx ninh nyei win-wangv.

¹²Ninh nyei jun-baeng guanh lomh nzoih daaih. Ninh mbuo liuc leiz jauv mborqv yie, yaac liepc ciangv weih gormx yie.

¹³Tin-Hungh bun yie nyei gorx-youz guangc yie, dongh yie zuoqc nyei mienh maiv laengz yie aqv.

¹⁴Yie nyei cien-ceqv leih nqoi yie, yie nyei loz-gaeng doic la'kuqv yie mi'aqv.

¹⁵Yiem yie nyei biauv nyei kaeqv mienh caux m'sieqv bou funx yie zoux ga'nyiec nyei mienh. Ziux ninh mbuo nyei m'zing mangc, yie zungv benx ganh fingx mienh.

¹⁶Yie heuc yie nyei bou mv baac ninh maiv dau, yie oix zuqc longc nzuih jouh ninh mbuo.

¹⁷Yie nyei auv youx yie nyei nzuih nyei qiex. Yie ganh nyei cien gorx cien youz[81] gamh nziev yie.

¹⁸Liemh faix nyei fu'jueiv mangc piex yie. Yie jiez sin ninh mbuo gorngv yie.

¹⁹Yie zuoqc jiex nyei yietc zungv loz-gaeng doic youx yie, dongh yie hnamv nyei mienh yaac mbienv hmien bun yie.

²⁰Yie nyei ndopv naetv jienv mbungv, yie biaux cuotv singx maengc ndongc yietc norm hmeiv-nauv.[82]

²¹“Loz-gaeng aah! Korv-lienh yie maah! Tov korv-lienh yie, weic zuqc Tin-Hungh nyei buoz mborqv yie.

²²Meih mbuo weic haaix diuc oix hoic yie hnangv Tin-Hungh hoic? Meih mbuo corc zoux doqc bun yie maiv gaengh gaux?

²³“Feix duqv yie gorngv nyei waac duqv fiev jienv, feix duqv faaux jienv yiem sou-daan.

²⁴Feix duqv longc hlieqv-jaa-sic zuqc la'bieiv, aengx longc jungz dox zuqc liuz nyei dorngx, bun yietc liuz yiem.

²⁵Weic zuqc yie hiuv duqv Zuoqc yie Wuov Dauh ziangh jienv, setv mueiz ninh oix daaih souv jienv ndau-beih.[83]

²⁶Zuov yie ndopv huv nzengc, yiem yie nyei orv sin[84] yie zungv duqv buatc Tin-Hungh.[85]

²⁷Yie ganh duqv buatc ninh, yie ganh nyei m'zing duqv mangc ninh, yaac maiv zeiz ganh dauh. Yie nyei hnyouv mau kouv haic.

²⁸“Se gorngv meih mbuo gorngv, ‘Yie mbuo hnangv haaix nor haih hoic ninh?’ Yaac gorngv, ‘Cuoqv sic nyei gorn-baengx yiem ninh ganh,’

²⁹meih mbuo oix zuqc gamh nziex nzuqc ndaauv, weic zuqc Tin-Hungh qiex jiez, ninh longc nzuqc ndaauv dingc zuiz. Meih mbuo ziouc hiuv duqv maaih dauh siemv zuiz.”