Read Iu Mien Yopv 2 Bible Online

Yopv 2 - Iu Mien bible

Yopv 2

¹Aengx maaih norm hnoi fin-mienh[5] daaih yiem ZIOUV nyei nza'hmien, Saadaan yaac caux jienv ninh mbuo daaih yiem ZIOUV nyei nza'hmien.

²ZIOUV naaic Saadaan, “Meih yiem haaix daaih?” Saadaan dau ZIOUV, “Yie youh lungh ndiev mingh mingh daaih daaih faaux-faaux njiec-njiec.”

³ZIOUV naaic Saadaan, “Meih samx mangc yie nyei bou, Yopv, nyei fai? Yiem lungh ndiev maiv maaih yietc laanh mienh hnangv ninh zoux hnyouv zingx, maiv lamh nqemh dorngx. Ninh taaih Tin-Hungh yaac simv nqoi, maiv zoux haaix nyungc orqv sic. Meih gorngv gau taux yie nqoi nzuih bun meih zoux bun ninh, meih zungv oix mietc ninh yaac maiv maaih gorn-baengx, mv baac ninh corc ziepc zuoqv nyei.”

⁴Saadaan dau, “Ndopv div ndopv. Mienh maaih nyei yietc zungv ninh oix longc weic njoux ninh ganh nyei maengc.

⁵Mv baac ih zanc sung meih nyei buoz hoic ninh nyei sin,[6] ninh zungv oix yiem meih nyei nza'hmien zioux meih.”

⁶ZIOUV gorngv mbuox Saadaan, “Wuov nyungc, ninh yiem meih nyei buoz-ndiev, mv baac oix zuqc liouh ninh nyei maengc.”

⁷Saadaan ziouc yiem ZIOUV nyei nza'hmien cuotv mingh hoic Yopv bun Yopv ziangh doqc haic nyei zueih yiem zaux-ndoqv-nyeiz faaux taux m'nqorngv-baengh.

⁸Ninh ziouc zueiz jienv saaiv-ndui zorqv hlengx nie-mor huv guaaih ganh nyei sin.

⁹Ninh nyei auv gorngv, “Meih corc ziepc zuoqv nyei zoux? Gunv zioux Tin-Hungh yaac daic aqv maah!”

¹⁰Mv baac Yopv dau ninh, “Meih gorngv waac hnangv dauh hngongx nyei m'sieqv dorn gorngv nor. Mbuo yiem Tin-Hungh nyei buoz zipv longx nyei ga'naaiv. Mbuo maiv horpc zuqc zipv maiv benx nyei fai?” Yopv zuqc naaiv deix yietc zungv sic, yiem Yopv gorngv nyei waac ninh maiv baamz zuiz.

¹¹Yopv nyei buo dauh loz-gaeng doic, se Temaan Zingh nyei mienh, E^li^fatv, caux Quwaa Mienh, Mbin^ndatc, caux Naa^aa^me Mienh, Sofaa, haiz gorngv Yopv zuqc naaiv deix yietc zungv zeqc naanc, gorqv-mienh ziouc yiem gorqv-mienh nyei dorngx daaih gapv jienv doic. Ninh mbuo dunx ziangx doic yietc jauv daaih, weic tengx Yopv jaiv nzauh, orn ninh nyei hnyouv.

¹²Ninh mbuo yiem go nyei buatc ninh, mv baac zieqv maiv duqv ninh, ziouc bungx-sing bungx-qiex nyei nyiemv, yaac betv ninh mbuo nyei lui-ndaauv, aengx nyau nie-mbung faatv faaux lungh ndortv njiec ninh mbuo nyei m'nqorngv.[7]

¹³Ninh mbuo caux Yopv zueiz jienv ndau siec hnoi siec muonz yaac maiv maaih haaix dauh caux ninh gorngv yietc joux waac, weic zuqc ninh mbuo buatc Yopv zuqc nyei zeqc naanc za'gengh hniev haic.