Read Iu Mien Yopv 21 Bible Online

Yopv 21 - Iu Mien bible

Yopv 21

¹Yopv ziouc dau,

²“Tov meih mbuo longx-longx nyei muangx yie nyei waac, hnangv naaic meih mbuo ziouc orn yie nyei hnyouv.

³Tov diev jienv muangx yie gorngv. Yie gorngv liuz sueih meih mbuo jatv aqv.

⁴“Yie aeqv, yie maiv zeiz caux baamh mienh nzaeng. Wuov nyungc yie weic haaix diuc maiv zuqc hnyouv beqv?

⁵Mangc yie maah! Ziouc haeqv meih mbuo gamh nziex, yaac longc buoz buang jienv nzuih.

⁶Yie haaix zanc jangx taux, gamh nziex gau, ziangh sin zinx nzengc aqv.

⁷“Tin-Hungh weic haaix diuc bun orqv mienh duqv ziangh jienv, duqv siouc nyuonh ndaauv, maaih qaqv henv jienv faaux?

⁸Ninh mbuo nyei dorn-jueiv dorng jienv ninh mbuo liepc wuonv, ninh mbuo nyei m'zing duqv buatc ninh mbuo nyei fun-faqv hlo daaih.

⁹Ninh mbuo nyei biauv baengh orn nyei, maiv zuqc gamh nziex nyei sic. Tin-Hungh nyei biaav yaac maiv mborqv ninh mbuo.

¹⁰Ninh mbuo nyei ngongh gouv douc buonv maiv dangx, ngongh nyeiz njiec dorn, dorn yaac maiv mbaang.

¹¹Ninh mbuo bun ninh mbuo nyei fu'jueiv-faix cuotv hnangv ba'gi yungh guanh, ninh mbuo nyei naamh nyouz cangx heix.

¹²Ninh mbuo gan nzoz caux daanh baah nyei qiex baaux nzung, aengx longc hlauv-ndongh nux nyei qiex zoux nauc nyitc.

¹³Ninh mbuo yiem seix zaangc nyei hnoi-nyieqc duqv longx, ninh mbuo baengh orn nyei[87] njiec yiemh gen.

¹⁴Ninh mbuo gorngv mbuox Tin-Hungh, ‘Leih nqoi yie mbuo maah! Yie mbuo maiv oix hiuv meih nyei jauv-louc.

¹⁵Nernh Jiex Wuov Dauh se haaix dauh, yie mbuo cingx daaih oix zuqc fu-sux ninh? Se gorngv yie mbuo jouh ninh yie mbuo duqv haaix nyungc longx?’

¹⁶Ninh mbuo duqv longx se ninh mbuo kaux ninh mbuo ganh nyei qaqv.[88] Orqv mienh caangh laangh nyei za'eix yie simv nqoi.

¹⁷“Orqv mienh nyei dang zuqc daic ndongc haaix maqc? Ninh mbuo zuqc kuonx naanh nyei sic ndongc haaix maqc? Ninh mbuo zuqc Tin-Hungh qiex jiez, bun zeqc naanc ninh mbuo ndongc haaix maqc?

¹⁸Ninh mbuo hnangv zuqc nziaaux buonc nyei mbiauh nqaauv, yaac hnangv mbieqv nor, zuqc domh nziaaux buonc ndongc haaix maqc?

¹⁹Meih mbuo gorngv, ‘Tin-Hungh siou jienv orqv mienh nyei zuiz weic bun ninh mbuo nyei fu'jueiv zuqc dingc.’ Tov Tin-Hungh winh bun orqv mienh ganh, weic bun ninh mbuo ganh hiuv.

²⁰Tov bun ninh mbuo ganh nyei m'zing buatc ninh mbuo ganh zuqc mietc. Bun ninh mbuo hiuv duqv Nernh Jiex Wuov Dauh qiex jiez haic ninh mbuo.

²¹Ninh ziangh nyei hlaax-nyieqc buangv, ninh corc haih jangx ganh nyei hmuangv doic fai?

²²“Maaih haaix dauh haih zorqv wuonh zaang njaaux Tin-Hungh? Weic zuqc ninh zungv siemv yiem hlang wuov deix.

²³Maaih laanh mienh daic nyei ziangh hoc, sin zaangc wangc siangx, henv nyei, kuh yiem, baengh orn nyei.

²⁴Ninh nyei sin henv, ndin nyei, ninh nyei mbungv-fim nyiemz nyei.

²⁵Aengx maaih laanh mienh daic nyei ziangh hoc, hnyouv maiv maaih yietc deix orn-lorqc. Ziangh seix maiv duqv haaix nyungc longx.

²⁶Ninh mbuo fih hnangv nyei daic, bueix jienv nie-mbung gu'nyuoz, maaih gaeng-mau buang jienv ninh mbuo.

²⁷“Yie hiuv duqv meih mbuo nyei hnyouv hnangv haaix nor hnamv, caux meih mbuo daav maiv benx nyei za'eix hoic yie.

²⁸Weic zuqc meih mbuo gorngv, ‘Zoux hlo wuov dauh nyei biauv ih zanc yiem haaix? Orqv mienh yiem jiex nyei ndopv-liuh yiem haaix?’

²⁹Meih mbuo maiv duqv naaic jiex jauv nyei mienh fai? Meih mbuo maiv hiuv duqv ninh mbuo zoux nyei zorng-zengx,

³⁰se zuqc zeqc naanc nyei hnoi orqv mienh duqv njoux, Tin-Hungh qiex jiez nyei hnoi yaac duqv biaux ndutv.

³¹Haaix dauh dorng jienv orqv mienh gorngv ninh? Ziux ninh zoux nyei haaix dauh winh bun ninh?

³²Gaeng ninh mingh taux zouv wuov zanc, zungv maaih mienh zuov jienv ninh nyei zouv aqv.

³³Weic ninh wuov norm horngz nyei nie heng nyei.[89] Zuangx mienh gan jienv ninh mingh, mingh ndaangc nyei mienh saauv maiv hingh.

³⁴“Meih mbuo ni? Meih mbuo kungx hnamv longc kungx-waac orn yie nyei hnyouv? Meih mbuo dau nyei waac maiv maaih haaix nyungc cuotv liuz nduov mienh nyei waac.”