Read Iu Mien Yopv 22 Bible Online

Yopv 22 - Iu Mien bible

Yopv 22

¹Temaan Mienh, E^li^fatv, ziouc dau,

²“Mienh haih weic Tin-Hungh maaih lamh longc nyei fai? Cong-mengh mienh weic ninh maaih lamh longc nyei fai?

³Se gorngv meih zoux kuv mienh, haih zoux bun Nernh Jiex Wuov Dauh a'hneiv fai? Fai se gorngv meih zoux dunh yunh nyei mienh, haih bun Tin-Hungh duqv haaix nyungc?

⁴“Se weic zuqc meih taaih ninh, ninh cingx gorngv meih yaac siemv meih nyei zuiz fai?

⁵Se meih zoux nyei orqv sic hlo haic maiv zeiz? Meih zoux nyei zuiz yaac maiv maaih jomc nyei dorngx.

⁶Meih aapv gorx-youz an dorngx-daauh yaac maiv maaih gorn-baengx. Zungv zorqv nzengc ninh mbuo nyei lui-houx bun ninh mbuo laengh gaengv nyei yiem.

⁷Kouv nyei mienh meih maiv bun wuom ninh mbuo hopv, hnyouv sie nyei mienh meih yaac maiv bun hnaangx nyanc.

⁸Meih longc meih nyei hatc maaz duqv lingh deic, maaih mengh dauh nyei mienh duqv yiem naaic.

⁹Meih zunc auv-guaav kungx-buoz baeqc zaux nyei nzuonx yaac zoux doqc guh hanh fu'jueiv.[90]

¹⁰Weic naaiv maaih mungz zaeng weih gormx meih. Meih jangx maiv zaaic nyei ziangh hoc liemh zeih zuqc gamh nziex nyei sic.

¹¹Hmuangx om jienv meih, meih ziouc mangc maiv buatc, wuom yaac yiemx jienv meih.

¹²“Tin-Hungh maiv zeiz yiem gu'nguaaic lungh hlang nyei dorngx fai? Mangc hlang jiex nyei hleix, ninh mbuo ndongc haaix hlang!

¹³Meih corc gorngv, ‘Tin-Hungh hiuv duqv haaix nyungc? Ndongc naaic hmuangx, Tin-Hungh hnangv haaix nor haih mangc duqv tong siemv zuiz?

¹⁴Mbuonx-hoz om jienv ninh, ninh ziouc mangc maiv buatc. Ninh yaac youh lungh gu'nguaaic.’

¹⁵“Meih corc oix gan loz-jauv fai? Naaiv se orqv mienh yangh jiex nyei jauv.

¹⁶Maiv gaengh taux daic nyei ziangh hoc, ninh mbuo zuqc zorqv mingh mi'aqv. Ninh mbuo nyei gorn-ndoqv zuqc wuom guaatv mingh.

¹⁷Ninh mbuo gorngv mbuox Tin-Hungh, ‘Leih nqoi yie mbuo maah!’ yaac gorngv, ‘Nernh Jiex Wuov Dauh haih zoux haaix nyungc bun yie mbuo?’

¹⁸Mv baac Tin-Hungh corc bun longx nyei ga'naaiv buangv nzengc ninh mbuo nyei biauv. Orqv mienh hnamv nyei jauv yie yaac maiv haih mengh baeqc.

¹⁹“Kuv mienh buatc ninh mbuo zuqc baaic ziouc a'hneiv, maiv zoux dorngc nyei mienh yaac kuh jatv

²⁰gorngv, ‘Mbuo nyei win-wangv ndongc haaix zungv zuqc pai guangc. Ninh mbuo zengc njiec nyei ga'naaiv zuqc douz buov qui nzengc.’

²¹“Yopv aac, meih oix zuqc caux Tin-Hungh zoux horpc, caux ninh baengh orn, Tin-Hungh ziouc bun meih duqv longx.

²²Oix zuqc zipv ninh nyei nzuih njaaux nyei waac, siou ninh nyei waac yiem meih nyei hnyouv gu'nyuoz.

²³Se gorngv meih nzuonx daaih lorz Nernh Jiex Wuov Dauh meih ziouc duqv ceix jiez hnangv loz wuov nor.[91] Se gorngv meih guangc orqv sic leih meih nyei ndopv-liuh go,

²⁴se gorngv meih zorqv jiem guangc jienv nie-mbung, zorqv Ofi nyei zien jiem guangc wuov ndoqv-zuonx nyei la'bieiv-qangx,

²⁵se gorngv Nernh Jiex Wuov Dauh benx meih nyei jiem, yaac benx meih jaaix haic nyei nyaanh,

²⁶hnangv naaiv meih ziouc a'hneiv Nernh Jiex Wuov Dauh yaac cau hmien lorz Tin-Hungh.

²⁷Meih ziouc daux gaux jouh ninh, ninh yaac oix muangx meih. Meih yaac jaauv sung meih laengz nyei ngaengc waac.

²⁸Meih dingc hnyouv zoux haaix nyungc, meih ziouc haih zoux duqv cuotv nyei. Njang yaac oix ziux meih nyei jauv.

²⁹Weic zuqc Tin-Hungh zatv jienv zoux maux nyei mienh, mv baac njoux nyiemc ganh zoux faix nyei mienh.

³⁰Liemh zoux dorngc nyei mienh ninh yaac oix njoux. Se gorngv meih zoux duqv horpc[92] meih ziouc duqv njoux.”