Read Iu Mien Yopv 23 Bible Online

Yopv 23 - Iu Mien bible

Yopv 23

¹Yopv ziouc dau,

²“Ih hnoi yie corc ngaengc jienv ngopv Tin-Hungh, maiv gunv yie njunh jienv yiem, ninh nyei buoz zatv jienv yie.

³Feix duqv yie haih hiuv mingh haaix ndau lorz ninh, feix duqv yie haih mingh taux ninh yiem nyei dorngx.[93]

⁴Yie ziouc yiem ninh nyei nza'hmien sux yie nyei sic. Yie oix gorngv nzengc yie nyei diuh diuh jauv.

⁵Yie oix hiuv duqv ninh hnangv haaix nor dau yie, yaac oix mengh baeqc ninh caux yie gorngv nyei waac.

⁶Tin-Hungh oix longc ninh nyei domh qaqv caux yie nzaeng fai? Maiv zeiz! Ninh zungv oix muangx yie gorngv nyei waac.

⁷Yiem ninh wuov, hnyouv zingx nyei mienh haih caux ninh nzaeng leiz, siemv zuiz jien ziouc dingc yie yietc liuz maiv dorngc.[94]

⁸“Yie mingh dong bung[95] lorz Tin-Hungh mv baac ninh maiv yiem naaic. Mingh fai bung, mv baac maiv buatc ninh.

⁹Ninh yiem baqv bung zoux gong nyei ziangh hoc yie mangc maiv buatc ninh. Yie[96] huin mingh naamh bung mv baac maiv duqv buatc ninh.

¹⁰Mv baac ninh hiuv duqv yie yangh nyei jauv. Ninh seix liuz yie, yie ziouc hnangv jiem nor.

¹¹Yie nyei zaux yangh nitv jienv ninh nyei zaux-mbiec mingh. Yie gan jienv ninh nyei jauv, yaac maiv mingh pien.

¹²Yie maiv simv ninh nyei nzuih hatc nyei waac. Yie funx yiem ninh nyei nzuih cuotv nyei waac gauh jaaix jiex yie qiemx longc nyei nyanc hopv.

¹³“Tin-Hungh yietc liuz maiv goiv yienc. Maaih haaix dauh haih tiuv ninh nyei za'eix? Ninh oix zoux nyei ninh ziouc zoux.

¹⁴Ninh weic yie dingc nyei za'eix oix zoux ziangx, ninh corc maaih naaiv nyungc za'eix camv nyei.

¹⁵Weic naaiv yie yiem ninh nyei nza'hmien gamh nziex sin-zinx. Yie hnamv taux ninh yie ziouc gamh nziex haic.

¹⁶Tin-Hungh bun yie hnyouv mau. Nernh Jiex Wuov Dauh bun yie gamh nziex haic aqv,

¹⁷weic zuqc hmuangx weih gormx yie, mapv maengh mapv hmuangx nyei buang jienv yie nyei hmien.[97]