Read Iu Mien Yopv 24 Bible Online

Yopv 24 - Iu Mien bible

Yopv 24

¹“Nernh Jiex Wuov Dauh weic haaix diuc maiv dingc siemv zuiz nyei hnoi? Hiuv duqv ninh wuov deix weic haaix diuc maiv duqv buatc ninh dingc daaih nyei hnoi?

²Mienh suiv ndeic-nqenx nyei dongc, ninh mbuo caangv ba'gi yungh caux yungh dorh mingh yungz.

³Ninh mbuo zorqv[98] guh hanh fu'jueiv nyei lorh, yaac zorqv auv-guaav nyei ngongh zoux dorngx-daauh.

⁴Ninh mbuo fongv guh hanh fu'jueiv cuotv jauv-hlen, lungh ndiev nyei mouz laanh mienh jomc mienh bingx nzengc.

⁵Hnangv yiem deic-bung-huaang nyei hieh lorh, mienh jomc mienh cuotv mingh jiex naaiv jiex wuov lorz nyanc. Ninh mbuo kaux deic-bung-huaang uix ninh mbuo nyei fu'jueiv.

⁶Ninh mbuo mingh mienh nyei ndeic nzauz mbiauh dorngc, yaac mingh orqv mienh nyei a'ngunc huingx nzauz gaeqv liuz zengc njiec nyei biouv.

⁷Ninh mbuo laengh gaengv nyei bueix jiex muonz, maiv maaih lui-houx zuqv. Juangv nyei ziangh hoc maiv maaih haaix nyungc homc.

⁸Ninh mbuo yiem mbong zuqc mbiungc liemh ndorn, ziouc qam la'bieiv weic zuqc maiv maaih dorngx bingx.

⁹Orqv mienh caangv maiv maaih die nyei guh hanh fu'jueiv yiem maa nyei la'kuotv mingh, zorqv mienh jomc mienh nyei gu'nguaaz zoux dorngx-daauh.

¹⁰Mienh jomc mienh jiex naaiv jiex wuov laengh gaengv nyei yiem, maiv maaih lui-houx zuqv, ninh mbuo hnyouv sie jienv tengx mienh ndaam mbiauh zeiv.

¹¹Ninh mbuo yiem orqv mienh nyei yietc liouz yietc liouz ga'lanv ndiangx mbu'ndongx[99] zaax ga'lanv youh, yaac yiem nyueih a'ngunc biouv nyei zorngh nyueih biouv,[100] mv baac ninh mbuo jaang nqaatv jienv yiem.

¹²Yiem zingh gu'nyuoz maaih aav lamh daic nyei mienh njunh nyei qiex cuotv, zuqc mun nyei mienh heuc jienv tov tengx, mv baac Tin-Hungh maiv muangx ninh mbuo daux gaux tov nyei waac.

¹³“Aengx maaih mienh nqemh njang, ninh mbuo maiv zuoqc njang nyei jauv, yaac maiv gan njang nyei jauv yangh.

¹⁴Lungh maiv gaengh njang, daix mienh nyei mienh jiez sin, weic mingh daix mienh jomc mienh caux dangx-donx nyei mienh. Lungh muonz zanc ninh zoux zaqc nimc ga'naaiv.

¹⁵Hienx auv nyei mienh zuov jienv nziemx-yaangh nyei ziangh hoc taux. Ninh gorngv, ‘Maiv maaih haaix dauh nyei m'zing duqv buatc yie.’ Ninh yaac buang jienv ninh nyei hmien.

¹⁶Lungh muonz zanc janx-zaqc mborqv tong kuotv bieqc biauv, lungh hnoi zanc ninh mbuo bingx, ninh mbuo maiv hiuv duqv njang.

¹⁷Mapv maengh mapv hmuangx nyei ziangh hoc weic ninh mbuo yietc zungv se hnangv lungh ndorm nyei njang, weic zuqc ninh mbuo guenx lungh muonz zanc gamh nziex nyei sic.

¹⁸“Orqv mienh hnangv wuom-mbiaauz siepv-siepv mbiouh jienv gan wuom-minc mingh. Ninh mbuo yiem deic-bung duqv nyei buonc zuqc zioux. Ninh mbuo maiv duqv mingh[101] ninh mbuo nyei a'ngunc huingx.

¹⁹Lungh haanz, nyutc doqc bun sorng yuqc mingh nzengc. Yiemh gen fih hnangv nyei bun baamz zuiz wuov deix zutc nzengc mi'aqv.

²⁰Ninh mbuo nyei maa[102] zungv la'kuqv ninh mbuo, gaeng-mau nyanc nzengc ninh mbuo nyei sei haiz gaam nyei. Maiv maaih haaix dauh jangx duqv ninh nyei mbuox. Orqv mienh hnangv ndiangx nor, nauv ndutv.

²¹Ninh mbuo pienx maiv yungz jiex gu'nguaaz nyei m'sieqv dorn, yaac maiv zoux longx bun auv-guaav.

²²Mv baac Tin-Hungh longc ninh nyei qaqv mietc nzengc[103] henv haic nyei mienh. Tin-Hungh yietv dongz sin ninh mbuo ziouc daic nzengc.

²³Tin-Hungh ceix baengh orn bun ninh mbuo, bun ninh mbuo maaih dorngx kaux, mv baac ninh nyei m'zing zanc-zanc mangc jienv ninh mbuo zoux nyei jauv.

²⁴Ninh mbuo duqv mienh taaih se weic caamx baav hnangv, ziang naaic maiv buatc mi'aqv. Ninh mbuo hnangv miev nor, nyaux nqaai, yaac hnangv zuqc gaatv nyei mbiauh dorv nor.

²⁵“Se gorngv maiv zeiz hnangv naaic, haaix dauh haih bun cing yie gorngv-baeqc? Haaix dauh haih bun cing yie gorngv nyei waac se maiv zien?”