Read Iu Mien Yopv 29 Bible Online

Yopv 29 - Iu Mien bible

Yopv 29

¹Yopv aengx borqv jienv gorngv ninh nyei jauv-louc. Ninh gorngv,

²“O feix duqv yie nyei maengc haih nzuonx daaih hnangv zinh ndaangc nyei hlaax-nyieqc, hnangv Tin-Hungh goux jienv yie wuov deix hnoi.

³Wuov zanc ninh nyei dang ziux jienv yie nyei m'nqorngv gu'nguaaic, ninh nyei njang ziux yie yangh hmuangx nyei dorngx.

⁴Wuov zanc yie lunx, henv nyei ziangh hoc, Tin-Hungh zoux yie nyei doic yaac beu jienv yie nyei ndopv-liuh.

⁵Nernh Jiex Wuov Dauh corc caux yie yiem, yie nyei naamh nyouz yaac weih gormx yie.

⁶Yie yangh nyei jauv zungv maaih ngongh nyorx nzaaux zaux, la'bieiv yaac weic yie liouc cuotv ga'lanv youh hnangv ndoqv nor.

⁷“Yie cuotv taux zingh gaengh nyei ziangh hoc, yiem domh zuangx zaamc zueiz jienv yie nyei weic,

⁸mienh lunx mienh buatc yie ziouc simv nqoi, mienh gox mienh souv jiez daaih.

⁹Baeqc fingx nyei bieiv zeiv maiv ko lo, longc buoz buang jienv ganh nyei nzuih.[122]

¹⁰Maaih mengh dauh nyei mienh yaac sekv nzieqc nyei, ninh mbuo nqapc jienv nzuih, maiv ko lo.[123]

¹¹“Da'faanh m'normh haiz nyei mienh, ninh mbuo gorngv yie maaih orn-lorqc, m'zing buatc wuov deix yaac taaih yie,

¹²weic zuqc yie tengx heuc jienv tov nyei mienh jomc mienh caux maiv maaih mienh tengx nyei guh hanh fu'jueiv.

¹³Aav lamh zuqc mietc nyei mienh buang waac bun yie, yie yaac bun auv-guaav nyei hnyouv duqv njien-youh nyei baaux nzung.

¹⁴Yie longc zoux horpc nyei jauv dorngx lui zuqv, yie zoux baengh fim nyei sic dorngx domh lui-ndaauv caux m'nqorngv-beu.

¹⁵Yie zoux m'zing maengh mienh nyei m'zing, yaac zoux zaux mbai mienh nyei zaux.

¹⁶Yie dorngx mienh jomc mienh nyei die, yaac tengx dongh yie maiv hiuv nyei mienh mbenc ninh mbuo nyei sic.

¹⁷Yie mborqv nauv mienh waaic mienh nyei nyaah ngau, yaac aapv ninh bungx guangc nyaah ngaatc jienv nyei ga'naaiv.

¹⁸“Wuov zanc yie hnamv, ‘Yie duqv yiem yie ganh nyei biauv[124] daic, aengx jaa yie nyei hnoi-nyieqc ndongc saa-ziou camv.

¹⁹Yie hnangv diuh ndiangx maaih nzungh ndaauv jienv mingh taux wuom, yaac maaih mbiungc-suiv ziangh muonz yiem yie nyei nquaah.

²⁰Mienh zanc-zanc taaih yie, yie nyei qaqv yaac zanc-zanc henv, maiv tuix.’[125]

²¹“Mienh muangx yie yaac zuov jienv, sekv nzieqc nyei muangx yie caangh laangh nyei waac.

²²Yie gorngv liuz ninh mbuo maiv ko lo, yie nyei waac hnangv mbiungc-suiv[126] nor, ndiepv ninh mbuo.

²³Ninh mbuo zuov yie hnangv zuov mbiungc, yaac morngx nqoi nzuih hnangv zuov cun-gen mbiungc.

²⁴Ninh mbuo hnyouv mau nyei ziangh hoc, yie zoux hmien njang nyei jatv. Ninh mbuo buatc yie nyei hmien njang, jatv, ziouc tengx ninh mbuo maiv nzauh.[127]

²⁵Yie zoux[128] ninh mbuo nyei bieiv zeiv, yaac ginv jauv bun ninh mbuo yangh. Yie hnangv hungh diex yiem ninh nyei jun-baeng guanh mbu'ndongx, yaac hnangv dauh orn hnyouv nyei mienh orn nzauh nyiemv nyei mienh nyei hnyouv.