Read Iu Mien Yopv 3 Bible Online

Yopv 3 - Iu Mien bible

Yopv 3

¹Nqa'haav Yopv nqoi nzuih zioux ninh nyei cuotv seix hnoi.

³“Tov bun yie cuotv seix nyei hnoi caux ninh mbuo gorngv, ‘Maaih gu'nguaaz-dorn cuotv seix’ wuov muonz zuqc mietc.[8]

⁴Tov bun wuov hnoi hmuangx mingh. Tov bun gu'nguaaic nyei Tin-Hungh maiv lorz wuov norm hnoi, yaac maiv dungx bun njang ziux zuqc.

⁵Tov bun wuov hnoi mapv maengh mapv hmuangx, bun mbuonx-hoz torngv jienv, tov bun wuov norm hnoi mapv maengh nyei ziouc hingh nzengc njang.

⁶Tov bun wuov muonz mapv maengh mapv hmuangx nyei, zorqv nqoi, maiv dungx bun hnyangx maaih wuov norm hnoi, yaac maiv dungx bun wuov norm hnoi bieqc hlaax nyei soux mouc.

⁷Tov bun wuov muonz maiv maaih saeng-yungz, bun wuov muonz nyei ziangh hoc yaac maiv haiz njien-youh heuc nyei qiex mbui.

⁸Tov bun haih zioux hnoi nyei mienh zioux wuov hnoi, se maaih banh zeic dongz Le^wi^aa^taan jiez daaih wuov deix.

⁹Tov bun wuov ndorm nyei Taaix-Baeqc Fing hmuangx mingh, bun wuov muonz hnamv jienv haih njang mv baac maiv njang, maiv duqv buatc lungh ndorm nziouv nyei njang,

¹⁰weic zuqc wuov muonz bun yie cuotv seix[9] bun yie zuqc ziex nyungc kouv naanc hoic.

¹¹“Yie cuotv seix wuov zanc, yie weic haaix diuc maiv daic? Yie cuotv maa nyei ga'sie, weic haaix diuc maiv dangx qiex?

¹²Weic haaix diuc maaih cingh mborqc zipv yie? Fai maa bun ninh nyei nyorx yie hopv?

¹³Maiv hnangv naaic yie duqv bueix njiec sekv zieqc. Yie daic[10] ziouc duqv hitv kuonx,

¹⁴caux lungh ndiev nyei hungh diex caux caangh laangh nyei mienh yiem, dongh weic ganh ceix jiez ih zanc mbaang waaic nyei dorngx,

¹⁵fai caux zoux hlo nyei mienh yiem, dongh bun ninh mbuo nyei biauv maaih jiem nyaanh buangv.

¹⁶Fai yie weic haaix diuc maiv hnangv mbaang waaic nyei gu'nguaaz biopv jienv, se hnangv maiv buatc jiex njang nyei gu'nguaaz.

¹⁷Yiem naaic orqv mienh dingh njiec, maiv zoux orqv, kouv nyei mienh duqv hitv kuonx.

¹⁸Yiem wuov zuqc wuonx nyei mienh duqv lomh nzoih henh, muangx maiv haiz aapv ninh mbuo zoux gong wuov deix nyei qiex mbui.

¹⁹Hlo-hlo faix-faix nyei mienh yiem naaic, zoux nouh nyei mienh biaux ndutv ninh nyei ziouv.

²⁰“Weic haaix diuc ceix njang bun zuqc siouc kouv nyei mienh? Weic haaix diuc bun nzauh kouv nyei mienh maaih maengc ziangh?

²¹Ninh mbuo zuov jienv daic, mv baac maiv duqv daic. Ninh mbuo lorz daic nyei jauv gauh camv lorz bingx jienv nyei zinh zoih.

²²Ninh mbuo zuov jienv daic bieqc zouv[11] ziouc a'hneiv, za'gengh! njien-youh taux daauh.

²³Tin-Hungh bingx jienv mienh hoz nqaang nyei jauv, bung-bung weih jienv ninh mbuo.[12]

²⁴Yie tauv qiex-ndoqc dorngx nyanc hnaangx, yie njunh nyei qiex dox cuotv hnangv wuom nor.

²⁵Weic zuqc yie gamh nziex nyei sic zungv zuqc yie mi'aqv. Dongh yie gamh nziex jiex nyei sic ndortv zuqc yie.

²⁶Yie maiv maaih baengh orn, yaac maiv duqv sekv. Yie maiv duqv hitv kuonx, mv baac kouv naanc daaih lorz yie.”