Read Iu Mien Yopv 30 Bible Online

Yopv 30 - Iu Mien bible

Yopv 30

¹“Mv baac gauh lunx yie wuov deix mienh jatv yie. Naaiv deix mienh nyei die yie buatc maiv zic duqv caux zuov yie nyei ba'gi yungh guanh nyei juv yiem.

²Ninh mbuo nyei buoz nyei qaqv haih tengx haaix nyungc yie? Ninh mbuo nyei qaqv-leqc nzengc mi'aqv.

³Laaix jomc kouv yaac ngorc, lungh muonz zanc yiem ndau-huaang ninh mbuo nyanc miev-nzungh nqaai.

⁴Ninh mbuo gaeqv yiem deic-bung-huaang nyei ndiangx-normh, caux maiv maaih mueix nyei ndiangx-nzungh zoux nyanc hopv.[129]

⁵Ninh mbuo yiem mienh mbu'ndongx zuqc zunc cuotv, mienh heuc jienv zunc hnangv zunc janx-zaqc nor.

⁶Ninh mbuo zuqc yiem ndoqv-zuonx nqaai yaac yiem ndau-kuotv caux mbaengx-ngaamh.

⁷Ninh mbuo yiem ndau-huaang hnangv hieh zoih nor heuc, yaac mbengx jienv yiem ndiangx-dorn-fomv ga'ndiev.

⁸Ninh mbuo benx yietc guanh maiv lamh longc nyei haac horngh mienh, zuqc biaav-bin mborqv zunc cuotv deic-bung.

⁹“Ih zanc naaiv deix mienh dorh yie benx nzung baaux, yaac dorh yie benx gouv gorngv.

¹⁰Ninh mbuo youx yie, simv yie go, yietv buatc yie ziouc tuiv wuom-nzuih naetv yie.

¹¹Weic zuqc Tin-Hungh bun yie mau,[130] tengx maiv duqv ganh, ninh mbuo ziouc dorng jienv yie sueih eix zoux.

¹²Naaiv deix ceux lunc nyei mienh yiem yie nyei mbiaauc maengx jiez daaih, ninh mbuo fongv yie[131] cuotv mingh. Ninh mbuo liuc leiz jauv mietc yie.

¹³Ninh mbuo bun yie biaux nyei jauv dangx, aengx jaa zeqc naanc bun yie, yaac maiv maaih haaix dauh dangv ninh mbuo.

¹⁴Ninh mbuo ndutc ndutc nyei daaih hnangv bieqc zingh laatc tong nyei dorngx. Yiem baaic waaic nyei dorngx ninh mbuo wuz-wuz nyei daaih.

¹⁵Gamh nziex haic nyei sic hoic yie kouv haic, yie nyei njang-laangc jiex hnangv nziaaux buonc mingh nor, yie nyei fuqv-loqc yaac hnangv mbuonx jiex mi'aqv.

¹⁶“Ih zanc yie nyei hnyouv za'gengh kouv haic, zuqc kouv nyei hnoi-nyieqc zorqv jienv yie.

¹⁷Lungh muonz zanc yie nyei mbungv hlam, nziuv-nziuv nyei mun yaac maiv maaih ziangh hoc dingh.

¹⁸Tin-Hungh nyei domh qaqv dorngx hnangv yie nyei lui,[132] aengx hnangv lui-jaang nor naeqc jienv yie.

¹⁹Tin-Hungh zorqv yie zoi njiec wuom-bamc ndorngh, yie ziouc benx nie-mbung caux saaiv mi'aqv.

²⁰“Tin-Hungh aac, yie heuc jienv meih, meih yaac maiv dau yie, yie souv jiez daaih, meih kungx bungx m'zing mangc hnangv.

²¹Meih tiuv hnyouv zoux doqc yie, longc meih henv haic nyei buoz zeix yie.

²²Meih bouh yie faaux yiem nziaaux gu'nguaaic, bun yie geh jienv nziaaux mingh, meih bun yie yiem domh nziaaux zuqc mbeu mingh mbeu daaih.

²³Yie hiuv duqv meih dorh yie mingh zuqc daic, se taux dingc ziangx dauh dauh ziangh jienv nyei mienh oix zuqc mingh nyei dorngx.

²⁴“Mv baac mienh yiem baaic waaic nyei ga'naaiv-ndui sung buoz, yaac yiem ninh zuqc nyei zeqc naanc heuc jienv tov tengx maiv zeiz?[133]

²⁵Mienh ndortv naanc nyei ziangh hoc yie maiv zeiz weic ninh mbuo nyiemv fai? Yie nyei hnyouv maiv zeiz weic mienh jomc mienh nzauh fai?

²⁶Yie hnamv jienv oix duqv longx mv baac duqv ciouv. Yie zuov jienv njang mv baac hmuangx daaih taux.

²⁷Yie nyei hnyouv faan-fei lunc, maiv dingh yietc dangh, kouv naanc nyei hnoi-nyieqc morh jienv yie yiem.

²⁸Yie nzauh, hmien hmuangx yaac maiv maaih nyutc ziux, yie souv jienv gapv zunv nyei wuic, heuc jienv tov tengx.

²⁹Yie caux hieh juv benx muoz-doic, yaac caux norqc lorh torh zoux doic.

³⁰Yie nyei ndopv jieqv yaac nqorqv mi'aqv, yie nyei mbungv jorm hnangv douz buov nor.

³¹Weic naaiv yie nyei daanh baah nyei qiex tiuv benx nzauh nyei qiex. Yie nyei hlauv-ndongh nux nyei qiex tiuv benx mienh nyiemv nyei qiex.