Read Iu Mien Yopv 32 Bible Online

Yopv 32 - Iu Mien bible

Yopv 32

¹Naaiv deix buo laanh mienh ziouc dingh njiec, maiv dau Yopv, weic zuqc ziux Yopv mangc, ninh ganh zoux kuv mienh.

²Mv baac maaih dauh Laam Fingx, Mbusi Mienh, Mbaa^laa^ken nyei dorn, E^li^hu, qiex jiez. Ninh qiex jiez Yopv weic zuqc Yopv gorngv ninh ganh zoux duqv horpc, maiv zeiz Tin-Hungh.

³Ninh yaac qiex jiez Yopv nyei buo dauh doic, weic zuqc ninh mbuo lorz maiv duqv waac dau, maiv gunv ninh mbuo gorngv Yopv dorngc.

⁴E^li^hu zuov jienv oix caux Yopv gorngv weic zuqc wuov deix gauh gox ninh.

⁵E^li^hu buatc naaiv deix buo laanh mienh maiv maaih waac dau ninh ziouc qiex jiez haic.

⁶Mbusi Mienh, Mbaa^laa^ken nyei dorn, E^li^hu, ziouc dau, “Yie hnyangx-jeiv lunx, meih mbuo gox. Weic naaiv yie daamv faix, maiv gaamv gorngv yie hnamv cuotv nyei waac bun meih mbuo muangx.

⁷Yie gorngv, ‘Hnyangx-jeiv gox oix zuqc gorngv, bun siouc nyuonh ndaauv nyei longc cong-mengh njaaux mienh.’

⁸Nernh Jiex nyei Tin-Hungh nyei qiex bun baamh mienh nyei hnyouv maaih banh zeic haih mengh baeqc.

⁹Se maiv zeiz laaix hnyangx-jeiv hlang, mienh cingx maaih cong-mengh, fai siouc nyuonh ndaauv cingx bun ninh mbuo mengh baeqc haaix nyungc se horpc.

¹⁰Weic naaiv yie gorngv. Muangx yie maah! Tov bun yie ziux yie nyei hnyouv hnamv nyei gorngv.

¹¹“Yie zuov jienv muangx meih mbuo gorngv nyei waac. Yie muangx meih mbuo hnamv cuotv nyei za'eix, yaac zuov jienv meih mbuo lorz waac gorngv.

¹²Yie longc hnyouv muangx meih mbuo, yaac maiv maaih haaix dauh dau duqv horpc Yopv. Meih mbuo maiv maaih yietc laanh haih dau Yopv nzaeng nyei waac.

¹³Faix fim, maiv dungx gorngv, ‘Yie mbuo lorz duqv cong-mengh. Bun Tin-Hungh ganh dau ninh, maiv zeiz mienh.’

¹⁴Yopv maiv zeiz zueih yietv zueih nyeic doix yie gorngv, yie zungv maiv longc waac hnangv meih mbuo nor dau.

¹⁵“Ninh mbuo gamh nziex, maiv aengx dau aqv, zungv maiv maaih waac dau.

¹⁶Ninh mbuo maiv gorngv waac, yie corc oix zuqc zuov fai? Weic zuqc ninh mbuo souv jienv wuov, yaac maiv maaih waac aengx dau.

¹⁷Yie ganh yaac oix dau, yie oix ziux yie hnamv nyei jauv gorngv.

¹⁸Weic zuqc yie maaih waac camv, nyienz maiv jienv, yie nyei hnyouv aapv yie gorngv.

¹⁹Yie nyei hnyouv hnangv a'ngunc diuv dapv mbuoqc, maiv maaih dorngx bun qiex cuotv. Yaac hnangv siang-ndopv-mbuoqc haih zungx mbaaix.

²⁰Yie hnangv haaix oix zuqc gorngv cingx duqv kuh yiem, yie oix zuqc morngx nqoi nzuih dau.

²¹Yie maiv mangc haaix dauh nyei hmien, maiv la'guaih ceng haaix dauh.

²²Weic zuqc yie maiv hiuv duqv hnangv haaix nor la'guaih ceng, se gorngv yie la'guaih ceng, Zeix Yie Wuov Dauh oix siepv-siepv nyei mietc yie.