Read Iu Mien Yopv 34 Bible Online

Yopv 34 - Iu Mien bible

Yopv 34

¹E^li^hu aengx gorngv,

²“Meih mbuo cong-mengh nyei mienh aah! Muangx yie nyei waac maah! Meih mbuo maaih wuonh zaang nyei mienh, tov baeng m'normh muangx yie,

³weic zuqc m'normh seix waac hnangv mbietc[143] seix nyanc hopv nyei mueix.

⁴Mbuo oix zuqc ginv haaix nyungc se horpc nyei, mbuo ganh oix zuqc dingc haaix nyungc se longx nyei.

⁵“Yopv gorngv, ‘Yie maiv zoux dorngc,[144] mv baac Tin-Hungh maiv bun yie duqv baengh fim nyei leiz.

⁶Maiv gunv yie zoux duqv horpc, yie zuqc funx benx gorngv-baeqc nyei mienh. Maiv gunv yie maiv maaih zuiz, yie zuqc mun, zorc maiv haih longx.’

⁷Maaih haaix laanh mienh hnangv Yopv diev duqv mienh huotv ndongc hopv wuom hec.

⁸Ninh caux orqv mienh zoux doic, yaac caux mienh waaic mienh juangc jauv yangh.

⁹Weic zuqc ninh gorngv, ‘Mienh a'hneiv gan Tin-Hungh haih tengx ninh duqv haaix nyungc longx?’

¹⁰“Weic naaiv meih mbuo mienh guai mienh aah! Muangx yie maah! Tin-Hungh za'gengh! maiv haih zoux orqv sic. Nernh Jiex Wuov Dauh zungv maiv haih zoux dorngc.

¹¹Ninh ziux mienh zoux nyei winh bun ninh mbuo, bun mienh duqv puix ninh mbuo zoux nyei jauv.

¹²Zien nyei, Tin-Hungh zungv maiv zoux waaic sic. Nernh Jiex Wuov Dauh maiv aaux baengh fim nyei jauv pien.

¹³Haaix dauh orn Tin-Hungh gunv ndau-beih? Fai haaix dauh paaiv ninh gunv gormx lungh ndiev?

¹⁴Se gorngv Tin-Hungh dingc hnyouv siou ninh bun mienh maaih maengc nyei qiex nzuonx guei ninh ganh,

¹⁵da'faanh maaih maengc nyei ga'naaiv ziouc liemh zeih daic, baamh mienh zuqc nzuonx benx nie-mbung.

¹⁶“Se gorngv meih mengh baeqc, muangx yie nyei waac maah! Tov muangx yie gorngv.

¹⁷Haaix dauh nzorng baengh fim nyei jauv horpc zuqc gunv nyei fai? Meih oix dingc baengh fim nyei, maaih domh qaqv nyei Tin-Hungh maaih zuiz fai?

¹⁸Tin-Hungh gorngv mbuox hungh diex, ‘Meih se maiv lamh longc,’ yaac gorngv mbuox zoux hlo nyei mienh, ‘Meih se orqv haic.’

¹⁹Ninh maiv mangc domh jien nyei hmien, yaac maiv funx butv-zoih mienh gauh longc jienv mienh jomc mienh, weic zuqc ninh mbuo yietc zungv se Tin-Hungh nyei buoz zeix daaih nyei.

²⁰Ndaamv muonz nyei ziangh hoc, nduqc dangh hnangv mienh ziouc daic. Baeqc fingx zuqc ndanc dongz, zuqc mietc nzengc mi'aqv. Henv wuov deix zuqc zorqv mingh yaac maiv zeiz baamh mienh nyei buoz zoux.

²¹Tin-Hungh mangc jienv mienh nyei jauv, yaac buatc mienh nyei norm-norm zaux-mbiec.

²²Maiv maaih hmatv jieqv fai mapv hmuangx nyei dorngx bun zoux orqv nyei mienh bingx duqv mbueiz.

²³Tin-Hungh zungv maiv zuqc dingc ziangh hoc bun mienh[145] mingh yiem ninh nyei nza'hmien zuqc siemv.

²⁴Ninh mborqv baaic maaih qaqv nyei mienh yaac maiv zuqc zaah naaic ndaangc. Ninh aengx liepc ganh deix mienh div ninh mbuo.

²⁵Hnangv naaic, ninh hiuv duqv ninh mbuo zoux nyei sic ziouc lungh muonz zanc tuix ninh mbuo nyei weic mietc nzengc mi'aqv.

²⁶Laaix ninh mbuo zoux nyei orqv sic ninh dorng jienv zuangx mienh mborqv ninh mbuo,

²⁷weic zuqc ninh mbuo mingh pien maiv gan ninh, yaac maiv taaih yietc deix ninh nyei doz-leiz.

²⁸Weic naaiv ninh mbuo bun mienh jomc mienh nyei qiex mingh taux Tin-Hungh wuov. Zuqc kouv heuc nyei mienh nyei qiex, ninh yaac haiz mi'aqv.

²⁹Se gorngv ninh sekv nzieqc, haaix dauh haih dingc ninh maaih zuiz? Ninh buang jienv ninh nyei hmien, haaix dauh haih mangc duqv buatc ninh? Maiv gunv ninh zoux bun yietc guoqv fai yietc laanh mienh, zungv fih hnangv nyei,

³⁰weic bun maiv gan Tin-Hungh nyei mienh maiv duqv gunv, yaac maiv duqv zaeng koux hlopv baeqc fingx.

³¹“Se gorngv maaih dauh mienh gorngv mbuox Tin-Hungh ‘Yie zuqc mborqv njaaux liuz, yiem naaiv mingh yie maiv zoux dorngc.

³²Yie mangc maiv buatc nyei tov meih njaaux yie. Se gorngv yie zoux zuiz, yiem naaiv mingh yie maiv zoux aqv.’

³³Tin-Hungh oix zuqc ziux meih oix nyei winh bun meih, weic zuqc meih nqemh ninh zoux nyei sic. Meih ganh oix zuqc ginv, maiv zeiz yie. Weic naaiv ziux meih hiuv nyei gunv gorngv aqv.

³⁴“Cong-mengh mienh oix gorngv mbuox yie, muangx yie wuov deix mienh guai mienh oix gorngv,

³⁵“Yopv gorngv waac yaac maiv hiuv haaix nyungc, ninh nyei waac maiv maaih gorn-baengx.

³⁶Feix duqv bun Yopv zuqc seix taux ndiev. Weic zuqc ninh dau nyei waac hnangv orqv mienh nor.

³⁷Ninh ngaengc Tin-Hungh aengx jaa ninh nyei zuiz, ninh yiem yie mbuo mbu'ndongx mbaix buoz gorngv waac camv nyei huotv Tin-Hungh.”