Read Iu Mien Yopv 35 Bible Online

Yopv 35 - Iu Mien bible

Yopv 35

¹E^li^hu aengx gorngv,

²“Meih hnamv daaih naaiv se baengh fim nyei fai? Meih gorngv, ‘Yie gauh baengh fim Tin-Hungh?’

³meih cingx daaih naaic Tin-Hungh, ‘Yie duqv haaix nyungc longx? Yie maiv baamz zuiz yie duqv haaix nyungc gauh longx baamz zuiz wuov deix?’

⁴“Yie oix dau meih yaac dau caux meih yiem nyei loz-gaeng doic.

⁵“Cau hmien mangc wuov lungh! Mangc yiem meih gu'nguaaic hlang nyei mbuonx.

⁶Se gorngv meih baamz zuiz, meih zoux haaix nyungc hoic Tin-Hungh? Se gorngv meih dorngc zuiz camv jienv faaux, meih nyei zuiz hnangv haaix nor zoux bun ninh?

⁷Se gorngv meih zoux kuv mienh, meih jaa haaix nyungc bun ninh? Fai ninh yiem meih nyei buoz zipv haaix nyungc?

⁸Meih zoux orqv sic kungx hoic baamh mienh hnangv meih nor. Meih zoux kuv mienh kungx tengx baamh mienh duqv longx.

⁹“Mienh laaix zuqc zeix camv ziouc heuc, ninh mbuo tov tengx biaux ndutv henv wuov deix nyei buoz.

¹⁰Mv baac maiv maaih haaix dauh gorngv, ‘Zeix yie daaih Wuov Dauh Tin-Hungh, se bun mienh lungh muonz zanc baaux nzung wuov dauh, yiem haaix?

¹¹Ninh njaaux yie mbuo gauh camv njaaux ndau-beih nyei hieh zoih, yaac bun yie mbuo maaih cong-mengh gauh camv yiem lungh nyei norqc.’

¹²Ninh mbuo heuc jienv tov tengx mv baac Tin-Hungh maiv dau, weic zuqc orqv mienh maux haic.

¹³Ninh mbuo baeqc baeqc heuc, Tin-Hungh zungv maiv muangx. Nernh Jiex Wuov Dauh maiv guen maiv sic nyei.

¹⁴“Wuov nyungc, meih gorngv meih mangc maiv buatc Tin-Hungh, ninh ziouc gauh fatv maiv oix mangc meih. Meih yaac gorngv meih nyei sic yiem ninh nyei nza'hmien, meih yaac zuov jienv ninh.

¹⁵Ih zanc meih hnamv daaih, maiv gunv Tin-Hungh qiex jiez, ninh maiv dingc zuiz, mienh baamz zuiz ninh maiv gunv aqv.

¹⁶Weic naaiv Yopv gorngv jienv maiv lamh longc nyei waac mingh, gorngv waac camv yaac maiv hiuv ninh gorngv haaix nyungc.”