Read Iu Mien Yopv 38 Bible Online

Yopv 38 - Iu Mien bible

Yopv 38

¹Wuov zanc ZIOUV yiem nziaaux-zunc dau Yopv nyei waac. Ninh gorngv,

²“Naaiv dongh haaix dauh longc maiv maaih wuonh zaang nyei waac bun yie nyei za'eix muangh mingh?

³Meih oix zuqc liuc leiz ziangx hnangv dauh jun-zeiv mienh. Yie oix naaic meih, meih yaac oix zuqc dau yie.

⁴“Yie liepc baamh gen nyei gorn-ndoqv wuov zanc, meih yiem haaix? Se gorngv meih hiuv, mbuox yie maah!

⁵Haaix dauh dingc ndau lomh haaix hlo? Daaix meih hiuv nyei saah? Haaix dauh baeng hlaang ndorqc?

⁶Ndau nyei gorn-ndoqv liepc yiem haaix nyungc gu'nguaaic? Haaix dauh an baamh gen nyei gorqv gauh longc jienv jiex wuov norm la'bieiv?

⁷Wuov zanc lungh ndorm nyei hleix lomh nzoih baaux nzung, zuangx fin-mienh[152] njien-youh nyei heuc.

⁸“Koiv nyei wuom baetv cuotv hnangv gu'nguaaz cuotv maa nyei ga'sie wuov zanc, haaix dauh guon gaengh dangv jienv koiv?

⁹Se yie longc mbuonx buang jienv koiv, yaac longc hmuangx hoz beu jienv ninh.

¹⁰Yie dingc koiv nyei gapv-jaaix, an jienv gaengh caux gaengh sorn,

¹¹yaac gorngv, ‘Meih daaih taux naaiv hnangv, maiv dungx jiex ndaangc, meih henv haic nyei wuom-laangc oix zuqc dingh njiec naaiv.’

¹²“Yopv aac, yiem meih nyei seix zeiv meih duqv hatc jiex lungh ndorm, yaac bun lungh ndorm nziouv hiuv duqv ninh nyei dorngx,

¹³weic bun ninh haih ziux jomc lungh gorn, yaac zunc orqv mienh cuotv ninh bingx nyei dorngx?

¹⁴Ndau-beih goiv yienc hnangv mborqv jienv yienx nyei ba'naih nie, maanc muotc hinc cuotv mengh nyei hnangv lui-houx nor.

¹⁵Orqv mienh nyei njang zuqc zorqv nqoi, ziouc dangv jienv maiv bun ninh mbuo zoux doqc nyei sic.[153]

¹⁶“Meih bieqc jiex taux koiv nyei nyuonh, fai yangh jiex koiv-ndoqv ndo jiex nyei dorngx fai?

¹⁷Maaih haaix dauh bun meih hiuv duqv zuqc daic nyei gaengh? Yiemh gen hmuangx nyei dorngx nyei gaengh meih buatc jiex nyei fai?

¹⁸Meih hiuv duqv ndau-beih ndongc haaix jangv fai? Meih hiuv duqv naaiv deix yietc zungv nor, gorngv mbuox yie maah!

¹⁹“Njang yiem nyei dorngx yangh haaix mingh? Hmuangx yiem nyei dorngx yiem haaix?

²⁰Meih haih dorh ninh mingh taux ninh nyei dorngx, weic bun meih hiuv duqv mingh ninh nyei biauv wuov diuh jauv fai?

²¹Meih za'gengh hiuv nyei, weic zuqc zeix baamh gen wuov zanc meih zungv cuotv seix daaih aqv. Meih yiem nyei hnoi-nyieqc gengh camv haic.

²²“Meih bieqc jiex sorng nyei lamz, fai buatc jiex borqc nyei lamz fai?

²³Yie liouh jienv sorng caux borqc weic zeqc naanc nyei ziangh hoc, weic mborqv jaax caux mborqv domh jaax nyei hnoi.

²⁴Mingh taux njang bun nqoi nyei dorngx yiem haaix? Fai mingh taux dong bung nyei nziaaux bun nzaanx buangv ndau-beih nyei dorngx yiem haaix?

²⁵“Haaix dauh weic domh mbiungc wetv wuom-zuonx, yaac koi jauv bun mba'lingc douz?

²⁶Haaix dauh bun mbiungc duih njiec maiv maaih mienh yiem nyei ndau, caux maiv maaih mienh yiem nyei deic-bung-huaang?

²⁷Haaix dauh bun ndau-huaang ndau-nqaai duqv wuom gaux weic yungz ndau cuotv miev-maeng?

²⁸Mbiungc maaih die nyei fai? Fai haaix dauh yungz mbiungc-suiv ndiepv?

²⁹Haaix dauh zoux sorng nyei maa? Lungh zaangc nyei mbiungc-suiv gitv, haaix dauh yungz daaih?

³⁰Wuom ngaengc mingh hnangv la'bieiv, koiv nyei wuom-minc yaac gitv benx sorng.

³¹“Meih haih zorqv Siec Muoz-Sieqv Hleix ndoh jienv, fai jaiv nqoi Faam-Cing Hleix nyei hlaang fai?

³²Meih haih dorh hleix-guanh[154] ziux ninh mbuo nyei gueix, fai dorh Ba'dauv Hleix caux gan ninh nyei hleix fai?

³³Meih hiuv duqv lungh nyei leiz-latc fai? Meih haih bun naaiv deix leiz-latc gunv lungh ndiev fai?

³⁴“Meih haih heuc mbuonx duih mbiungc njiec yiemx jienv meih fai?

³⁵Meih haih paaiv mba'lingc njiec, mba'lingc ziouc mbuox meih, ‘Yie mbuo yiem naaiv’?

³⁶Haaix dauh bun mienh nyei hnyouv[155] maaih cong-mengh, yaac bun hnyouv[156] maaih wuonh zaang?

³⁷Haaix dauh maaih cong-mengh saauv mbuonx? Fai haaix dauh haih dox cuotv lungh nyei wuom-ongx,

³⁸bun nie-mbung gitv benx ndunh, nie-ndunh yaac gitv jienv jaax?

³⁹“Sienh mbaapv jienv yiem ninh mbuo nyei kuotv fai yiem mbueiz nyei dorngx zuov, meih haih lorz ga'naaiv bun nyanc, fai bun sienh lunx duqv nyanc beuv?

⁴¹Norqc aa laaix maiv maaih ga'naaiv nyanc jiex naaiv jiex wuov, ninh nyei dorn heuc tov Tin-Hungh tengx. Haaix dauh lorz ga'naaiv bun norqc aa nyanc?