Read Iu Mien Yopv 39 Bible Online

Yopv 39 - Iu Mien bible

Yopv 39

¹“La'bieiv-mbaengx nyei hieh yungh haaix zanc njiec dorn, meih hiuv nyei fai? Njaih nyeiz njiec dorn meih buatc jiex nyei?

²Ninh maaih jienv dorn nyei hlaax-nyieqc meih haih saauv nyei fai? Haaix zanc njiec dorn meih hiuv nyei?

³Meih hiuv duqv ninh mbuo haaix zanc mbaapv njiec, bun ninh mbuo nyei dorn ndortv ndau fai?

⁴Ninh mbuo nyei dorn henv jienv faaux, yiem lomc-huaang hlo daaih. Ninh mbuo guangc maa mingh yaac maiv nzuonx.

⁵“Haaix dauh bungx hieh lorh? Haaix dauh jaiv ninh nyei hlaang?

⁶Yie zorqv ndau-huaang benx ninh nyei biauv, bun ndau-nzaaih benx ninh yiem nyei dorngx.

⁷Ninh jatv zingh coh coh nyei qiex, maiv haiz zunc saeng-kuv nyei mienh heuc nyei qiex mbui.

⁸Ninh youh gormx mbong benx ninh nyei miev-ciangv, ninh qaqv lorz nyungc-nyungc miev-maeng nyanc.

⁹“Hieh ngongh kangv fu-sux meih fai? Ninh oix yiem meih nyei miev-zoh ga'hlen bueix jiex muonz fai?

¹⁰Meih haih longc hlaang ndoh jienv hieh ngongh laih ndau fai? Ninh oix gan meih baah yuonh komv nyei dorngx fai?

¹¹Weic zuqc ninh maaih qaqv henv meih haih kaux ninh fai? Meih zorqv meih nyei gong-hniev jiu bun ninh zoux?

¹²Meih bungx hnyouv ninh dorh meih nyei laangh ziqc nzuonx daaih? Yaac siou meih nyei mbiauh taux mborqv mbiauh nyei ciangv?

¹³“Norqc lorh torh njien-youh nyei yaapv ndaatv, mv baac sin nyei biei caux ndaatv nyei biei beiv maiv taux norqc nyieh nyei.[157]

¹⁴Norqc lorh torh ndauc jaux guangc wuov ndau, bun ndau tengx ninh nyei jaux siouv.

¹⁵Ninh maiv hnamv taux haih zuqc zaux caaiv huv, fai hieh zoih haih caaiv waaic.

¹⁶Ninh zoux doqc bun ninh nyei dorn, hnangv maiv zeiz benx ninh ganh nyei dorn nor. Maiv gunv ninh ndortv qaqv, ninh yaac maiv korv-fiqv,

¹⁷weic zuqc Tin-Hungh maiv bun ninh maaih cong-mengh, yaac maiv bun ninh haih bieqc hnyouv.

¹⁸Mv baac ninh yang jienv ndaatv tiux wuov zanc, ninh jatv maaz caux geh maaz nyei mienh.

¹⁹“Yopv aac, se meih bun maaz henv fai? Se meih bun maaz nyei jaang maaih nzong ndaauv fai?

²⁰Meih bun ninh biu hnangv jopv-nyeic, bun ninh tauv qiex mbui haeqv mienh gamh nziex?

²¹Ninh yiem wuov horngz nyaaiv ndau, yaac a'hneiv ninh nyei qaqv, ninh cuotv mingh buangh dorh jienv wuoqc ginc nyei baeng.

²²Ninh jatv gamh nziex nyei sic, ninh ganh maiv gamh nziex, buatc nzuqc ndaauv, ninh yaac maiv tuix nzuonx.

²³Geh maaz mienh buix nyei forng-ndongh saev-saev nyei mbui, yaac maaih cang-ndaauv cang-nangv njapc njapc nyei.

²⁴Ninh ciouv-ciouv nyei nyaaiv ndau yaac tiux jienv mingh, yietv haiz jorng nyei qiex mbui ninh souv dingc maiv duqv aqv.

²⁵Jorng nyei qiex haaix zanc mbui ninh heuc, ‘Haev haev,’ ninh yiem go nyei hnomv zuqc mborqv jaax nyei qiex, yaac haiz jun-baeng-bieiv caux heuc nyei qiex mbui.

²⁶“Domh jaangv yang ndaatv ndaix, hungx jienv naamh bung mingh, naaiv se bangc meih nyei cong-mengh zoux fai?

²⁷Se meih paaiv domh jaangv ndaix faaux, yiem hlang nyei dorngx zoux lauz fai?

²⁸Ninh yiem hlang jiex nyei mbaengx zoux ninh nyei biauv, bangc mbaengx-ningv zoux ninh wuonv nyei dorngx.

²⁹Yiem naaiv ninh mangc jienv zorqv ga'naaiv nyanc, ninh nyei m'zing mangc duqv buatc go nyei.

³⁰Ninh nyei dorn sorqv nziaamv, zuqc daix nyei mienh nyei sei yiem haaix, domh jaangv-ngongh yaac yiem wuov.”