Read Iu Mien Yopv 4 Bible Online

Yopv 4 - Iu Mien bible

Yopv 4

¹Temaan Mienh, E^li^fatv, ziouc dau,

²“Se gorngv mienh caux meih gorngv joux waac, meih diev duqv nyei fai? Mv baac haaix dauh haih nyienz jienv maiv gorngv?

³Hnamv mangc gaax meih ganh njaaux mienh camv, yaac tengx mau nyei buoz henv jiez daaih.

⁴Meih nyei waac baav jienv ndiqv zuqc ndorpc nyei mienh, meih yaac tengx mau nyei cingh mborqc henv jiez daaih.

⁵Mv baac ih zanc zeqc naanc taux meih, meih ziouc maiv maaih noic, zeqc naanc zuqc meih, meih ziouc hnyouv mau aqv.

⁶Meih taaih Tin-Hungh ziouc bun meih maaih lamh kaux maiv zeiz? Meih zoux nyei sic maiv maaih dorngx nqemh, ziouc bun meih maaih lamh hnamv maiv zeiz?

⁷“Hnamv mangc gaax! Maiv zoux dorngc nyei mienh maaih haaix dauh zuqc mietc jiex nyei fai? Maaih haaix dauh hnyouv zingx nyei mienh zuqc pai guangc?

⁸Yie buatc jiex, zoux orqv [13] haaz waaic sic nyei nyim[14] nyei mienh, ziouc hnangv wuov nor siou.

⁹Tin-Hungh biomv qiex bun ninh mbuo zuqc mietc, ninh nyei ga'qiex baetv cuotv bun ninh mbuo zutc nzengc.

¹⁰Sienh heuc nyei qiex caux sienh ciouv nyei qiex sekv, sienh lunx nyei nyaah zuqc nauv.

¹¹Sienh henv maiv maaih ga'naaiv zorqv nyanc ziouc daic mi'aqv. Sienh nyeiz nyei dorn yaac zuqc nzaanx nzengc.

¹²“Maaih joux waac sekv-sekv nyei taux yie, yie nyei m'normh haiz naaiv deix waac-sapv,

¹³doix yie lungh muonz zanc m'njormh ndo nyei ziangh hoc, mbeix mbeix maiv benx, hnamv naaiv hnamv wuov,

¹⁴haeqv yie gamh nziex, sin zinx, bun yie ziangh sin nyanh nyanh nyei.[15]

¹⁵Maaih gorng nziaaux[16] zuqc yie nyei hmien, yie nyei sin-biei jiez nzengc.

¹⁶Nziaaux dingh yaac maaih nyungc yiem wuov, mv baac yie mangc maiv cuotv ninh nyei fangx zeiv. Yie nyei m'zing buatc nyungc ga'naaiv nyei fangx, sekv nzieqc nyei. Nqa'haav yie haiz qiex gorngv,

¹⁷‘Baamh mienh haih yiem Tin-Hungh nyei nza'hmien baengh fim nyei fai?[17] Baamh mienh haih yiem Zeix Ninh Daaih Wuov Dauh nyei nza'hmien cing-nzengc nyei fai?[18]

¹⁸Tin-Hungh zungv maiv bungx hnyouv ninh nyei bou, yaac gox ninh nyei fin-mienh zoux dorngc,

¹⁹hnangv naaic ninh gauh maiv bungx hnyouv longc nie zoux daaih nyei baamh mienh,[19] se maaih nie-mbung zoux gorn-ndoqv yaac haih zuqc mietc hnangv baeqc yieqc.

²⁰Yiem lungh ndorm taux lungh hmuangx mbu'ndongx ninh mbuo zuqc mietc, yietc liuz maiv maaih haaix dauh liuc leiz.

²¹Se gorngv yiem ninh mbuo nyei ndopv-liuh gu'nyuoz nyei hlaang zuqc baeng cuotv, ninh mbuo ziouc maiv daic yaac maiv maaih cong-mengh fai?’