Read Iu Mien Yopv 40 Bible Online

Yopv 40 - Iu Mien bible

Yopv 40

¹ZIOUV aengx gorngv mbuox Yopv,

²“Yopv aah! Daanh nyei mienh oix caux Nernh Jiex Wuov Dauh nzaeng nyei fai? Caux Tin-Hungh nzaeng nyei mienh dau ninh maah!”

³Yopv ziouc dau ZIOUV. Ninh gorngv,

⁴“ZIOUV aac, yie se ziangh maiv benx haaix nyungc mienh, yie hnangv haaix nor haih dau meih? Yie zungv longc buoz buang jienv nzuih.

⁵Yie gorngv nzunc liuz, yie ziouc maiv dau, gorngv i nzunc, yie ziouc maiv aengx jaa gorngv aqv.”

⁶Wuov zanc ZIOUV yiem nziaaux-zunc dau Yopv nyei waac. Ninh gorngv,

⁷“Meih oix zuqc liuc leiz ziangx hnangv jun-zeiv mienh nor. Yie oix naaic meih, meih oix zuqc dau yie.

⁸“Meih oix bun cing yie maiv baengh fim fai? Meih oix dingc yie zoux dorngc weic bun meih ganh horpc fai?

⁹Meih maaih buoz hnangv Tin-Hungh nyei buoz henv fai? Meih maaih qiex ndomh ndomh nyei mbui hnangv ninh nyei qiex mbui fai?

¹⁰Wuov nyungc, oix zuqc longc njang-laangc zorng nzueic, yaac longc njang-laangc nyei haangh daauh dorngx lui zuqv.

¹¹Zoux maux nyei mienh meih qiex jiez, nouz haic, gunv zatv ninh mbuo njiec aiv.

¹²Mangc dauh dauh ceng-hlo nyei mienh yaac baeng ninh mbuo ndortv njiec, zorqv orqv mienh caaiv njiec ninh mbuo yiem nyei dorngx.

¹³Zorqv ninh mbuo yietc zungv biopv jienv nie-mbung, yaac ndoh ninh mbuo yiem yiemh gen.[158]

¹⁴Hnangv naaic yie ziouc nyiemc bun meih, meih nyei mbiaauc jieqv buoz haih njoux duqv ganh.

¹⁵“Mangc Mbe^he^motv[159] maah! Yie zeix ninh hnangv yie zeix meih. Ninh nyanc miev hnangv ngongh nor.

¹⁶Ninh nyei qaqv yiem ninh nyei jaaiv, ninh nyei ga'sie nyei orv yaac maaih qaqv henv.

¹⁷Ninh bun ninh nyei dueiv ngaengc[160] hnangv si^ndaa zongh ndiangx, ninh nyei camh zuih nyei jaan ciqv jienv jaax.

¹⁸Ninh nyei mbungv hnangv dongh siqv ndongh, ninh nyei buoz-zaux hnangv hlieqv-biaav.

¹⁹Ninh se Tin-Hungh zeix daaih nyei da'yietv dauh, kungx Zeix Ninh Daaih Wuov Dauh haih hingh ninh.[161]

²⁰Zuangx mbong cuotv nyanc nyei ga'naaiv bun ninh, benx yietc zungv[162] hieh zoih nziaauc nyei dorngx.

²¹Ninh bueix njiec ndiangx-njimv ga'ndiev, yiem njaangh nyei luoqc diqc lomc gu'nyuoz.

²²Weic zuqc ndiangx-njimv tengx ninh bingx laangh, ndoqv-hlen nyei suiv-liemh ndiangx weih gormx ninh.

²³Maiv gunv wuom seix, ninh maiv gamh nziex, maiv gunv Jor^ndaen Ndaaih nyei wuom congx zuqc ninh nyei nzuih baengx, ninh yaac maiv huaang.

²⁴Haaix dauh haih buang jienv ninh nyei m'zing zorqv ninh? Haaix dauh haih zorqv ninh aengx cunx tong ninh nyei mba'zorng?