Read Iu Mien Yopv 41 Bible Online

Yopv 41 - Iu Mien bible

Yopv 41

¹“Yopv aah! Meih haih longc diux zorqv Le^wi^aa^taan, fai longc hlaang ndoh ninh nyei mbietc fai?

²Meih haih longc hlaang cunx ninh nyei mba'zorng, fai longc ngau kuangx ninh nyei haah baah fai?

³Ninh oix qaqv tov meih korv-lienh nyei fai? Ninh oix longc suonc nyei waac caux meih gorngv?

⁴Ninh oix caux meih liepc ngaengc waac, laengz yietc liuz zoux meih nyei nouh?

⁵Meih haih zorqv ninh dorngx norqc longc a'nziaauc, fai ndoh jienv hlaang ken nduov meih nyei sieqv-lunx a'hneiv fai?

⁶Zorqv mbiauz mienh dorh ninh daaih gorngv jaax-zinh, saeng-eix mienh ziouc zorqv ninh bun nqoi fai?

⁷Meih haih longc cang-fou cunx ninh nyei ndopv, fai longc nzopv mbiauz cang nzopv ninh nyei m'nqorngv fai?

⁸Longc meih nyei buoz muoqv ninh, haaix zanc jangx zuqc meih caux ninh mborqv jaax, meih yietc liuz maiv aengx zoux aqv.

⁹Mienh maaih lamh hnamv oix zorqv ninh mv baac maiv zeiz aqv, daan buatc ninh hnangv, daamv mapv aqv, king njiec ndau.

¹⁰Maiv maaih haaix dauh ciouv gaux cuoqv ninh. Wuov nyungc, haaix dauh haih yiem yie nyei nza'hmien souv duqv wuonv?

¹¹Maaih haaix dauh bun haaix nyungc yie, dongh yie oix zuqc winh bun ninh? Lungh ndiev nyei maanc muotc yietc zungv se yie nyei.

¹²“Yie yaac maiv nyienz jienv maiv gorngv taux ninh nyei buoz-zaux, fai ninh nyei domh qaqv fai ninh nyei sin liouc.

¹³Haaix dauh haih ciev ninh nyei ga'nyiec wuov yiemc lui? Haaix dauh haih nzopv bieqc ninh nyei i yiemc hlieqv-lui?[163]

¹⁴Haaix dauh haih maeqv nqoi ninh nyei nzuih baengx? Huing gormx ninh nyei nzuih nyei nyaah haeqv mienh gamh nziex haic.

¹⁵Ninh nyei diqc daanz nyei jiex benx yietc liouz yietc liouz hnangv torngv-baaih nor, nitv jienv jaax maqc nyei, gapv jienv ndipc nyei hnangv la'bieiv nor ngaengc.[164]

¹⁶Naaiv deix jiex yietc kuaaiv gapv yietc kuaaiv ndipc haic, qiex zungv maiv haih jiex mbu'ndongx-qangx.

¹⁷Jiex gitv jienv jaax, yietc kuaaiv lapv yietc kuaaiv, maiv haih maeqv maiv nqoi.

¹⁸Ninh ciuv ziouc maaih njang njapc dangh cuotv daaih. Ninh nyei m'zing hnangv lungh ndorm nziouv nyei njang-laangc.

¹⁹Ninh nyei nzuih cuotv douz hnangv douz-baav, yaac maaih douz-fing ndaix cuotv.

²⁰Ninh nyei mba'zorng cuotv douz-sioux, hnangv caeng mbueix caux zieqc jienv nyei luoqc diqc guaengv nor.

²¹Ninh biomv qiex bun douz-taanx zieqc, ninh nyei nzuih cuotv douz-mbietc.

²²Ninh nyei jaang za'gengh henv haic, da'faanh buangh ninh wuov deix gamh nziex! haic.

²³Ninh nyei orv-nziu ciqv jienv jaax zietc nyei, ngaengc nyei, hnangv dox daaih nyei hlieqv nor, nqamv maiv dongz.

²⁴Ninh nyei hnyouv ngaengc hnangv la'bieiv, hnangv ga'ndiev maengx morc.

²⁵Ninh jiez sin, mienh henv mienh[165] gamh nziex, ninh zoux ciouv, ninh mbuo hnyouv waaic nzengc.

²⁶Maiv gunv longc nzuqc ndaauv nzopv, yaac hoic maiv zuqc ninh, liemh nzopv nyei cang caux biu nyei cang yaac hoic maiv zuqc ninh.

²⁷Weic ninh nor, hlieqv dorngx mbiauh nqaauv, dongh siqv dorngx ndiangx-latv.

²⁸Forng haeqv maiv duqv ninh biaux, bungx la'bieiv nyei ndopv-hlaang[166] weic ninh dorngx mbiauh nqaauv gorn.

²⁹Ndiangx-ndonx dorngx mbiauh nqaauv gorn, ninh yaac jatv biu cang nyei qiex mbui.

³⁰Ga'sie ndoqv nyei jiex laic hnangv nie-mor huv. Ninh luih jienv gan wuom-bamc jiex hnangv nyueih mbiauh nyei jaa-sic.[167]

³¹Ninh bun ndo nyei wuom mbueix hnangv caeng mbueix, bun koiv hnangv caeng gu'nyuoz nyei ndie-youh.

³²Ninh jiex mingh nyei jauv nqa'haav maengx cuotv njang njapc njapc nyei, mienh ziouc hnamv daaih koiv ndo nyei dorngx maaih mba'biei baeqc.

³³Yiem lungh ndiev maiv maaih haaix nyungc hnangv ninh. Ninh benx zeix cuotv nyei ga'naaiv, yaac maiv gamh nziex haaix nyungc.

³⁴Ninh mangc nyungc-nyungc yiem hlang nyei ga'naaiv. Ninh zoux zuangx hieh zoih nyei hungh.”