Read Iu Mien Yopv 5 Bible Online

Yopv 5 - Iu Mien bible

Yopv 5

¹“Yopv aah! Ih zanc gunv heuc maah! Maaih haaix dauh dau meih? Meih haih lorz haaix dauh fin-mienh tengx?

²Qiex jiez nyei jauv haih daix daic hngongx nyei mienh, mueic jieqv nyei sic yaac daix daic hnamv maiv hiuv haaix nyungc nyei mienh.

³Yie buatc hngongx nyei mienh liepc wuonv hnangv njiec nzungh nor, mv baac yie liemh zeih zioux ninh yiem nyei dorngx.

⁴Ninh nyei dorn sieqv lorz maiv duqv baengh orn nyei dorngx, yiem zingh gaengh ndaangc ninh mbuo zuqc zeix, yaac maiv maaih haaix dauh njoux.

⁵Ninh siou nyei gaeng-zuangx zuqc hnyouv sie nyei mienh nyanc, liemh ziangh jienv njimv gu'nyuoz yaac zorqv nzengc. Ngorc nqaatv nyei mienh hungh hungh hae-hae nyei oix duqv ninh nyei zinh zoih.

⁶Zeqc naanc maiv zeiz yiem nie-mbung cuotv, kuonx naanh maiv zeiz yiem ndau-ndiev butv cuotv daaih.

⁷Mv baac mienh cuotv seix zungv zuqc buangh kuonx naanh hnangv douz-fing[20] ndaix faaux.

⁸“Se gorngv yie nor, yie oix lorz Tin-Hungh, oix zorqv yie nyei sic jiu bun ninh.

⁹Ninh zoux hlo nyei sic zungv hnamv maiv zaaic, yaac zoux mbuoqc horngh nyei sic zungv saauv maiv hingh.

¹⁰Ninh bun mbiungc njiec ndau-beih, bun wuom yungz liangx-ndeic.

¹¹Ninh zorqv zoux faix nyei mienh bouh faaux hlang, yaac bun nzauh nyiemv nyei mienh duqv yiem longx.

¹²Ninh porx waaic guv guaix mienh daav nyei za'eix, ninh mbuo nyei buoz ziouc zoux maiv cuotv haaix nyungc.

¹³Ninh bun cong-mengh mienh zuqc ninh mbuo ganh nyei za'eix hlopv ninh mbuo, yaac bun guv guaix mienh nyei za'eix siepv-siepv nyei zuqc mietc.

¹⁴Yiem lungh hnoi zanc ninh mbuo buangh zuqc hmuangx, lungh aanx zanc huaax naaiv huaax wuov hnangv lungh muonz zanc nor.

¹⁵Mv baac Tin-Hungh njoux mienh jomc mienh biaux ndutv, maiv zuqc mienh zeix.[21] Bun dangx-donx nyei mienh biaux ndutv mienh henv mienh nyei buoz.

¹⁶Hnangv naaic mienh jomc mienh maaih lamh hnamv dorngx, maiv baengh fim nyei mienh yaac nqapc jienv nzuih.

¹⁷“Tin-Hungh gorngv-njaaux nyei mienh maaih orn-lorqc. Weic naaiv maiv dungx mangc piex Nernh Jiex Wuov Dauh[22] mborqv njaaux

¹⁸weic zuqc Tin-Hungh bun zuqc mun, mv baac ninh beu jienv, ninh mborqv, mv baac ninh nyei buoz zorc longx.

¹⁹Ninh oix njoux meih biaux ndutv juqv nzunc zeqc naanc, taux siec nzunc zeqc naanc, maiv maaih haaix nyungc hoic meih.

²⁰Ngorc hnaangx nyei ziangh hoc, ninh njoux meih biaux ndutv, maiv zuqc daic. Mborqv jaax nyei ziangh hoc ninh njoux biaux ndutv nzuqc ndaauv nyei qaqv.

²¹Ninh beu jienv meih, maiv bun zuqc gorngv waac-huv nyei mienh hoic. Zuqc mietc nyei ziangh hoc taux, meih yaac maiv gamh nziex.

²²Meih buangh zuqc mietc nyei sic caux ngorc hnaangx meih ziouc kuh jatv. Meih yaac maiv gamh nziex ndau-beih nyei hieh zoih.

²³Weic zuqc meih zoux nyei ndeic zungv maiv maaih la'bieiv,[23] yiem ndeic nyei hieh zoih yaac oix caux meih horpc.

²⁴Meih ziouc hiuv duqv meih nyei ndopv-liuh yiem longx nyei. Meih zaah mangc meih nyei ba'gi yungh laanh yaac buatc maiv caa haaix nyungc.

²⁵Meih zungv oix hiuv duqv meih nyei fun-faqv oix hiaangx camv, meih nyei zeiv-fun yaac ndongc ndau-beih nyei miev.

²⁶Meih nyei siouc nyuonh ndaauv, hnyangx-jeiv gox meih cingx taux zouv, hnangv mbiauh zeiv taux ziangh hoc siou.”

²⁷“Naaiv deix yietc zungv yie mbuo longx-longx nyei zaah mangc liuz aqv. Muangx maah! Oix zuqc hiuv duqv se weic tengx meih duqv longx.”