Read Iu Mien Yopv 6 Bible Online

Yopv 6 - Iu Mien bible

Yopv 6

¹Yopv ziouc dau,

²“Feix duqv haih zorqv yie nzauh faanh nyei jauv daaih nziang, yie nyei yietc zungv kouv naanc an jienv tin-baengh nziangx,

³zungv gauh hniev koiv nyei saa-ziou. Weic naaiv yie nyei waac beqv nyei,

⁴weic zuqc Nernh Jiex Wuov Dauh nyei forng-cang yiem yie nyei sin, forng-cang nyei ndie-doqc biaux gormx sin,[24] yie zuqc Tin-Hungh longc nyungc-nyungc haeqv yie.

⁵Hieh lorh maaih miev nyanc, ninh heuc nyei fai? Ngongh maaih mbiauh nqaauv nyanc, ninh heuc nyei fai?

⁶Maiv maaih mueix nyei ga'naaiv maiv an nzauv haih nyanc duqv nyei fai? Jaux-orv[25] maaih haaix nyungc mueix doc fai?

⁷Weic yie naaiv se gamh nziev nyei ga'naaiv, yie nyei hnyouv siouc maiv duqv.

⁸“Feix duqv ziux yie tov nyei yie gengh haih duqv, Tin-Hungh yaac oix ceix bun dongh yie oix duqv nyei.

⁹Feix duqv Tin-Hungh hlienx yie huv muonc, sung ninh nyei buoz pai yie guangc.

¹⁰Hnangv naaic zoux haih orn yie nyei hnyouv, maiv gunv yie nyei baengc siem yie zungv njien-youh nyei tiux,[26] weic zuqc yie maiv ngaengc Cing-Nzengc Wuov Dauh nyei waac.

¹¹“Yie maaih haaix nyungc qaqv bun yie corc haih zuov jienv? Yie nyei setv mueiz hnangv haaix nor, yie cingx daaih oix zuqc maaih noic diev?

¹²Yie nyei qaqv se la'bieiv nyei qaqv fai? Yie nyei orv sin benx dongh siqv fai?

¹³Yie ganh zungv maiv maaih qaqv tengx yie ganh aqv. Yie yaac jomc za'eix mi'aqv.

¹⁴“Haaix dauh duqv-eix maiv zoux longx bun ninh nyei loz-gaeng doic, wuov dauh guangc, maiv taaih Nernh Jiex nyei Tin-Hungh.[27]

¹⁵Yie nyei gorx-youz nduov yie hnangv wuom-seix, aengx hnangv ndoqv-zuonx haih nqaai nzengc.[28]

¹⁶Ndoqv gitv sorng ziouc hmuangx, sorng yaac ndui gu'nguaaic torngv jienv.

¹⁷Yuoqv nyei ziangh hoc sorng yuqc mi'aqv. Nyutc jorm ziouc mitc nzengc, maiv yiem ninh nyei dorngx.

¹⁸Gapv doic cuotv jauv nyei mienh leih ninh mbuo nyei jauv, ninh mbuo bieqc deic-bung-huaang ziouc zuqc mietc.

¹⁹Yiem Temaa Deic gapv doic cuotv jauv nyei mienh lorz wuom, Qe^mbaa nyei jiex jauv saeng-eix mienh maaih lamh hnamv.

²⁰Ninh mbuo maaih lamh hnamv haih duqv mv baac maiv duqv aqv. Mingh taux wuov ninh mbuo ziouc hnyouv lunc nzengc.

²¹Ih zanc meih mbuo weic yie se hnangv naaic aqv. Meih mbuo buatc yie zuqc kouv nyei sic ziouc haeqv meih mbuo gamh nziex.

²²Yie gorngv jiex ‘Tov meih mbuo bun zingh nyeic yie’? Fai ‘Longc meih mbuo nyei zinh zoih nzuiz nyaanh hmuangx bun yie’?

²³Fai yie gorngv jiex ‘Njoux yie biaux ndutv yie nyei win-wangv nyei buoz-ndiev’? Fai ‘Zuoqc yie yiem zeix mienh nyei mienh nyei buoz-ndiev cuotv daaih’?

²⁴“Njaaux yie maah! Yie ziouc maiv ko lo. Tov bun yie bieqc hnyouv yie hnangv haaix nor zoux dorngc.

²⁵Zingx nyei waac maaih hatc maaz hlo, meih mbuo gorngv-hemx mv baac gorngv-hemx haaix nyungc?

²⁶Maiv lamh hnamv nyei mienh gorngv nyei waac se hnangv nziaaux nor, wuov nyungc meih mbuo weic haaix diuc oix dau wuov deix waac?

²⁷Meih mbuo zungv dingc maengc mangc weic duqv guh hanh fu'jueiv, yaac maaic ganh nyei loz-gaeng doic weic duqv nyaanh.

²⁸“Ih zanc tov meih mbuo mangc yie, yie maiv dorng jienv meih mbuo gorngv-baeqc.

²⁹Tov meih mbuo aengx hnamv nzunc. Maiv dungx zoux maiv baengh fim. Ih zanc tov aengx hnamv nzunc. Oix zuqc bun cing yie zoux duqv zingx nyei.

³⁰Yie gorngv nyei waac[29] maaih haaix nyungc dorngc fai? Meih mbuo hnamv daaih yie maiv haih seix maiv cuotv zeqc naanc?[30]