Read Iu Mien Yopv 9 Bible Online

Yopv 9 - Iu Mien bible

Yopv 9

¹Yopv ziouc dau,

²“Yie za'gengh hiuv duqv se hnangv naaic. Mv baac mienh hnangv haaix nor haih yiem Tin-Hungh nyei nza'hmien benx zoux duqv horpc nyei mienh?

³Se gorngv haaix dauh maaih hnyouv oix caux ninh nzaeng, ninh gorngv yietc cin nzunc, mienh yaac maiv haih dau yietc nzunc.

⁴Tin-Hungh nyei hnyouv maaih cong-mengh, ninh nyei qaqv yaac henv. Haaix dauh haih ngaengc Tin-Hungh yaac ngaengc duqv hingh?

⁵“Ninh qiex jiez wuov zanc, ninh zorqv mbong mbienv nzuonx daaih. Ninh suiv mbong, mbong zungv maiv hiuv.

⁶Tin-Hungh nqamv baamh gen dongz cuotv ninh nyei dorngx, ndau nyei ndiouh yaac dongz nzengc.

⁷Ninh hatc mba'hnoi, mba'hnoi ziouc maiv cuotv, ninh aengx buang jienv zuangx hleix.

⁸Ninh ganh nduqc dauh corng lungh, yaac caaiv koiv nyei wuom-laangc.[33]

⁹Ninh zeix Ba'dauv Hleix caux Siec Muoz-Sieqv Hleix, Faam-Cing Hleix caux naamh bung nyei hleix.

¹⁰Ninh zoux hlo haic nyei sic jiex ndaangc yie mbuo haih mengh baeqc, zoux mbuoqc horngh nyei sic zungv saauv maiv hingh.

¹¹Tin-Hungh yangh yie nyei ga'hlen jiex, yie yaac mangc maiv buatc. Ninh yangh nza'hmien maengx jiex, yie yaac maiv hiuv.

¹²Ninh zorqv ninh oix longc nyei, maiv maaih haaix dauh haih laanh ninh. Haaix dauh gaamv naaic ninh, ‘Meih zoux haaix nyungc?’

¹³Tin-Hungh maiv bun ninh nyei ga'qiex fiu, ninh bun tengx Laa^hapc[34] wuov deix zuqc yiem ninh nyei zaux-ndiev.

¹⁴“Wuov nyungc yie hnangv haaix nor haih dau ninh? Yie hnangv haaix nor haih ginv waac caux ninh luonx?

¹⁵Maiv gunv yie maiv zoux dorngc, yie yaac maiv haih dau ninh. Yie oix zuqc tov siemv yie wuov dauh[35] korv-lienh yie.

¹⁶Se gorngv yie heuc ninh, ninh yaac dau yie, yie zungv maiv sienx ninh muangx yie nyei qiex.

¹⁷Ninh longc domh nziaaux buonc mborqv yie, bun yie zuqc mun nyei dorngx camv jienv faaux yaac maiv maaih gorn-baengx.

¹⁸Ninh zungv maiv bun yie tauv qiex, daaux nzuonx bun yie nyei maengc kouv taux ndiev.

¹⁹Se gorngv saaix qaqv, mangc maah! Ninh ndongc haaix henv! Se gorngv weic siemv zuiz nyei jauv, haaix dauh haih heuc ninh[36] daaih?

²⁰Maiv gunv yie maiv dorngc, yie ganh nyei nzuih oix dingc yie maaih zuiz. Maiv gunv yie maiv maaih dorngx nqemh, ninh oix bun cing yie dorngc.

²¹“Yie maiv maaih dorngx nqemh, mv baac yie maiv gunv ganh aqv. Yie youx haic yie nyei maengc.

²²Yietc zungv fih hnangv nzengc. Weic naaiv yie gorngv, maiv gunv maiv maaih dorngx nqemh nyei mienh caux orqv mienh, ninh mietc nzengc mi'aqv.

²³Mienh zuqc zeqc naanc liemh zeih daic, Tin-Hungh jatv maiv zoux dorngc nyei mienh buangh nyei zeqc naanc.

²⁴Tin-Hungh zorqv baamh gen jiu bun yiem orqv mienh nyei buoz-ndiev. Ninh buang jienv baamh gen siemv zuiz mienh nyei hmien. Se gorngv maiv zeiz ninh, benx haaix dauh?

²⁵“Yie nyei hnoi-nyieqc jiex siepv hnangv saaix tiux nyei mienh tiux nor. Yie nyei hnoi liemh zeih jiex mi'aqv, yaac maiv buatc haaix nyungc longx.

²⁶Yie nyei hnoi jiex siepv hnangv siepv haic nyei nzangv nor,[37] hnangv domh jaangv njiec siepv zorqv ga'naaiv nyanc.

²⁷Se gorngv yie gorngv, ‘Yie oix la'kuqv yie ngopv nyei sic, yie oix guangc nqoi hmien nzauh nyei jauv, zoux njien-youh aqv,’

²⁸yie ziouc gamh nziex yie nyei yietc zungv kouv naanc, weic zuqc yie hiuv duqv meih maiv funx yie maiv maaih dorngc nyei dorngx.

²⁹Yie zungv zuqc dingc zuiz. Wuov nyungc yie weic haaix diuc baeqc baeqc zoux kouv?

³⁰Se gorngv yie longc sorng nzaaux sin, longc nzie nyei wuom nzaaux buoz,

³¹mv baac meih zoi yie ndortv kuotv, liemh yie nyei lui-houx oix youx yie.

³²“Tin-Hungh maiv zeiz baamh mienh hnangv yie nor, yie ziouc maiv haih caux ninh zoux sic.

³³Feix duqv maaih[38] dauh yiem yie mbuo mbu'ndongx tengx muangx, yaac haih tengx yie mbuo i bung dunx sic.[39]

³⁴Tov Tin-Hungh zorqv nqoi ninh nyei biaav maiv mborqv yie, yaac tov maiv dungx zoux gamh nziex nyei sic haeqv yie.

³⁵Wuov nyungc yie ziouc gorngv waac yaac maiv gamh nziex ninh, weic zuqc yie hiuv duqv yie nyei hnyouv maiv hnangv naaic.