Read Iu Mien Singx Nzung 103 Bible Online

Singx Nzung 103 - Iu Mien bible

Singx Nzung 103

¹Singx Nzung 103 Ndaawitv zoc nyei singx nzung. Yie nyei hnyouv aac, oix zuqc ceng ZIOUV. Yie longc nzengc hnyouv ceng ninh nyei cing-nzengc mbuox.

²Yie nyei hnyouv oix ceng ZIOUV, yaac maiv dungx la'kuqv ninh nyei yietc zungv en-zingh.

³Ninh guangc yie nyei[283] yietc zungv zuiz, yaac zorc yie nyei yietc zungv baengc.

⁴Ninh zuoqc yie nyei maengc leih ndutv ndo haic nyei kuotv,[284] ninh ziepc zuoqv nyei hnamv yie, korv-lienh yie.[285]

⁵Ninh ceix longx nyei ga'naaiv bun yie buangv eix, yie ziouc nzuonx-lunx daaih hnangv domh jaangv nor henv.

⁶ZIOUV zoux kuv sic yaac baengh fim nyei tengx zuqc zeix nyei mienh.

⁷Ninh bun Mose hiuv duqv ninh nyei za'eix, bun I^saa^laa^en Mienh hiuv duqv ninh zoux nyei sic.

⁸ZIOUV korv-lienh mienh, ceix en bun mienh, ninh maiv qiex jiez siepv, yaac maaih hnamv mienh nyei hnyouv buangv nzengc.

⁹Ninh maiv zanc-zanc hemx, yaac maiv yietc liuz qiex jiez.

¹⁰Ninh maiv ziux mbuo zoux nyei zuiz dingc, yaac maiv ziux mbuo zoux dorngc nyei jauv winh bun.

¹¹Lungh leih ndau ndongc haaix hlang, ninh hnamv taaih ninh wuov deix ndongc wuov hlo.

¹²Dong bung leih fai bung ndongc haaix go, ninh zorqv mbuo zoux dorngc nyei zuiz guangc ndongc wuov go.

¹³Die hnangv haaix nor korv-lienh ninh nyei fu'jueiv, ZIOUV yaac hnangv wuov nor korv-lienh taaih ninh nyei mienh,

¹⁴weic zuqc ninh hiuv duqv mbuo nyei sin zaangc,[286] jangx duqv mbuo benx nie-mbung.

¹⁵Baamh mienh aeqv, ninh nyei hnoi-nyieqc hnangv miev nor, ninh hnangv lomc-huaang nyei miev-biangh,

¹⁶zuqc nziaaux buonc, ziang naaic maiv maaih aqv. Ninh nyei loz-dorngx yaac maiv nyiemc ninh aqv.

¹⁷Mv baac ZIOUV ziepc zuoqv nyei hnamv taaih ninh wuov deix yietc liuz taux yietc liuz, ninh baengh fim nyei jauv yaac njiec taux ninh mbuo nyei zeiv-fun zeiv-faqv,

¹⁸se ei jienv ninh nyei ngaengc waac caux jangx ninh nyei leiz-latc wuov deix.

¹⁹ZIOUV yiem gu'nguaaic lungh liepc ninh nyei weic, ninh nyei guoqv gunv maanc muotc.

²⁰Meih mbuo, ninh nyei fin-mienh aah! Dongh ei jienv ninh hatc nyei waac, se muangx ninh nyei waac, maaih domh qaqv nyei fin-mienh, oix zuqc ceng ZIOUV.

²¹Ninh nyei zuangx baeng, se fu-sux ninh, ei jienv ninh nyei eix nyei bou aah! Oix zuqc ceng ZIOUV.

²²Meih mbuo yietc zungv zeix daaih nyei maanc muotc aah! Yiem ninh gunv nyei norm-norm dorngx, oix zuqc ceng ZIOUV. O yie nyei hnyouv aac, oix zuqc ceng ZIOUV.