Read Iu Mien Singx Nzung 105 Bible Online

Singx Nzung 105 - Iu Mien bible

Singx Nzung 105

¹Singx Nzung 105 Oix zuqc dor-ziec ZIOUV, oix zuqc jouh ninh nyei mengh, yiem maanc fingx mbu'ndongx zunh yaangh ninh zoux nyei sic.

²Oix zuqc dorng jienv ninh baaux nzung, baaux nzung ceng ninh. Oix zuqc zunh yaangh ninh zoux yietc zungv mbuoqc horngh nyei sic.

³Oix zuqc weic ninh nyei cing-nzengc mbuox bungx waac-maux. Bun zimh lorz ZIOUV nyei mienh nyei hnyouv njien-youh.

⁴Oix zuqc zimh lorz ZIOUV caux ninh nyei qaqv, zanc-zanc oix yiem ZIOUV nyei nza'hmien.

⁵Ninh nyei bou, Apc^laa^ham, nyei hoz doic, se ninh ginv daaih nyei mienh, Yaakopv nyei zeiv-fun aah! Oix zuqc jangx jienv ninh zoux liuz wuov deix mbuoqc horngh nyei sic, caux ninh zoux peix fuc nyei sic, caux ninh nyei nzuih siemv nyei waac.

⁷Ninh se ZIOUV, yie mbuo nyei Tin-Hungh. Ninh siemv nyei waac yiem gormx lungh ndiev.

⁸Ninh jangx ninh laengz nyei ngaengc waac taux yietc liuz, ninh paaiv nyei waac weic yietc cin doic,

⁹se caux Apc^laa^ham liepc nyei ngaengc waac, dongh ninh houv jienv laengz bun I^sakc nyei ngaengc waac.

¹⁰Ninh zorqv naaiv deix ngaengc waac caux Yaakopv liepc benx leiz-nyeic, jiu bun I^saa^laa^en weic zoux yietc liuz nyei ngaengc waac.

¹¹Ninh gorngv, “Yie oix zorqv Kaa^naa^an Deic-Bung jiu bun meih[295] benx meih nzipc nyei buonc.”

¹²Ninh mbuo mienh zoqc wuov zanc, se mienh za'gengh zoqc nyei, kungx dingh zepv yiem wuov norm deic-bung hnangv,

¹³ninh mbuo yiem naaiv norm deic-bung jiex wuov norm deic-bung, yiem yietc norm guoqv mingh taux ganh norm guoqv.

¹⁴Ninh maiv bun haaix dauh mienh zeix ninh mbuo, weic ninh mbuo nyei gorn ninh hemx ziex dauh hungh diex.

¹⁵Ninh gorngv, “Maiv dungx zoux haaix nyungc bun yie longc youh orn daaih nyei mienh, yaac maiv dungx hoic yie nyei douc waac mienh.”

¹⁶Ninh bun wuov norm deic-bung zuqc domh huaang domh ngorc, dongh ninh mbuo kaux nyei laangh ziqc dangx nzengc,

¹⁷ninh paaiv laanh mienh mingh ndaangc ninh mbuo, se Yosepv, zuqc maaic mingh zoux nouh.

¹⁸Yosepv nyei zaux zuqc hlieqv-limc ndoh jienv mun, yaac zuqc hlieqv-kou kou jienv jaang,

¹⁹zuov taux ninh gorngv oix cuotv nyei sic cuotv daaih zien. ZIOUV nyei waac seix ninh.

²⁰Hungh diex paaiv mienh mingh bungx nqoi ninh, gunv zuangx fingx wuov dauh bungx ninh cuotv,

²¹liepc ninh zoux hungh dinc nyei ziouv, bun ninh gunv hungh dinc maaih nyei yietc zungv,

²²bun ninh sueih eix njaaux hungh diex nyei jien, njaaux hungh diex nyei mienh gox maaih cong-mengh.

²³Nqa'haav I^saa^laa^en daaih taux I^yipv, Yaakopv dingh zepv yiem Haam nyei deic-bung.[296]

²⁴ZIOUV bun ninh nyei baeqc fingx hiaangx camv, yaac bun ninh mbuo gauh henv jiex[297] ninh mbuo nyei win-wangv.

²⁵Ninh bun win-wangv nyei hnyouv nzorng ninh nyei baeqc fingx, zoux guv guaix nyei sic hoic ninh nyei bou.

²⁶Ninh paaiv ninh nyei bou, Mose, caux ninh ginv daaih wuov dauh Aalon.

²⁷Ninh mbuo yiem wuov deix mienh mbu'ndongx zoux jangx-hoc, yiem Haam nyei deic-bung zoux mbuoqc horngh nyei sic.

²⁸Ninh bun hmuangx daaih om jienv deic-bung, I^yipv Mienh yaac ngaengc[298] ninh nyei waac.

²⁹Ninh bun ninh mbuo nyei wuom benx nziaamv, bun ninh mbuo nyei mbiauz daic nzengc.

³⁰Yiem ninh mbuo nyei deic-bung, liemh ninh mbuo nyei hungh dinc gu'nyuoz maaih gaengv buangv nzengc.

³¹Ninh gorngv ziouc maaih mungz faanv, maaih gaeng-mbung faanv buangv deic-bung.

³²Ninh bun borqc div mbiungc duih njiec, bun mba'lingc njapc njapc nyei gormx deic-bung.

³³Ninh mborqv waaic ninh mbuo nyei a'ngunc hmei caux ngongh nyorx ndiangx, mborqv ninh mbuo nyei deic-bung nyei ndiangx nauv nzengc.

³⁴Ninh gorngv yietc joux, jopv-nyeic ziouc daaih, jopv-nyeic lunx saauv maiv hingh,

³⁵nyanc ninh mbuo nyei deic-bung nyei nyungc-nyungc lai-coix, caux yiem lingh deic cuotv nyei gaeng-zuangx.

³⁶Ninh daix yiem ninh mbuo nyei deic-bung gu'nyuoz nyei yietc zungv dorn-la'gauv, se mouz buonc nyei daauh dauh dorn.

³⁷Nqa'haav ninh dorh I^saa^laa^en Mienh, caux jienv jiem nyaanh cuotv, yiem ninh mbuo nyei fingx-fingx maiv maaih haaix dauh mau.[299]

³⁸Ninh mbuo biaux cuotv, I^yipv Mienh a'hneiv nyei, weic zuqc ninh mbuo gamh nziex haic I^saa^laa^en Mienh.

³⁹Tin-Hungh bun mbuonx om jienv, lungh muonz zanc bun douz ziux njang.

⁴⁰Ninh mbuo tov, ninh ziouc bun norqc mbunh ndaix daaih, yaac bun laangh ziqc yiem lungh daaih bun ninh mbuo nyanc beuv.

⁴¹Ninh mborqv nqoi la'bieiv, wuom ziouc baetv cuotv liouc jiex deic-bung-huaang benx diuh ndaaih,

⁴²weic zuqc ninh jangx ninh caux ninh nyei bou, Apc^laa^ham, laengz nyei cing-nzengc waac.

⁴³Ninh dorh ninh nyei baeqc fingx njien-youh nyei cuotv, dorh jienv ninh ginv daaih nyei mienh baaux jienv nzung mingh.

⁴⁴Ninh zorqv ganh fingx mienh nyei deic-bung jiu bun ninh mbuo. Ninh mbuo duqv nzipc wuov deix mienh ndortv qaqv zoux nyei buonc

⁴⁵weic bun ninh mbuo gan ninh nyei leiz-nyeic yaac ei nzengc ninh nyei leiz-latc. Oix zuqc ceng ZIOUV. [300]