Read Iu Mien Singx Nzung 106 Bible Online

Singx Nzung 106 - Iu Mien bible

Singx Nzung 106

¹Singx Nzung 106 Oix zuqc ceng ZIOUV. [301] Oix zuqc dor-ziec ZIOUV weic zuqc ninh se longx haic, ninh yietc liuz ziepc zuoqv nyei hnamv mienh.

²Haaix dauh haih gorngv ZIOUV zoux hlo haic nyei sic? Fai haaix dauh haih biux mengh puix duqv ceng ninh nyei yietc zungv?

³Da'faanh ei jienv baengh fim nyei jauv zoux wuov deix, se zanc-zanc zoux horpc nyei mienh, maaih orn-lorqc.

⁴O ZIOUV aac, meih zoux longx bun meih nyei baeqc fingx wuov zanc, tov jangx yie. Meih daaih njoux ninh mbuo nyei ziangh hoc tov tengx yie,

⁵weic bun yie buatc meih ginv daaih nyei mienh duqv bungx-zuoqc, yaac bun yie a'hneiv meih nyei baeqc fingx duqv daaih nyei njien-youh, yaac duqv caux meih nzipc daaih nyei buonc juangc jienv ceng.

⁶Yie mbuo caux yie mbuo nyei ong-taaix fih hnangv nyei baamz zuiz. Yie mbuo zoux dorngc, zoux orqv nyei sic.

⁷Yiem I^yipv Deic-Bung wuov zanc, yie mbuo nyei ong-taaix maiv mengh baeqc meih zoux mbuoqc horngh nyei sic. Ninh mbuo maiv jangx taux meih ndongc haaix ziepc zuoqv nyei hnamv ninh mbuo. Ninh mbuo zungv yiem wuov Koiv-Siqv ga'hlen,[302] ngaengc Yiem Hlang Jiex Wuov Dauh.

⁸Maiv gunv hnangv naaic, ninh weic ganh nyei mengh njoux ninh mbuo, weic bun ninh mbuo hiuv duqv ninh nyei domh qaqv.

⁹Ninh hatc Koiv-Siqv, koiv ziouc nqaai mi'aqv. Ninh dorh ninh mbuo jiex ndo nyei dorngx hnangv jiex deic-bung-huaang nor.

¹⁰Ninh njoux ninh mbuo biaux ndutv ninh mbuo nyei win-wangv nyei buoz-ndiev, yiem win-jaa nyei buoz-ndiev njoux ninh mbuo cuotv daaih.

¹¹Wuom yiemx ninh mbuo nyei win-jaa, zungv maiv zengc yietc dauh aqv.

¹²Wuov zanc ninh mbuo sienx ninh nyei waac, ninh mbuo yaac baaux nzung ceng ninh.

¹³Mv baac maiv lauh ninh mbuo la'kuqv ninh zoux nyei sic, ninh mbuo maiv longc hnyouv zuov ninh njaaux nyei za'eix.

¹⁴Yiem wuov deic-bung-huaang ninh mbuo cei duqv kouv haic, ziouc yiem wuov seix Tin-Hungh.

¹⁵Ziux ninh mbuo tov nyei ninh ceix bun ninh mbuo, mv baac bun ninh mbuo butv baengc-ngaaiz.

¹⁶Yiem ndopv-liuh ciangv gu'nyuoz mienh mueic jieqv Mose caux ZIOUV nyei cing-nzengc mienh, Aalon, wuov zanc,

¹⁷ndau nqoi, naqv Ndaataan yaac biopv ndipc Aa^mbi^lam yietc guanh mienh.

¹⁸Maaih douz yiem ninh mbuo nyei guanh mbu'ndongx cuotv daaih, douz-mbietc buov nzengc orqv mienh.

¹⁹Yiem Holepv Mbong ninh mbuo zoux dauh ngongh gouv dorn, yaac baaix dox daaih nyei miuc-fangx.

²⁰Ninh mbuo zorqv Tin-Hungh nyei njang-laangc tiuv nyanc miev nyei ngongh gouv nyei miuc-fangx.

²¹Ninh mbuo la'kuqv ninh mbuo nyei Njoux Ziouv, Tin-Hungh, dongh yiem I^yipv zoux hlo haic nyei sic,

²²yiem Haam nyei deic zoux mbuoqc horngh nyei jauv, yiem Koiv-Siqv zoux peix fuc nyei sic.

²³Weic naaiv ninh gorngv ninh oix mietc ninh nyei baeqc fingx. Kaux bangc maaih ninh ginv daaih wuov dauh Mose dorng jienv Tin-Hungh tengx ninh mbuo gorngv, yaac bun ninh ga'qiex fiu, maiv mietc ninh mbuo.

²⁴Ninh mbuo yaac mangc piex wuov norm kuh yiem nyei deic-bung, ninh mbuo maiv sienx Tin-Hungh laengz nyei waac.

²⁵Ninh mbuo yiem ganh nyei ndopv-liuh ngopv, yaac maiv muangx ZIOUV nyei waac.

²⁶Weic naaiv ninh sung jienv buoz houv waac gorngv ninh oix bun ninh mbuo yiem deic-bung-huaang ndortv nzengc.

²⁷Bun ninh mbuo nyei zeiv-fun nzaanx mingh yiem maanc fingx mbu'ndongx, bun ninh mbuo faatv nzaanx yiem buangv norm-norm guoqv.

²⁸Nqa'haav yiem Be^o ninh mbuo bieqc Mbaa^an zienh yaac nyanc ziec bun maiv maaih maengc nyei zienh[303] nyei ga'naaiv.

²⁹Ninh mbuo zoux nyei sic cuoqv ZIOUV qiex jiez haic, ziouc maaih domh wuon-baengc yiem ninh mbuo mbu'ndongx butv cuotv.

³⁰Wuov zanc Fi^ne^hatc souv jiez daaih dingc zoux dorngc nyei mienh nyei zuiz, domh wuon-baengc ziouc dingh mi'aqv.

³¹Ninh hnangv naaiv zoux, Ziouv funx ninh zoux duqv horpc, yaac funx taux maanc gouv maanc doic.

³²Ninh mbuo yiem Me^li^mbaa Wuom cuoqv ZIOUV qiex jiez. Laaix ninh mbuo, Mose yaac zuqc kouv aqv.

³³Weic naaiv ninh mbuo bun Mose nyei hnyouv mun, ninh ziouc qiex beqv gorngv cuotv ninh maiv horpc zuqc gorngv nyei waac.

³⁴Ninh mbuo maiv ei ZIOUV hatc nyei waac mietc wuov deix ganh fingx mienh.

³⁵Daaux nzuonx zorpc jienv caux wuov deix fingx yiem, yaac hoqc zoux hnangv ninh mbuo nor zoux.

³⁶Tin-Hungh nyei mienh fu-sux wuov deix mienh nyei miuc-fangx ziouc benx koux hlopv jienv ninh mbuo.

³⁷Ninh mbuo zorqv ninh mbuo ganh nyei naamh nyouz ziec bun mienv.

³⁸Ninh mbuo daix maiv zoux dorngc nyei mienh, se bun ganh nyei naamh nyouz nyei nziaamv liouc cuotv, dongh ninh mbuo longc ziec bun Kaa^naa^an nyei miuc-fangx. Wuov deix nziaamv ziouc bun deic-bung maaih uix.

³⁹Hnangv naaic ninh mbuo ganh zoux nyei jauv bun ninh mbuo maaih uix, yiem ninh mbuo zoux nyei sic ninh mbuo hnangv maaic buonv-sin nyei m'sieqv dorn.

⁴⁰Weic naaiv ZIOUV ziouc qiex jiez ninh nyei baeqc fingx, yaac youx haic ninh nzipc nyei buonc.

⁴¹Ninh ziouc zorqv ninh mbuo jiu bun yiem camv-fingx mienh nyei buoz-ndiev, nzorng ninh mbuo wuov deix ziouc duqv gunv ninh mbuo.

⁴²Ninh mbuo nyei win-wangv yaac zeix ninh mbuo, ninh mbuo ziouc zuqc yiem ninh mbuo nyei hatc maaz ga'ndiev.

⁴³Ninh njoux ninh nyei baeqc fingx ziex nzunc, mv baac ninh mbuo duqv-eix ngaengc jienv Tin-Hungh ziouc laaix ganh nyei zuiz ndortv njiec aiv.[304]

⁴⁴Maiv gunv hnangv naaic, ninh haiz ninh mbuo heuc jienv tov nyei waac, ninh ziouc jangx ninh mbuo nyei kouv naanc.

⁴⁵Ninh jangx jienv ninh laengz nyei ngaengc waac, ziux ninh ndongc naaic ziepc zuoqv nyei hnamv ninh ziouc goiv za'eix.

⁴⁶Ninh bun yietc zungv caangv ninh nyei mienh wuov deix korv-lienh ninh mbuo.

⁴⁷O ZIOUV, yie mbuo nyei Tin-Hungh aac, tov njoux yie mbuo. Tov siou yie mbuo yiem maanc guoqv mbu'ndongx nzuonx, weic bun yie mbuo haih dor-ziec meih nyei cing-nzengc mbuox, yaac a'hneiv nyei ceng.

⁴⁸Ceng ZIOUV, I^saa^laa^en nyei Tin-Hungh, yiem yietc liuz taux yietc liuz. Zuangx mienh oix zuqc lomh nzoih gorngv, “Aamen”. Oix zuqc ceng ZIOUV. [305]