Read Iu Mien Singx Nzung 107 Bible Online

Singx Nzung 107 - Iu Mien bible

Singx Nzung 107

¹Singx Nzung 107 Oix zuqc dor-ziec ZIOUV weic zuqc ninh longx haic, ninh ziepc zuoqv nyei hnamv mienh taux yietc liuz.

²Tov bun ZIOUV zuoqc nzuonx nyei mienh hnangv naaic nor gorngv, se dongh ninh yiem win-wangv nyei buoz-ndiev zuoqc nzuonx nyei mienh,

³yaac yiem norm-norm deic-bung, se yiem dong naamh fai baqv bung[306] siou nzuonx daaih nyei mienh.

⁴Ninh mbuo yiem deic-bung-huaang, deic-bung haanz, youh jienv mingh, lorz maiv duqv jauv mingh horpc ninh mbuo yiem nyei zingh.

⁵Ninh mbuo youc hnyouv sie youc jaang nqaatv, ninh mbuo nyei hnyouv mau[307] nzengc mi'aqv.

⁶Ninh mbuo yiem naanc zingh gu'nyuoz heuc jienv tov ZIOUV, ninh ziouc njoux ninh mbuo biaux ndutv ninh mbuo nyei kouv naanc.

⁷Ninh dorh ninh mbuo yangh diuh jauv-zaqc, taux horpc ninh mbuo yiem nyei zingh.

⁸Ninh mbuo horpc zuqc dor-ziec ZIOUV weic ninh ziepc zuoqv nyei hnamv mienh, ninh yaac weic baamh mienh zoux mbuoqc horngh nyei sic.

⁹Ninh bun jaang nqaatv nyei mienh jaiv nqaatv, bun hnyouv sie nyei mienh duqv longx nyei ga'naaiv nyanc beuv.

¹⁰Maaih deix mienh yiem hmuangx zong, yiem-yiem nyei dorngx, se zuqc wuonx loh nyei caux zuqc limc ndoh nyei mienh,

¹¹weic zuqc ninh mbuo ngaengc Tin-Hungh nyei waac, mangc piex Yiem Hlang Jiex Wuov Dauh njaaux nyei za'eix.

¹²Ninh bun ninh mbuo zuqc zoux gong kouv weic zatv ninh mbuo nyei hnyouv njiec. Ninh mbuo ndorpc, yaac maiv maaih haaix dauh tengx.

¹³Ninh mbuo yiem naanc zingh gu'nyuoz heuc jienv tov ZIOUV. Ninh ziouc njoux ninh mbuo biaux ndutv ninh mbuo nyei kouv naanc.

¹⁴Ninh dorh ninh mbuo yiem hmuangx caux zuqc daic nyei dongh linh gu'nyuoz cuotv daaih, yaac cutv ninh mbuo zuqc ndoh nyei limc dangx.

¹⁵Ninh mbuo horpc zuqc dor-ziec ZIOUV weic ninh ziepc zuoqv nyei hnamv mienh, ninh yaac weic baamh mienh zoux mbuoqc horngh nyei sic.

¹⁶Ninh mborqv huv dongh siqv gaengh, yaac hngaqv ndutv hlieqv-gaengh sorn.

¹⁷Maaih deix butv baengc laaix ninh mbuo zoux nyei zuiz, yaac laaix ninh mbuo zoux waaic sic zuqc siouc kouv.

¹⁸Ninh mbuo youx haic nyungc-nyungc nyanc nyei ga'naaiv, yaac taux fatv zuqc daic nyei gaengh.

¹⁹Ninh mbuo yiem naanc zingh gu'nyuoz heuc jienv tov ZIOUV, ninh ziouc njoux ninh mbuo biaux ndutv ninh mbuo nyei kouv naanc.

²⁰Ninh gorngv cuotv waac zorc ninh mbuo longx, yaac njoux ninh mbuo biaux ndutv zuqc daic nyei kuotv.

²¹Ninh mbuo horpc zuqc dor-ziec ZIOUV weic ninh ziepc zuoqv nyei hnamv mienh, ninh yaac weic baamh mienh zoux mbuoqc horngh nyei sic.

²²Oix zuqc bun ninh mbuo fongc horc ziec weic dor-ziec, yaac njien-youh nyei baaux nzung gorngv ninh zoux nyei sic.

²³Maaih deix bieqc nzangv, yiem domh wuom bangc nzangv lorz nyanc.

²⁴Ninh mbuo buatc ZIOUV zoux nyei gong, se ninh yiem wuom ndo nyei dorngx zoux mbuoqc horngh nyei sic.

²⁵Ninh yietv hatc, domh nziaaux buonc daaih bun koiv jiez laangc.

²⁶Ninh mbuo nyei nzangv faaux taux ndaamv-lungh, aengx ndortv njiec wuom-laangc taux ndo nyei dorngx. Ninh mbuo hnyouv waaic nzengc, laaix ninh mbuo zuqc gamh nziex nyei sic.

²⁷Ninh mbuo laih mingh laih daaih hnangv diuv nquin nyei mienh nor, ninh mbuo jomc za'eix aqv.

²⁸Ninh mbuo yiem naanc zingh gu'nyuoz heuc jienv tov ZIOUV. Ninh ziouc tengx ninh mbuo biaux ndutv ninh mbuo nyei kouv naanc.

²⁹Ninh bun domh nziaaux dingh, bun koiv nyei wuom-laangc sekv nzengc.

³⁰Ninh mbuo ziouc a'hneiv weic zuqc sekv nzieqc nyei. Ninh yaac dorh ninh mbuo mingh taux ninh mbuo oix mingh nyei nzangv-bouc.

³¹Ninh mbuo horpc zuqc dor-ziec ZIOUV weic zuqc ninh ziepc zuoqv nyei hnamv mienh. Ninh yaac weic baamh mienh zoux mbuoqc horngh nyei sic.

³²Ninh mbuo oix zuqc yiem baeqc fingx gapv zunv nyei dorngx zunh gorngv ninh zoux hlo, yaac yiem zuangx mienh gox mbu'ndongx ceng ninh.

³³Ninh bun ndaaih tiuv benx deic-bung-huaang, bun wuom-zingv tiuv benx mborngx nqaai nyei ndau,

³⁴bun ndau-junc tiuv benx ndau-nzaaih ndau-huaang, laaix yiem wuov nyei mienh waaic haic.

³⁵Ninh bun deic-bung-huaang benx wuom-domh, bun ndau-nqaai benx wuom-zingv.

³⁶Ninh bun ngorc nyei mienh yiem wuov, ninh mbuo yaac ceix norm zingh yiem.

³⁷Ninh mbuo zoux ndeic zuangx ga'naaiv, zuangx a'ngunc biouv, yaac duqv bungx-zuoqc nyei siou.

³⁸Ninh ceix fuqv bun ninh nyei baeqc fingx hiaangx camv, yaac maiv bun ninh mbuo nyei saeng-kuv zoqc njiec.

³⁹Baeqc fingx zuqc zeix, zuqc kouv, zuqc nzauh, ninh mbuo ziouc zoqc yaac ndortv njiec aiv nyei ziangh hoc,

⁴⁰ninh bun zeix ninh nyei baeqc fingx wuov deix zoux hlo nyei mienh[308] zuqc mangc piex, yaac bun ninh mbuo youh jienv mingh maiv maaih jauv nyei deic-bung-huaang.

⁴¹Mv baac ninh bouh mienh jomc mienh faaux hlaang, bun ninh mbuo leih ndutv kouv naanc, bun ninh mbuo nyei hmuangv doic hiaangx, hnangv yungh guanh nor camv.

⁴²Hnyouv zingx nyei mienh buatc ninh mbuo ziouc a'hneiv. Zoux orqv nyei mienh nqapc jienv nzuih, maiv maaih waac gorngv aqv.

⁴³Haaix dauh maaih cong-mengh oix zuqc longc hnyouv muangx naaiv deix sic, yaac oix zuqc samx mangc ZIOUV ziepc zuoqv hnamv mienh nyei jauv.