Read Iu Mien Singx Nzung 109 Bible Online

Singx Nzung 109 - Iu Mien bible

Singx Nzung 109

¹Singx Nzung 109 Jiu bun dorh nzung nyei mienh. Ndaawitv zoc nyei singx nzung. O yie ceng nyei Tin-Hungh aac, tov meih maiv dungx sekv-sekv nyei yiem,

²weic zuqc orqv mienh caux guv guaix nyei mienh gorngv yie. Ninh mbuo longc gorngv-baeqc nyei waac hoic yie.

³Ninh mbuo weih gormx yie gorngv nzorng nyei waac yaac mborqv yie mv baac maiv maaih gorn-baengx.

⁴Maiv gunv yie hnamv ninh mbuo yaac weic ninh mbuo daux gaux, ninh mbuo gox yie.

⁵Yie zoux longx nyei ninh mbuo winh orqv nyei bun yie, yie hnamv nyei ninh mbuo winh nzorng nyei.

⁶Tov paaiv dauh orqv mienh daaih caux ninh doix-dekc, bun dauh ninh ganh nyei win-wangv gox ninh.[310]

⁷Siemv nyei ziangh hoc, tov bun ninh zuqc dingc zuiz, tov bun liemh ninh daux gaux nyei waac funx benx zuiz.

⁸Tov bun ninh nyei siouc nyuonh nangv, bun ganh dauh duqv ninh nyei weic.[311]

⁹Tov bun ninh nyei fu'jueiv benx guh hanh fu'jueiv, bun ninh nyei auv benx auv-guaav.

¹⁰Tov bun ninh nyei naamh nyouz benx njouh huaax mienh youh jienv mingh tov nyanc. Ninh mbuo yiem baaic waaic nyei dorngx, tov bun ninh mbuo zuqc zunc cuotv mingh.

¹¹Tov bun zaeqv-ziouv daaih zorqv ninh maaih nyei yietc zungv, tov bun dongh ninh maiv hiuv nyei mienh daaih caangv ninh ndortv qaqv duqv daaih nyei ga'naaiv.

¹²Tov maiv dungx bun haaix dauh zoux longx bun ninh, yaac maiv dungx bun haaix dauh korv-lienh ninh nyei guh hanh fu'jueiv.

¹³Tov bun ninh nyei hoz doic zeiv-fun zutc nzengc. Tov bun ninh nyei mbuox zuqc sortv guangc, maiv bun da'nyeic doic mienh jangx ninh.

¹⁴Tov ZIOUV jangx jienv ninh nyei ong-taaix mbuo zoux nyei zuiz. Yaac maiv dungx sortv ninh nyei maa nyei zuiz guangc.

¹⁵Tov bun naaiv deix zuiz zanc-zanc yiem ZIOUV nyei nza'hmien, mv baac bun yiem naaiv lungh ndiev maiv maaih haaix dauh jangx duqv ninh[312] nyei mbuox.

¹⁶Weic zuqc ninh yietc liuz maiv hnamv taux zoux longx bun mienh, zungv zoux doqc hoic[313] mienh jomc mienh, ndortv naanc mienh, caux hnyouv mun nyei mienh, bun ninh mbuo zuqc daic.

¹⁷Ninh oix zioux, tov bun ninh zioux nyei waac ndortv zuqc ninh ganh. Ninh maiv oix buang waac bun mienh, tov bun fuqv leih ninh go.

¹⁸Ninh zorqv zioux nyei waac dorngx lui zuqv, tov bun naaiv deix waac saamx bieqc ninh nyei sin hnangv wuom, yaac hnangv hmei saamx bieqc ninh nyei mbungv.

¹⁹Tov bun zioux nyei waac hnangv domh lui buang jienv ninh, yaac hnangv houx-hlaang zanc-zanc sai jienv ninh nyei jaaiv.

²⁰Tov ZIOUV bun gox yie caux gorngv doqc hoic yie nyei maengc wuov deix, hnangv naaiv nor zuqc daaih weic benx ninh mbuo nyei zingh nyeic.

²¹Mv baac yie nyei ZIOUV Tin-Hungh aac, tov weic meih nyei mengh zoux longx bun yie. Weic zuqc meih ziepc zuoqv nyei hnamv mienh se longx haic, tov njoux yie.

²²Weic zuqc yie jomc, ga'naanh haic, yie nyei hnyouv gu'nyuoz za'gengh mun haic aqv.

²³Yie nyei maengc jiex jienv mingh hnangv lungh maanz-hmuangx nyei dongh linh nor, yie hnangv norm jopv-nyeic zuqc nziaaux buonc mingh.

²⁴Yie zei maiv nyanc haaix nyungc cingh mborqc ziouc mau. Yie nyei sin zaangc jaic jienv njiec.

²⁵Gox yie wuov deix kungx huotv yie hnangv. Ninh mbuo buatc yie, ninh mbuo huangx m'nqorngv.

²⁶O ZIOUV, yie nyei Tin-Hungh aah! Tov tengx yie. Ziux meih ziepc zuoqv nyei hnamv mienh, tov njoux yie.

²⁷Tov bun ninh mbuo hiuv duqv naaiv se meih nyei buoz zoux nyei. O ZIOUV aac, naaiv se meih zoux nyei sic.

²⁸Sueih ninh mbuo zioux, mv baac tov meih ceix fuqv. Tov bun jiez daaih oix mborqv yie wuov deix zuqc nyaiv, yaac tov bun yie, meih nyei bou, a'hneiv.

²⁹Tov bun gox yie wuov deix zuqc buang hmien diev nyaiv, bun ninh mbuo baaic hmien beiv hnangv buix domh lui-ndaauv nor.

³⁰Yie oix longc yie nyei nzuih camv-camv nyei dor-ziec ZIOUV. Yie oix yiem zuangx mienh camv nyei mbu'ndongx ceng ninh,

³¹weic zuqc ninh souv jienv mienh jomc mienh nyei mbiaauc maengx, weic njoux ninh mbuo biaux ndutv dingc bun ninh mbuo zuqc daix daic wuov deix.