Read Iu Mien Singx Nzung 115 Bible Online

Singx Nzung 115 - Iu Mien bible

Singx Nzung 115

¹Singx Nzung 115 O ZIOUV aac, njang-laangc maiv zeiz bun yie mbuo, maiv zeiz bun yie mbuo, se oix zuqc bun meih ganh nyei mengh duqv njang-laangc, weic zuqc meih za'gengh hnamv mienh yaac ziepc zuoqv nyei zoux.

²Maanc fingx mienh weic haaix diuc oix gorngv, “Ninh mbuo nyei Tin-Hungh yiem haaix?”

³Yie mbuo nyei Tin-Hungh yiem gu'nguaaic lungh, ziux ninh buatc horpc nyei ninh ziouc zoux.

⁴Ninh mbuo nyei miuc-fangx longc jiem longc nyaanh zoux daaih. Se mienh nyei buoz zoux cuotv daaih nyei.

⁵Naaiv deix miuc-fangx maaih nzuih mv baac maiv haih gorngv waac, maaih m'zing mv baac mangc maiv buatc,

⁶maaih m'normh mv baac muangx maiv haiz, maaih mba'zorng mv baac maiv haih hnomv,

⁷maaih buoz mv baac maiv haih hluo, maaih zaux mv baac maiv haih yangh jauv. Ninh mbuo nyei jaang-hoh yaac maiv haih cuotv qiex mbui.

⁸Zoux naaiv deix miuc-fangx nyei mienh ziouc hnangv naaiv deix miuc-fangx nor. Da'faanh kaux miuc-fangx nyei mienh yaac fih hnangv nyei.

⁹O I^saa^laa^en Mienh aac, oix zuqc kaux ZIOUV. Ninh tengx ninh mbuo yaac zoux ninh mbuo nyei torngv-baaih.

¹⁰O Aalon nyei zeiv-fun aac, oix zuqc kaux ZIOUV. Ninh tengx ninh mbuo yaac zoux ninh mbuo nyei torngv-baaih.

¹¹Taaih ZIOUV nyei zuangx mienh aah! Oix zuqc kaux ZIOUV. Ninh tengx ninh mbuo yaac zoux ninh mbuo nyei torngv-baaih.

¹²ZIOUV jangx yie mbuo. Ninh oix ceix fuqv bun yie mbuo. Ninh oix ceix fuqv bun I^saa^laa^en nyei zeiv-fun. Ninh oix ceix fuqv bun Aalon nyei zeiv-fun.

¹³Ninh oix ceix fuqv bun taaih ZIOUV nyei zuangx mienh, liemh zoux hlo zoux faix.

¹⁴Tov ZIOUV bun meih mbuo caux meih mbuo nyei zeiv-fun jaa hiaangx jienv faaux.

¹⁵Tov bun meih mbuo duqv ZIOUV nyei fuqv, se Zeix Lungh Zeix Ndau Wuov Dauh nyei fuqv.

¹⁶Lungh se ZIOUV nyei lungh, mv baac ndau ninh ceix bun baamh mienh.

¹⁷Daic mingh nyei mienh maiv ceng ZIOUV, njiec taux sekv nzieqc nyei dorngx[325] wuov deix yaac maiv ceng.

¹⁸Mv baac yie mbuo oix ceng ZIOUV yiem naaiv mingh taux yietc liuz. Oix zuqc ceng ZIOUV. [326]