Read Iu Mien Singx Nzung 132 Bible Online

Singx Nzung 132 - Iu Mien bible

Singx Nzung 132

¹Singx Nzung 132 Yangh faaux nyei nzung O ZIOUV aac, tov meih jangx jienv Ndaawitv, dongh ninh diev nyei yietc zungv kouv naanc.

²Jangx jienv ninh hnangv haaix nor caux ZIOUV houv jienv laengz waac, se caux Yaakopv nyei Nernh Jiex nyei Tin-Hungh.

³“Yie zungv maiv bieqc yie nyei biauv yaac maiv faaux yie nyei coux.

⁴Yie maiv bun yie nyei m'zing m'njormh, yaac maiv bun m'zing-ndopv njipv.

⁵Zuov taux yie weic ZIOUV lorz duqv dorngx yiem, se lorz dorngx bun Yaakopv nyei Nernh Jiex nyei Tin-Hungh.”

⁶Muangx gaax, yie mbuo haiz gorngv Laengz Ngaengc Waac Faang yiem E^faa^taa, yie mbuo lorz buatc yiem Yaa^aa[351] nyei ndeic.

⁷“Mbuo oix zuqc bieqc ninh yiem nyei dorngx, yiem ninh lorngx zaux nyei dorngx baaix.

⁸ZIOUV aac, daaih maah! Liemh meih caux biux mengh meih nyei qaqv wuov norm Laengz Ngaengc Waac Faang daaih bieqc meih hitv kuonx nyei dorngx.

⁹Tov bun meih nyei sai mienh zanc-zanc zoux horpc,[352] yaac tov bun meih nyei cing-nzengc baeqc fingx njien-youh nyei heuc.”

¹⁰Tov weic meih nyei bou, Ndaawitv, maiv dungx nqemh guangc[353] meih longc youh orn daaih wuov dauh.

¹¹ZIOUV dorng jienv Ndaawitv ziepc zuoqv nyei laengz ngaengc waac, ninh yaac maiv haih tuix. Ninh gorngv, “Yie oix liepc dauh meih ganh nyei dorn zueiz jienv meih nyei weic.

¹²Se gorngv meih nyei dorn mbuo ei jienv yie laengz nyei ngaengc waac, yaac gan yie oix njaaux ninh mbuo nyei yietc zungv waac, ninh mbuo nyei zeiv-fun ziouc duqv yietc liuz zueiz jienv meih nyei weic.”

¹³Weic zuqc ZIOUV ginv Si^on. Ninh oix longc weic zoux ninh yiem nyei dorngx.

¹⁴Ninh gorngv, “Naaiv se yie yietc liuz hitv nyei dorngx, yie oix yiem naaiv. Naaiv se yie nyei eix.

¹⁵Yie oix ceix fuqv bun naaiv norm zingh nyei laangh ziqc bungx-zuoqc, yaac bun naaiv norm zingh nyei mienh jomc mienh duqv nyanc beuv.

¹⁶Yie oix bun ninh nyei sai mienh duqv[354] njoux en. Ninh nyei baeqc fingx yaac oix njien-youh nyei heuc.

¹⁷Yie oix bun Ndaawitv nyei yietc dauh zeiv-fun yiem wuov zoux hungh. Yie weic yie longc youh orn daaih wuov dauh liepc dauh nzipc jienv zoux hungh.[355]

¹⁸Yie oix bun ninh nyei win-wangv zuqc nyaiv, mv baac ninh ganh ndongx nyei hungh ningv oix aengv cuotv njang.