Read Iu Mien Singx Nzung 138 Bible Online

Singx Nzung 138 - Iu Mien bible

Singx Nzung 138

¹Singx Nzung 138 Ndaawitv zoc nyei singx nzung. O ZIOUV aac, yie longc nzengc hnyouv dor-ziec meih. Yie dorng jienv zuangx zienh nyei nza'hmien baaux nzung ceng meih.

²Yie hungx jienv meih nyei singx dinc baaix, yaac dor-ziec meih,[362] weic meih se ziepc zuoqv nyei yaac ziepc zuoqv hnamv meih nyei mienh, weic zuqc meih taaih meih nyei mengh caux meih nyei waac gauh hlo jiex maanc muotc.[363]

³Yie heuc meih wuov hnoi meih dau yie, meih longc meih nyei qaqv bun yie nyei hnyouv henv jiez daaih.

⁴O ZIOUV aac, lungh ndiev nyei zuangx hungh oix ceng meih, weic zuqc ninh mbuo haiz meih nyei nzuih gorngv nyei waac.

⁵Ninh mbuo oix baaux nzung ceng ZIOUV zoux nyei jauv, weic zuqc ZIOUV nyei njang-laangc gengh hlo haic.

⁶Maiv gunv ZIOUV yiem hlang, ninh ziux goux haac dangv nyei mienh, mv baac ninh yiem go nyei dorngx mangc duqv hiuv zoux maux nyei mienh.

⁷Maiv gunv yie yiem naanc zingh gu'nyuoz, meih beu yie nyei maengc. Yie nyei win-wangv qiex jiez, meih sung meih nyei buoz cuotv mborqv hingh, meih nyei mbiaauc jieqv buoz njoux yie.

⁸ZIOUV oix zoux ziangx nyungc-nyungc ziux ninh weic yie maaih nyei za'eix.[364] O ZIOUV aac, meih ziepc zuoqv hnamv mienh taux yietc liuz. Tov meih maiv dungx guangc meih nyei buoz zoux nyei gong.