Read Iu Mien Singx Nzung 139 Bible Online

Singx Nzung 139 - Iu Mien bible

Singx Nzung 139

¹Singx Nzung 139 Jiu bun dorh nzung nyei mienh. Ndaawitv zoc nyei singx nzung. O ZIOUV aac, meih zaah mangc yie, yaac hiuv yie.

²Yie zueiz njiec fai jiez sin meih hiuv nyei. Meih yiem go nyei dorngx hiuv duqv yie nyei hnyouv hnamv nyei jauv.

³Yie bieqc cuotv fai bueix njiec meih mangc muonc nyei, yaac hiuv toux yie zoux nyei yietc zungv jauv.

⁴O ZIOUV aac, yie liemh maiv gaengh gorngv cuotv yietc joux waac meih zungv hiuv nzengc mi'aqv.

⁵Meih yiem yie nyei nza'hmien maengx caux yie nyei nqa'haav nqaang, yaac longc meih nyei buoz maan jienv yie.

⁶Meih ndongc naaiv hiuv yie, yie gengh! mbuoqc horngh haic, se gauh hlang yie haih bieqc hnyouv nyei.

⁷Yie haih mingh haaix cingx haih biaux ndutv meih nyei Singx Lingh? Fai yie haih biaux mingh haaix cingx leih ndutv meih nyei hmien?

⁸Se gorngv yie faaux lungh, meih yiem wuov. Se gorngv yie njiec[365] yiemh gen, meih yaac yiem wuov.

⁹Se gorngv yie ndaix mingh mba'hnoi cuotv nyei dorngx, fai yiem wuov bung ziqc koiv,

¹⁰meih zungv yiem wuov dorh yie, yaac yiem wuov tengx yie.

¹¹Se gorngv yie gorngv, “Tov bun hmuangx torngv jienv yie, bun weih gormx yie nyei njang tiuv benx lungh muonz zanc.”

¹²Weic meih nor, liemh hmuangx yaac maiv zeiz hmuangx, lungh muonz zanc yaac ndongc lungh hnoi zanc njang, weic meih aeqv, hmuangx se hnangv njang.

¹³Meih zeix yiem yie gu'nyuoz nyei nyungc-nyungc. Yiem maa nyei ga'sie meih gapv yie daaih.

¹⁴Yie ceng meih weic zuqc meih zeix yie cuotv daaih peix fuc haic, mbuoqc horngh haic. Meih zoux nyei nyungc-nyungc za'gengh peix fuc haic. Yie nyei hnyouv zien-zien hiuv duqv.[366]

¹⁵Yie yiem maa nyei ga'sie[367] zeix cuotv, se yiem gem jienv nyei dorngx gapv yie nyei mbungv-qorng nyei ziangh hoc, zungv bingx meih maiv mbueiz.

¹⁶Yie nyei sin maiv gaengh benx fangx zeiv, meih nyei m'zing zungv buatc yie mi'aqv. Yie liemh maiv gaengh maaih yietc norm hnoi wuov zanc,[368] meih weic yie dingc daaih nyei hnoi-nyieqc yietc zungv fiev jienv meih nyei sou-daan.

¹⁷O Tin-Hungh aac, meih hnamv nyei sic weic yie nor za'gengh jaaix haic. Gapv daaih nyei soux mouc ndongc haaix camv aqv.

¹⁸Se gorngv yie saauv nor, maaih gauh camv saa-ziou. Yie nyie daaih nyei ziangh hoc, yie corc caux meih yiem.

¹⁹O Tin-Hungh aac, feix duqv meih daix nzengc orqv mienh, feix duqv daix mienh nyei mienh leih nqoi yie.

²⁰Ninh mbuo gorngv orqv nyei waac daanh meih, yaac gorngv doqc meih nyei mengh.

²¹O ZIOUV aac, yie nzorng haic dongh nzorng meih wuov deix mienh. Yie yaac youx dongh ngaengc jienv meih wuov deix.

²²Yie nzorng ninh mbuo taux mbungv-fim, yaac funx ninh mbuo benx yie nyei win-wangv.

²³O Tin-Hungh aac, tov zaah mangc yie, seix yie yaac hiuv duqv yie hnyouv hnamv nyei jauv.

²⁴Mangc gaax yiem yie maaih haaix nyungc orqv nyei sic, yaac tov dorh yie yangh yietc liuz nyei jauv.[369]